(ភ្នំពេញ)៖ បុរសពិការដៃទាំងសងខាងដោយសារតែឆក់ខ្សែភ្លើង ចំណែកប្រពន្ធមានផ្ទៃពោះ៧ខែ រស់នៅក្នុងខ្ទមកំសត់ រស់នៅជួបការលំបាក រកមុខខ្វះក្រោយ ជាងគ្មានព្យាបាលព្យាបាលជំងឺ ថែមទាំងបារម្ភអំពីបញ្ហាកូនរៀនសូត្រផងនោះ ពេលនេះទទួលបានការជួយឧបត្ថម្ភជាស្បៀងឧបភោគបរិភោគ សម្ភារៈផ្សេងៗ រួមទាំងថវិកាចំនួន ៥លានរៀល ពីសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
ក្នុងឱកាស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ឱ្យមន្ត្រីក្រោមឱវាទ ចុះសួរសុខទុក្ខ និងនាំយកអំណោយមនុស្សធម៌ជាគ្រឿងឧបភោគបរិភោគ សម្ភារៈប្រើប្រាស់ និងថវិកាចំនួន ៥លានរៀល ជូនដល់ប្តីប្រពន្ធវ័យក្មេងលំបាកក្រីក្រ ១គ្រួសារ នៅថ្ងៃទី ២០ ខែមិថុនា ឆ្នាំ២០២៣ ដែលលោក ប៉ុន ពិសី អាយុ ៣៣ឆ្នាំ មុខរបរជាជាងផ្សារដែក រងគ្រោះដោយខ្សែភ្លើងឆក់ធ្ងន់ធ្ងរពេលកំពុងផ្សារដែក បណ្តាលឱ្យដាច់ដៃទាំងសងខាង និងពឹងផ្អែកលើភរិយាឈ្មោះ សួន ចាន់រី អាយុ ២៦ឆ្នាំ មុខរបរជាកម្មការិនីរោងចក្រ ជាអ្នកមើលថែទាំ ហើយកំពុងមានផ្ទៃពោះ ៧ខែ រស់នៅក្នុងខ្ទមកម្សត់ ដែលសង់លើដីឪពុកចែកឱ្យ ស្ថិតក្នុងភូមិត្រពាំងថ្ម ឃុំស្រង់ ស្រុកគងពិសី ខេត្តកំពង់ស្ពឺ។
ក្នុងឱកាសនោះ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខ ក្តីអាណិតអាសូរ និងការគិតគូរពីជីវភាពរស់នៅរបស់គ្រួសារក្មួយៗ។ លោកស្រីបានបញ្ជាក់ថា «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បន្ទាប់ពីបានឃើញព័ត៌មានអំពីករណីដ៏លំបាកមួយនេះ សម្តេចកិត្តិព្រឹទ្ធបណ្ឌិត មានក្តីអាណិតអាសូរជាពន់ពេក ហើយបានចាត់ឱ្យក្រុមការងារចុះភ្លាមៗដើម្បីជួយសម្រាលការលំបាកក្នុងជីវភាព និងជាការលើកទឹកចិត្តឱ្យខិតខំតស៊ូប្រឹងប្រែងតទៅមុខទៀតដើម្បីជីវភាពគ្រួសារ និងអនាគតរបស់កូនៗ»។
លោកស្រីក៏បានផ្តាំផ្ញើឱ្យថែទាំសុខភាពឱ្យបានល្អ រស់នៅមានអនាម័យស្អាត និងបន្តព្យាបាលមុខរបួសឱ្យឆាប់ជាសះស្បើយ។ ចំណែកឯក្មួយស្រី ត្រូវថែទាំសុខភាពផ្ទាល់ខ្លួន ត្រូវទៅពិនិត្យផ្ទៃពោះឱ្យបានទៀងទាត់ និងត្រូវទៅសម្រាលកូននៅមណ្ឌលសុខភាពដែលនៅជិត ដើម្បីសុវត្ថិភាពទាំងម្តាយនិងកូន។
ប្ដីប្រព្ធក្រខ្សត់នេះបានសម្តែងនូវក្តីរំភើបក្តុកក្តួលស្រក់ទឹកភ្នែក និងថ្លែងអំណរគុណយ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាមាតាមនុស្សធម៌ បានគិតគូរ និងលើកទឹកចិត្តឱ្យមានក្តីសង្ឃឹមតទៅមុខទៀត រួមជាមួយអំណោយមនុស្សធម៌ជួយសម្រាលការលំបាកក្នុងជីវភាព ដែលកំពុងជួបប្រទះចំពោះមុខមានដូចជា អង្ករ មី ត្រីខ មុង ភួយ សារុង ក្រមា សម្ភារៈចានឆ្នាំង និងថវិកា ៥លានរៀលទៀតផង។
បន្ទាប់ពីកម្មវិធីខាងលើនេះ លោកស្រី ម៉ែន នារីសោភ័គ និងសហការី រួមជាមួយក្រុមការងារសាខាកាកបាទក្រហមកម្ពុជា ខេត្តកំពង់ស្ពឺ ក៏បានអញ្ជើញជួបសំណេះសំណាលសួរសុខទុក្ខ និងចែកអំណោយជូនដល់លោកយាយឥតទីពឹងចំនួន ៦នាក់ ដែលក្នុងម្នាក់ៗទទួលបាន អង្ករ មី ត្រីខ មុង ភួយ សារុង ក្រមា ឈុតសម្លៀកបំពាក់ថ្មី និងថវិកាមួយចំនួន។
លោកយាយទាំងអស់គ្នា មានក្តីរំភើបរីករាយ និងថ្លែងអំណរគុណចំពោះកាកបាទក្រហមកម្ពុជា ក្រោមការដឹកនាំរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសូមជូនពរសម្តេចកិត្តិព្រឹទ្ធបណ្ឌិត និងសម្តេចតេជោ ហ៊ុន សែន នាយករដ្ឋមន្ត្រី មានសុខភាពល្អ អាយុយឺនយូរ ដើម្បីបន្តដឹកនាំប្រទេសជាតិតរៀងទៅ៕
