(សៀមរាប)៖ នាយឧត្តមសេនីយ៍​ មាស​ វិរិទ្ធ​ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន​កម្ពុជា បានបញ្ជាក់នៅក្នុង កិច្ចប្រជុំពង្រឹងកិច្ចសហប្រតិបត្តិការ ប្រយុទ្ធប្រឆាំង គ្រឿងញៀន​កម្ពុជា​-ថៃ លើកទី១០ឲ្យដឹងថា ភាគីថៃនឹងបញ្ជូនទីប្រឹក្សាការងារគ្រឿងញៀន មកប្រចាំការនៅស្ថានទូតព្រះរាជាណាចក្រថៃ ​នៅកម្ពុជា ដើម្បីទំនាក់ទំនងការងារ ជាមួយអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀននាពេលខាងមុខដ៏ឆាប់។

លោក មាស​ វិរិទ្ធ​ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន​ បានជួបពិភាក្សាការងារជាមួយ លោក សីុរីនយ៉ាសីុតឌីចៃ​ អគ្គលេខាធិការនៃក្រុមប្រឹក្សាត្រួតពិនិត្យ គ្រឿងញៀនថៃ​ នៅក្នុងកិច្ចប្រជុំពង្រឹងកិច្ចសហប្រតិបត្តិការប្រយុទ្ធប្រឆាំងគ្រឿងញៀន​កម្ពុជា​-ថៃ លើកទី១០ ​កាលពីព្រឹកថ្ងៃទី២៥ ខែកក្កដា ឆ្នាំ២០១៦។

នៅក្នុងកិច្ចប្រជុំនោះមានការចូលរួម ពីមន្រ្តីពាក់ព័ន្ធ សម្រាប់ភាគីកម្ពុជា មកពី ខេត្តបន្ទាយមានជ័យ​ បាត់ដំបង​ ប៉ៃលិន​ ឧត្តរមានជ័យ​ ព្រះវិហារ​ ខេត្តកោះកុង​ យោធភូមិភាគ៤​ និងភូមិភាគ៥​ និងភាគីថៃមានមកពីតំបន់២​ និងតំបន់៣ និងមន្រ្តីពាក់ពន្ធ័​ស្ថាប័នជាតិ ត្រួតពិនិត្យគ្រឿងញៀននៃប្រទេសទាំងពីរ​ និងតំណាងកំលាំង អនុវត្តច្បាប់ពីបណ្តាខេត្តជាប់ព្រំដែនជាច្រើនរូបទៀត។

ក្នុងឱកាសនោះ​ ​នាយឧត្តមសេនីយ៍​ មាស​ វិរិទ្ធ​ បានថ្លែងស្វាគមន៍​ និងថ្លែងអំណរគុណ ដល់ភាគីថៃដែលតែងតែជួយដល់ភាគីកម្ពុជា​ មានដូចជា​ ការងារកាត់បន្ថយគ្រោះថ្នាក់​ បានជួយបណ្តុះបណ្តាលមន្រ្តីកម្ពុជា​ពីការព្យាបាល​ និងស្តារនីតិសម្បទាអ្នកញៀនគ្រឿងញៀន​ និងការងារអនុវត្តច្បាប់​ បានធ្វើការបណ្តុះបណ្តាលមន្រ្តីការិយាល័យទំនាក់ទំនងព្រំដែន (BLO) កម្ពុជាលើការងារប្រយុទ្ធប្រឆាំងបទល្មើសជួញដូរគ្រឿងញៀន ឆ្លងកាត់ព្រំដែន​។ក្រៅពីនោះ ក៏មានការផ្តល់សម្ភារៈ​ មធ្យោបាយសម្រាប់បំរើការងារប្រយុទ្ធប្រឆាំងគ្រឿងញៀន មានទូកប្រដេញ​ ម៉ូតូ​ រថយន្ត និងពង្រឹងនិងបង្កើនសមត្ថភាពមន្រ្តីមន្ទីពិសោធន៍គ្រឿងញៀនផងដែរ។

ជាការឆ្លើយតប លោក ស៊ីរីនយ៉ាស៊ីតឌីចៃ​​ បានថ្លែងអំណរគុណដល់ភាគីកម្ពុជា ដែលបានផ្តល់កិច្ចសហការលើការងារ ប្រយុទ្ធប្រឆាំងគ្រឿងញៀនលើគ្រប់វិស័យ និងការផ្លាស់ប្តូរព័ត៌មាន នៃគម្រោងសុវត្ថិភាពតំបន់ទន្លេមេគង្គឈានទៅដល់ការបង្កាបង្រ្កាប​ និងដោះស្រាយបញ្ហាគ្រឿងញៀន​បានទាន់ពេល​ និងមានប្រសិទ្ធភាព​នៅប្រទេសថៃ ហើយភាគីថៃ នឹងបន្តពង្រឹងនូវ កិច្ចសហប្រតិបត្តិការឱ្យបានរឹងមាំ​ និងមានប្រសិទ្ធភាពបន្ថែមទៀត៕