(ចិន)៖ នៅក្នុងដំណើរទស្សនកិច្ចជិត១សប្តាហ៍ នៅខេត្តក្វាងស៊ី (Guangxi) ប្រទេសចិន ក្រុមប្រតិភូសារព័ត៌មានកម្ពុជា ៩ស្ថាប័ន ដែលក្នុងនោះមានទាំង តំណាងសារព័ត៌មាន Fresh News ផងដែរ កាលពីថ្ងៃទី១៦ ខែមិថុនា ឆ្នាំ២០២៣ បានបំពេញទស្សនកិច្ចនៅកំពង់ផែឆ្លាតវៃឈីងចូវ ដែលស្ថិតនៅក្នុងក្រុងឈីងចូវ (Qinzhou) ភាគខាងត្បូងខេត្តក្វាងស៊ី ប្រទេសចិន។
កំពង់ផែនេះ មានទំហំធំល្វឹងល្វើយ ហើយបានដំណើរការដោយប្រព័ន្ធបច្ចេកវិទ្យាថ្មី ជាមួយនឹងការប្រើប្រាស់កម្លាំងមនុស្សតិចតួចបំផុត។ វាជាកំពង់ផែឆ្លាតវៃដ៏ធំទី៧ នៅក្នុងប្រទេសចិន ដែលដំណើរការដោយប្រព័ន្ធបច្ចេកវិទ្យាទំនើបចុង AI ដោយឧបករណ៍ស្ទូចកង់តឺន័រ និងរថយន្តដឹកកុងតឺន័រ គ្មានមនុស្សបេីកបរនោះទេ រាល់ការលើកដាក់ទំនិញ អ្វីៗត្រូវបានបញ្ជា និងត្រួតពិនិត្យដោយស្វ័យប្រវត្តិពីចម្ងាយ។ កំពង់ផែនេះ បានចម្លងទំនិញពីនាវាចេញពីសមុទ្រចិនភាគីខាងត្បូង បញ្ចូលទៅតាមរថភ្លើងដឹកទៅកាន់តំបន់នានា នៅក្នុងប្រទេសចិន និងដឹកទៅកាន់តំបន់មួយចំនួននៅលើពិភពលោកផងដែរ។
កំពង់ផែវៃឆ្លាតមួយនេះ គឺប្រេីប្រាស់នៅប្រព័ន្ធទំនេីបមានដូចជា៖ AI ,GPS, សាកថ្ម និងត្រីវិស័យជាដើម ក្នុងការដឹកជញ្ជូនទំនិញទាំងនោះ មិនតែប៉ុណ្ណោះអ្វីដែលកាន់តែអស្ចារ្យនោះ គឺរថយន្តដឹកទំនិញស្វ័យប្រវត្តិពុំបានប្រើប្រាស់ប្រេងឥន្ធនៈនោះឡើយ គឺប្រើប្រាស់ថ្ម ដែលអាចបញ្ចូលថាមពលដោយខ្លួនឯងតែម្តង។
គួរបញ្ជាក់ដែរថា កំពង់ផែវៃឆ្លាតនេះ អាចផ្ទុកទំនិញបាន ២លាន៦០ម៉ឺនតោន ហើយមានបុគ្គលិកត្រឹមតែប្រមាណ២០០នាក់ប៉ុណ្ណោះ។ កំពង់ផែ អាចទទួលការចូលចតរបស់នាវាដឹកទំនិញទម្ងន់ចាប់ពី ១០ទៅ២០ម៉ឺនតោន។
បើតាមតំណាងកំពង់ផែ បានឱ្យដឹងថា កំពង់ផែនេះទើបនឹងបំពាក់ដោយប្រព័ន្ធបច្ចេកវិទ្យាឆ្លាតវៃ រយៈពេល២ឆ្នាំប៉ុណ្ណោះ ដែលធ្វើឱ្យក្រុមហ៊ុនចំណេញកើនលើសទ្វេដងពីកំពង់ផែបុរាណ ដោយសារតែការប្រើប្រាស់កម្លាំងពលកម្មតិចតួច ហើយបុគ្គលិកដែលធ្វើការនៅកំពង់ផែនេះ ភាគច្រើនជាយុវជន ដែលបញ្ចប់ថ្នាក់សិក្សាចាប់ពីបរិញ្ញាបត្រឡើង។
សូមបញ្ជាក់ថា ប្រតិភូសារព័ត៌មានកម្ពុជា៩ស្ថាប័ន ដែលដឹកនាំដោយ លោក ផ្លុង វិចិត្រ បានបំពេញទស្សនកិច្ច រយៈពេល៦ថ្ងៃ នៅខេត្តក្វាងស៊ី ប្រទេសចិន ដើម្បីពង្រឹង និងពង្រីកទំនាក់ទំនង និងកិច្ចសហការប្រតិបត្តិការរវាងអ្នកសារព័ត៌មានប្រទេសទាំងពីរ។
ទស្សនកិច្ចនេះធ្វើឡើង ចាប់ពីថ្ងៃទី១៥ ដល់ថ្ងៃទី២០ ខែមិថុនា ឆ្នាំ២០២៣ ដែលរៀបចំឡើងក្រោមកិច្ចសហការគ្នារវាងកាសែត The Commercial News និង Cambodia Guangxi Cloud ASEAN International Communication Station ដែលជាអង្គភាពចំណុះ Guangxi Daily៕
