(ភ្នំពេញ)៖ រោគាព្យាធិ ជារឿងដែលមនុស្សគ្រប់រូប មិនចង់ជួបមិនចង់ឃើញឡើយ។ ទោះបីមិនចង់ឃើញ មិនចង់ជួប ហើយប្រឹងចៀសយ៉ាងណាក្តី គ្រប់រូបកាយនៃជីវិតលើភពផែនដីនេះ មិនអាចចៀសផុតនោះឡើយ។
លីម រ៉ានុត ជាកុមារមួយរូបដែលត្រូវបានឪពុកម្តាយចិញ្ចឹមបីបាច់ឱ្យធំធាត់យ៉ាងល្អលើទឹកដីជនបទក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ។ ទោះបីជីវភាពគ្រួសារខ្សត់ខ្សោយ តែការធំធាត់ដោយគ្មានរោគធ្វើឱ្យកុមារា លីម រ៉ានុត នៅតែរស់ដោយក្តីរីករាយជាមួយក្រុមគ្រួសារ។
ជាអកុសលពីរឆ្នាំចុងក្រោយនេះ រ៉ានុត បានពើបប្រទះនឹងជំងឺបណ្តាលឱ្យរូបគេឈឺក្បាលជាប្រចាំ។ ពេលឈឺភ្លាមៗម្តាយ រ៉ានុត តែងទៅផ្សំថ្នាំបំបាត់ការឈឺចាប់ឱ្យលេប។ អាការៈដំបូងៗនៃជំងឺ ពេលលេបថ្នាំ ការឈឺចាប់នោះក៏បាត់។ ការលេបថ្នាំជួយបំបាត់ការឈឺចាប់មួយរយៈពេលខ្លីប៉ុណ្ណោះ មិនយូរប៉ុន្មានអាការៈនោះក៏កើតជាថ្មី។ ម្តាយ រ៉ានុត តែងធ្វើវិធីដដែលៗរាល់ពេលកូនឈឺក្បាល។
លុះរយៈពេលប្រមាណជាកន្លះខែចុងក្រោយការប្រើថ្នាំ ដើម្បីបំបាត់ការឈឺចាប់លែងមានប្រសិទ្ធភាពទៀតហើយ ហើយអាការៈជំងឺក៏កាន់តែធ្ងន់ធ្ងរ ធ្វើក្បាលកុមារា រ៉ានុត ឈឺកាន់តែខ្លាំង ភ្នែកខាងឆ្វេងក៏ស្រវាំង ហើយប្រទាញថែមទៀតផង។
បន្ទាប់ពីការលេបថ្នាំលែងមានប្រសិទ្ធភាព។ ម្តាយរបស់ រ៉ានុត ក៏បានបញ្ជូនរូបគេស្វែងរកការព្យាបាលនៅមន្ទីរពេទ្យគន្ធបុប្ផា ដែលជាមន្ទីរពេទ្យមនុស្សធម៌ព្យាបាលដោយមិនយកប្រាក់ កាលពីដើមខែមិថុនាកន្លងទៅនេះ។
ពេលទទួលបានលទ្ធផលនៃការពិនិត្យរបស់ក្រុមគ្រូពេទ្យជំនាញថា រ៉ានុត ដុះដុំសាច់ក្នុងខួរក្បាល ហើយជាដុំសាច់ដ៏ធំថែមទៀតនោះ បានធ្វើឱ្យម្តាយ ក៏ដូចជា រ៉ានុត មានអារម្មណ៍ស្រឡាំងកាំងភាំងអស់ស្មារតី។
ទោះបីជីវិតតែងរលុតទៅតាមដំណើរធម្មជាតិ ឬដោយសាររោគាព្យាធិចៀសមិនផុតយ៉ាងណាក្តី តែរាល់ជីវិតមនុស្សលើភពផែនដី តែងប្រាថ្នារស់ជួបជុំក្រុមគ្រួសារយូរអង្វែង។ លទ្ធផលជំងឺដែលរកឃើញដោយគ្រូពេទ្យ គឺជាជំងឺមួយគំរាមកំហែងដល់ជីវិត ជាហេតុនាំឱ្យ រ៉ានុត និងម្តាយ មានការភិតភ័យ និងព្រួយបារម្ភយ៉ាងខ្លាំង។
ជាសំណាងល្អមួយសម្រាប់កុមារា លីម រ៉ានុត ដែលនៅមន្ទីរពេទ្យគន្ធបុប្ផានាពេលបច្ចុប្បន្នគ្រូពេទ្យជំនាញ និងមានបរិក្ខារវេជ្ជសាស្ត្រទំនើបអាចផ្តល់សេវាសម្រាប់វះកាត់ជំងឺដុះដុំសាច់ក្នុងខួរក្បាល។ បន្ទាប់ពីសម្រាកក្នុងមន្ទីរពេទ្យមួយរយៈពេលខ្លី នៅថ្ងៃទី១៣ ខែមិថុនា កុមារា រ៉ានុត ក៏ទទួលបានការវះកាត់ពីក្រុមគ្រូពេទ្យជំនាញនៅមន្ទីរពេទ្យគន្ធបុប្ផា ប្រកបដោយការយកចិត្តទុកដាក់ខ្ពស់បំផុត។
លោកវេជ្ជបណ្ឌិត គង់ វុឌ្ឍី ឯកទេសខាងវះកាត់ប្រព័ន្ធប្រសាទ បានបម្រើការងារនៅមន្ទីរពេទ្យគន្ធបុប្ផាជាង ១០ឆ្នាំមកហើយ។ លោកវេជ្ជបណ្ឌិត បានគូសបញ្ជាក់ថា ការវះការប្រព័ន្ធប្រសាទ គឺជាការវះកាត់ដ៏លំបាកមួយ។
លោកវេជ្ជបណ្ឌិត បានអះអាងថា ការវះកាត់ដុំសាច់ក្នុងខួរក្បាលរបស់កុមារា រ៉ានុត បានប្រើពេលវេលារហូតដល់ទៅ៨ម៉ោង។ ការវះកាត់នេះទៀតសោត គឺមិនអាចសម្រាកហូបបាយ ឬទៅបន្ទប់ទឹកនោះឡើយ ពោលនៅពេលវះកាត់ គឺត្រូវវះកាត់រហូតរួចរាល់តែម្តង។ ទោះបីចំណាយពេលយូរយ៉ាងណាក្តី តែលោកវេជ្ជបណ្ឌិត គង់ វុឌ្ឍី និងក្រុមគ្រូពេទ្យវះកាត់ដទៃទៀត មានក្តីរីករាយ ដែលការវះកាត់ទទួលបានជោគជ័យ យកដុំសាច់អស់ពីក្នុងខួរក្បាល ហើយមិនប៉ះពាល់ដល់សរីរាង្គដទៃទៀតនោះឡើយ។
បន្ទាប់ពីការវះកាត់អស់រយៈពេលប្រមាណជាមួយសប្តាហ៍ កុមារា រ៉ានុត មានសុខភាពល្អប្រសើរឡើងវិញហើយ។ ភាពស្រពាប់ស្រពោន ក្តីព្រួយបារម្ភរបស់ឪពុកម្តាយ និងគ្រួសាររបស់កុមារា លីម រ៉ានុត បានប្រែមកជាស្រស់ថ្លា និងរីករាយវិញហើយ បន្ទាប់ពីដុំសាច់ដ៏ធំក្នុងខួរក្បាលរបស់កុមារារូបនេះ ត្រូវបានវះកាត់យកចេញដោយជោគជ័យ។
អ្នកស្រី សូ ស្រីមុំ ក៏ដូចជាកុមារា លី រ៉ានុត បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងគ្រូពេទ្យគន្ធបុប្ផាទាំងអស់ ដែលបានប្រឹងប្រែងអស់ពីលទ្ធភាពជួយសង្គ្រោះជីវិតរបស់ រ៉ានុត ពីជំងឺដ៏កាចសាហាវ ហើយជួយឱ្យជីវិត រ៉ានុត អាចបន្តរស់នៅជួបជុំឪពុកម្តាយ និងបានឃើញភពផែនដីដ៏ស្រស់បំព្រងនេះបន្តទៅទៀត។
បើទោះបីដុំសាច់ត្រូវបានវះកាត់យកចេញពីខួរក្បាលអស់យ៉ាងណាក្តី តែកុមារា លីម រ៉ានុត ត្រូវបន្តទទួលការព្យាបាលជាបន្តទៀត ដើម្បីធានាថា ដុំសាច់របស់គេមិនដុះឡើងវិញ។ ការបន្តព្យាបាលនេះ ក៏ដោយសារតែដុំសាច់ដែលយកចេញពីខួរក្បាលនោះ ត្រូវបានរកឃើញនោះ ជា «សាច់កាច» តម្រូវឱ្យមានការព្យាបាលបន្តដោយការចាក់ថ្នាំគីមី និងបច្ចេកទេសផ្សេងៗទៀត៕
