(បាត់ដំបង)៖ លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក នៃធនាគារអភិវឌ្ឍន៍ជនបទ និងកសិកម្ម (ARDB) នាព្រឹកថ្ងៃទី២៤ ខែមិថុនា ឆ្នាំ២០២៣ បានបន្តអញ្ជើញចុះសំណេះសំណាល សួរសុខទុក្ខ និងផ្សព្វផ្សាយអំពីគោលការណ៍ឥណទានគាំទ្រ ដល់ខ្សែច្រវាក់ផលិតកម្មដាំដុះស្វាយចន្ទី នៅស្រុកគាស់ក្រឡ ខេត្តបាត់ដំបង។
លោកបណ្ឌិត បានធ្វើការបង្ហាញអំពីវត្ថុបំណង ចង់ឲ្យបងប្អូនកែប្រែខ្លួនទៅជាកសិករទំនើប ឬសហក្រិនវិស័យឌីជីថល ក្នុងវិស័យកសិកម្ម គឺ, ១៖ រៀបចំផែនការដាំដុះ ថែទាំ និងប្រមូលផល, ២៖ គិតពីប្រាក់ចំណេញ, ៣៖ សិក្សាបញ្ហាប្រឈម, ៤៖ គិតពីការកាត់បន្ថយចំណាយ, ៥៖ ការផ្គត់ផ្គង់ទីផ្សារ និងតភ្ជាប់ទីផ្សារ។
ដូចនេះ ដើម្បីសម្រេចកម្មវត្ថុទាំង៥ខាងលើនេះ លោកបណ្ឌិតចង់ឲ្យបងប្អូនប្រជាកសិករ ចាំបាច់ត្រូវរៀបចំផែនការដាំដុះ ឲ្យបានច្បាស់លាស់ ថាតើគួរដាំដុះដំណាំអ្វី ហើយគូរដាំនៅពេលណា? ដាំដំណាំអ្វីខ្លះដែលទីផ្សារត្រូវការ គួរថែទាំរបៀបណា នៃការសំអាតស្មៅ ដាក់ជី ដាក់ទឹក បាញ់ថ្នាំ តែងដើម-មែក ឬបងប្អូនអាចកែប្រែដីណាមួយកុំទុកដីទំនេរចោល គួររកដំណាំប្រភេទណា ដែលអាចឲ្យយើងដាំដុះរយៈពេលខ្លី ប៉ុន្តែមានទីផ្សារ និងមានតម្រូវការ។ មួយទៀតបងប្អូនត្រូវចេះកត់ត្រាចំណូល ចំណាយឲ្យបានច្បាស់លាស់ និងស្វែងរកការចុះកិច្ចសន្យាកសិកម្ម ដើម្បីធានាស្ថេរភាពទីផ្សារ និងតំលៃ ជាដើម -ល-។
ស្របពេលជាមួយគ្នានេះ លោកបណ្ឌិត ក៏បានអនុញ្ញាតឲ្យបងប្អូនប្រជាកសិករ ឡើងបញ្ចេញមតិ និងទស្សនៈផ្សេងៗជុំវិញ បញ្ហាវិស័យកសិកម្មដែលបងប្អូនកំពុងប្រឈម និងកំពុងជួបផលវិបាក និងជាពិសេសពាក់ព័ន្ធនឹងស្វាយចន្ទី។ ជាមួយគ្នានេះ លោកបណ្ឌិត បានអនុញ្ញាតបងប្អូន ដាំដុះស្វាយចន្ទី លើកជាសំណើរ និងសំណូមពរ មកធនាគារ ARDB ផងដែរ។
យកឱកាសនៃការជួបជុំនៅព្រឹកនេះ លោកបណ្ឌិត បានធ្វើការផ្តាំផ្ញើសំណូមពរ និងជូនយោបល់មួយចំនួន ដល់បងប្អូនកសិករ នៅក្នុងស្រុកគាស់ក្រឡ ណែនាំអំពីព័ត៌មានទីផ្សារស្វាយចន្ទី នៅក្នុងស្រុក និងទីផ្សារក្រៅប្រទេស ដែលបច្ចុប្បន្នកំពុងមានតំរូវការខ្ពស់។
ជាមួយគ្នានេះ លោកបណ្ឌិត បានធ្វើការផ្សព្វផ្សាយអំពីគោលនយោបាយស្វាយចន្ទី និងគោលបំណងរបស់រាជរដ្ឋាភិបាលកម្ពុជា ចង់ប្រែក្លាយប្រទេសកម្ពុជា ជាអធិរាជនាំចេញស្វាយចន្ទី ទៅកាន់ពិភពលោក។ ដូចនេះ លោកបណ្ឌិត ចង់ឲ្យបងប្អូន គួរចងក្រងគ្នាជាសហគមន៍ ឬបណ្តុំផលិតស្វាយចន្ទីនៅក្នុងតំបន់របស់ខ្លួន ដោយរៀបចំឲ្យមានរចនាសម្ព័ន្ធច្បាស់លាស់ មានឃ្លាំងស្តុក សប្បិកម្មកែច្នៃស្វាយចន្ទី របស់ខ្លួនផ្ទាល់។ ការណ៍នេះបងប្អូនអាចទទួលបានផលចំនេញច្រើនចូលក្នុងសហគមន៍ផ្ទាល់ ដោយមិនមានការបារម្មណ៍ការទំលាក់ថ្លៃពីឈ្មួញកណ្តាល។
បន្ថែមលើនេះ លោកបណ្ឌិត បានធ្វើការណែនាំផងដែរ អំពីកញ្ចប់ឥណទានពិសេសអត្រាការប្រាក់ទាប របស់រាជរដ្ឋាភិបាលគាំទ្រ ដល់ខ្សែច្រវាក់ផលិតកម្មស្វាយចន្ទី។ ដូចនេះបងប្អូន អាចធ្វើការទំនាក់ទំនងមានធនាគារ ARDB ដើម្បីទទួលបានកម្ចីអត្រាការប្រាក់ទាប។
ក្រៅពីកញ្ចប់ឥណទានគាំទ្រដល់ស្វាចន្ទី, លោកបណ្ឌិត បានធ្វើការផ្សព្វផ្សាយគោលការណ៍ឥណទាន គាំទ្រដល់វិស័យកសិកម្មទាំងមូល មានដូចជា ការចញ្ចឹមសត្វ ដាំដុះបន្លែ ក្នុងផ្ទះសំណាញ់ ជាដើម។ល។ ដូចនេះ ក្នុងករណីបងប្អូន ប្រជាកសិករ ឬបណ្តុំផលិត ណាម្នាក់ចង់បានឥណទាន ដើម្បីពង្រីកការដាំដុះ ឬពង្រីកខ្សែច្រវាក់ផលិតកម្មរបស់ខ្លួន បងប្អូនអាចស្នើសុំឥណទានពីធនាគារ ARDB បានក្នុងអត្រាការប្រាក់សមរម្យ។
លោកក៏បានណែនាំឲ្យបងប្អូនកែប្រែទម្លាប់ពីការធ្វើកសិកម្មចញ្ជឹមឆ្នាំងបាយ ឲ្យក្លាយជាការធ្វើកសិកម្មបែបសហគ្រិន ពោលគឺមានលទ្ធភាពធ្វើការផ្គត់ផ្គង់ដល់ទីផ្សារ បន្ថែមពីលើការផ្គត់ផ្គង់ក្នុងគ្រួសារ និងលើកទឹកចិត្តឲ្យបងប្អូនត្រូវធ្វើការសិក្សារៀនសូត្របន្ថែម អំពីបច្ចេកទេសដាំដុះ ដោយកុំធ្វើតាមទម្លាប់ដដែលៗ ដែលចេះតគ្នា។
លោក៏បានប្រាប់ ឲ្យរៀនតាមដានតំលៃកសិផលនៅលើទីផ្សារ និងត្រូវចេះតាមដានព័ត៍មានព្យាករណ៍អាកាសធាតុ ហើយ ត្រូវចេះជ្រើសរើសការដាំដំណាំតាមរដូវ និងមានទីផ្សារ និងមានតំរូវការ ។ ណាមួយបងប្អូនគួរកុំជ្រើសរើសការដាំដុះដំណាំតាមគ្នា ដោយពុំមានព័ត៌មានច្បាស់លាស់ និងណែនាំឲ្យបងប្អូនចេះកែប្រែដំណាំ និងកែប្រែដី ដើម្បីឲ្យការដាំដុះទទួលបានទិន្នផលខ្ពស់ និងណែនាំ ឲ្យបងប្អូនកុំទុកដីឲ្យទំនេរ និងកែប្រែទម្លាប់ ពីការដាំដុះដំណាំតែមួយមុខ ឲ្យឆ្លៀតចញ្ចឹមសត្វបន្ថែម ដើម្បីទទួលបានចំណូលបន្ថែម។
ជាមួយគ្នានេះ លោកបណ្ឌិត បានធ្វើការអំពាវនាវដល់បងប្អូនប្រជាកសិករ សហគនម៍កសិកម្ម ទាំងអស់ដែលមានសិទ្ធិបោះឆ្នោត អញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នៅថ្ងៃទី២៣ ខែកក្កដា ខាងមុខនេះទាំងអស់គ្នា កុំបីខានផងដែរ៕
