(បាត់ដំបង)៖ បណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) នៅរសៀលថ្ងៃទី២៣ ខែមិថុនា ឆ្នាំ២០២៣ បានបន្តអញ្ជើញចុះសំណេះសំណាល សួរសុខទុក្ខ និងផ្សព្វផ្សាយគោលការណ៍ឥណទានគាំទ្រ ដល់ខ្សែច្រវាក់ផលិតកម្ម លើដំណាំ ឬដំណាំហូបផ្លែ មួយចំនួន ដូចជា ស្វាយចន្ទី និងផលិតកម្មស្វាយចន្ទី, ទុរេន សាវម៉ាវ ដូង ស្វាយ ប័រ ចិញ្ចឹមសត្វ និងដាំបន្លែចំរុះ ក្នុងផ្ទះសំណាញ់ និងនៅទីវាល។ ពិធីនេះធ្វើឡើងនៅសាលាស្រុកសំឡូត ខេត្តបាត់ដំបង។
លោកបណ្ឌិតបានផ្សព្វផ្សាយអំពីផែនការ និងគោលនយោបាយរបស់រាជរដ្ឋាភិបាល ដែលចង់ក្លាយជា អធិរាជស្វាយចន្ទី នាពេលអនាគត និងបានស្វែងយល់ពីផលវិបាកផ្សេងៗ ដែលបងប្អូនកំពុងជួបប្រឈម ក្នុងការប្រកបផលរបរកសិកម្ម និងអនុញ្ញាតឱ្យលើកអំពីសំណូមពរ មកធនាគារ ARDB ។
លោកបណ្ឌិតបាន ណែនាំឱ្យបងប្អូនផ្លាស់ប្តូរផ្នត់គំនិត កែប្រែពីការធ្វើកសិកម្មចិញ្ចឹមឆ្នាំងបាយ ឱ្យក្លាយជាការធ្វើកសិកម្មបែបទំនើប ដែលមានលទ្ធភាពធ្វើការផ្គត់ផ្គង់ដល់ទីផ្សារបន្ថែម ពីលើការផ្គត់ផ្គង់ក្នុងគ្រួសារ។
លោកបានណែនាំដល់បងប្អូនកសិករ គួរចេះតាមដានតំលៃកសិផលនៅលើទីផ្សារ និងត្រូវចេះតាមដានព័ត៌មានព្យាករណ៍អាកាសធាតុ និង ត្រូវចេះជ្រើសរើសដំណាំដាំតាមរដូវកាល ដោយបងប្អូនអាចធ្វើការសិក្សារៀនសូត្របន្ថែម ជាពិសេសក្នុងបរិបទសម័យទំនើបនេះ បងប្អូនអាចរៀនបានតាមរយៈបណ្ដាញសង្គម និងយូធូប (Youtube) ជាដើម ដើម្បីទទួលបានចំណេះដឹងបន្ថែម។
លោកបានណែនាំឱ្យបងប្អូនចេះកែប្រែដំណាំ និងកែប្រែដី ដើម្បីឱ្យការដាំដុះទទួលបានទិន្នផលខ្ពស់ ហើយកុំទុកដីទំនេរចោល គួររកដំណាំប្រភេទណា ដែលអាចឱ្យយើងដាំដុះរយៈពេលខ្លី ប៉ុន្តែមានទីផ្សារ និងមានតម្រូវការ ដែលជួយកែប្រែដីកុំឱ្យខូច ឬអន់ថយគុណភាព។
លោកអគ្គនាយក បានណែនាំឱ្យបងប្អូនកែប្រែទម្លាប់ ពីការដាំដុះដំណាំតែមួយមុខ ឱ្យឆ្លៀតចញ្ចឹមសត្វបន្ថែម ដើម្បីទទួលបានចំណូលបន្ថែម និងបានលើកទឹកចិត្តដល់បងប្អូនចងក្រងគ្នា ជាសហគមន៍កសិកម្ម ឬបណ្តុំផលិតស្វាយចន្ទី ទុរេន និងដំណាំរួមផ្សំផ្សេងៗទៀត ដោយត្រូវរៀបចំនូវ ផែនការណ៍ដាំដុះ, រៀបចំផែនការចិញ្ចឹម ផែនការប្រមូលផល ក៏ដូចជាផ្សារភ្ជាប់ជាមួយទីផ្សារ ដើម្បីមានលទ្ធភាពផ្គត់ផ្គង់តាមតម្រូវការទីផ្សារ ក្នុងតម្លៃសមរម្យ។ ការណ៍នេះសំខាន់ណាស់, បើបងប្អូនអាចធ្វើបាននោះបងប្អូនពិតជាទទួលបាន ផលចំណេញច្រើន និងមានចំណូលចូលគ្រួសារ។
លោកលើកទឹកចិត្តដល់បងប្អូន ក្នុងករណីបងប្អូន ប្រជាកសិករ ឬបណ្តុំផលិត ណាម្នាក់ចង់បានឥណទាន ដើម្បីពង្រីកការដាំដុះ ឬពង្រីកខ្សែច្រវាក់ផលិតកម្មស្វាយចន្ទី បងប្អូនអាចស្នើសុំឥណទានពីធនាគារ ARDB បានក្នុងអត្រាការប្រាក់សមរម្យ និងអាចយកស្តុកគ្រាប់ស្វាយចន្ទីជាទ្រព្យធានា អាចទទួលបានរហូតដល់៧០% នៃតម្លៃគ្រាប់ស្វាយចន្ទីសរុប។
លោកបណ្ឌិតក៏បានសំណូមពរដល់ប្រជាកសិករទាំអស់ គួរសិក្សាពីបច្ចេកទេសឱ្យច្បាស់លាស់លើការដាំដុះ ការថែទាំ ដើម្បីបង្កើនការផលិត និងការកែច្នៃ ឲ្យស្របតាមសង់ដារចំណីអាហារ ដើម្បីលក់ទៅទីផ្សារផងដែរ នៅពេលទទួលបានឥណទានពីធនាគារ ARDB។
បន្ថែមលើនេះបណ្ឌិត កៅ ថាច ក៏បានអំពាវនាវផងដែរដល់បងប្អូនប្រជាពលរដ្ឋ ដែលមានសិទ្ធិបោះឆ្នោត សូមអញ្ជើញទៅបោះឆ្នោតជ្រើស តំាងតំណាងរាស្រ្ត នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗគ្នាកុំបីខាន៕
