(កំពង់ឆ្នាំង)៖ នាយឧត្តមសេនីយ៍ សឹង សំណាង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងអាកាស បានគូសរំលេចថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានសមាគមអតីតយុទ្ធជន ចងចាំជាប់ជានិច្ចនូវគុណបំណាច់ និងការលះបង់ដ៏ធំធេងរបស់អតីតយុទ្ធជនក្នុងបុព្វហេតុជាតិមាតុភូមិ និងប្រជាជនកម្ពុជា។
នាយឧត្តមសេនីយ៍ សឹង សំណាង បានគូសបញ្ជាក់បែបនេះ ក្នុងឱកាសអញ្ជើញបំពាក់គ្រឿងឥស្សរិយយសជូនអតីតយុទ្ធជន និងគ្រួសារពលីនៅស្រុកកំពង់លែង ខេត្តកំពង់ឆ្នាំង នាព្រឹកថ្ងៃទី២១ ខែមិថុនា ឆ្នាំ២០២៣នេះ ដែលជាទិវាអតីតយុទ្ធជនកម្ពុជាលើកទី១៦។ ក្នុងពិធីនាព្រឹកមិញនេះ ក៏មានការអញ្ជើញចូលរួមពីលោកឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំងផងដែរ។
នៅក្នុងពិធីនោះនាយឧត្តមសេនីយ៍ សឹង សំណាង បានថ្លែងកោតសរសើរយ៉ាងជ្រាលជ្រៅចំពោះវីរភាពរបស់អតីតយុទ្ធជន ក្នុងការចូលរួមរំដោះប្រទេសជាតិ និងទប់ស្កាត់របបប្រល័យពូជសាសន៍ ប៉ុល ពត មិនឱ្យវិលត្រឡប់មកវិញមកវិញ។
នាយឧត្តមសេនីយ៍ សឹង សំណាង បានចាត់ទុកការលះបង់របស់អតីតយុទ្ធជនទាំងអស់ គឺជាគុណបំណាច់ដ៏ធំធេងពុំអាចកាត់ថ្លៃបាននោះឡើយ។
នាយឧត្តមសេនីយ៍ សឹង សំណាង បានថ្លែងនៅចំពោះអតីតយុទ្ធជន ១៦៨នាក់ ដែលទទួលបានការបំពាក់គ្រឿងឥស្សរិយយសយ៉ាងដូច្នេះថា «ក្នុងនាមយើងទាំងអស់គ្នា ដែលកំពុងរស់រៀនមានជីវិតក្នុងបរិយាកាសសន្តិភាព មានការដឹងគុណ និងសូមថ្លែងអំណរគុណចំពោះអតីតយុទ្ធជន និងគ្រួសារអតីតយុទ្ធជនទាំងអស់ ចំពោះការលះបង់ដ៏ថ្លៃថ្លា និងប្រកបដោយកិត្តិយស»។
នាយឧត្តមសេនីយ៍ សឹង សំណាង ក៏បានលើកបង្ហាញពីការយកចិត្តទុកដាក់របស់រាជរដ្ឋាភិបាល ជាពិសេសសម្តេចតេជោ ហ៊ុន សែន។ ដើម្បីការរស់នៅបានសមរម្យសមនឹងគុណបំណាច់ដែលអតីតយុទ្ធជនបានធ្វើចំពោះជាតិនោះ សម្តេចតេជោ និងសម្តេចកិត្តិព្រឹទ្ធបណ្ឌិត បានគិតគូរខ្ពស់ចំពោះអតីតយុទ្ធជន ដោយមានការផ្តល់ប្រាក់សោធននិវត្តន៍ និងផ្តល់របបគោលនយោបាយជាដី និងផ្ទះជូនអតីតយុទ្ធជន និងគ្រួសារថែមទៀតផង។
តាមរយៈកាយវិការទាំងនេះ គឺបានឆ្លុះបញ្ចាំងឱ្យឃើញយ៉ាងច្បាស់ពីការគិតគូរ និងការយកចិត្តទុកដាក់របស់រាជរដ្ឋាភិបាល របស់សម្តេចតេជោ ចំពោះអតីតយុទ្ធជន។
លោក សឹង សំណាង ក៏បានលើកឡើងផងដែរថា ក្រោមការដឹកនាំរបស់គណបក្សប្រជាជនកម្ពុជា កងទ័ពជាកម្លាំងប្រតិបត្តិករដ៏សំខាន់ក្នុងការអនុវត្តគោលនយោបាយឈ្នះ-ឈ្នះ នាំមកនូវការបញ្ចប់សង្គ្រាម និងការបង្រួបបង្រួមជាតិពេញលេញ។
នាយឧត្តមសេនីយ៍មេបញ្ជាការកងទ័ពអាកាស ក៏បានរំលឹកពីប្រវត្តិតស៊ូរបស់សម្តេចតេជោ ហ៊ុន សែន អគ្គមគ្គុទ្ទេសក៍ឯក និងជាមេដឹកនាំដែលបានលះបង់ខ្ពស់ ហ៊ានធ្វើពលីកម្មសព្វបែបយ៉ាង ដើម្បីការរស់រៀនរបស់ប្រជាពលរដ្ឋខ្មែរ។
ក្នុងឱកាសនោះនាយឧត្តមសេនីយ៍ បានធ្វើការប្រៀបធៀបពីស្ថានភាពនានាពាក់ព័ន្ធសន្តិភាព និងសង្គ្រាមដែលប្រទេសមួយចំនួនក្នុងតំបន់បាននិងកំពុងមានសង្គ្រាមវិនាសកម្មដ៏អាក្រក់ជាទីបំផុត។ ផ្ទុយពីនៅកម្ពុជាដែលជាប្រទេសធ្លាប់បានរងគ្រោះពីគំនរផេះផង់ នៃសង្គ្រាមរ៉ាំរ៉ៃ តែឥឡូវជាប្រទេស មានមុខមាត់លើឆាកជាតិ និងអន្តរជាតិប្រកបដោយភាពជឿជាក់ និងមោទនភាពក្រៃលែងនៅក្នុង ខណៈកម្ពុជាបានធ្វើជាម្ចាស់ផ្ទះរៀបចំកិច្ចប្រជុំអាស៊ាន និងការរៀបចំកីឡាស៊ីហ្គេម និងប៉ារ៉ាហ្គេម នៅពេលកន្លងមកនេះ ។
សូមបញ្ជាក់ថា ក្នុងពិធីអបអរសាទរខួបលើកទី១៦ ទិវាសមាគមអតីតយុទ្ធជនកម្ពុជានៅស្រុកកំពង់លែងនាព្រឹកមិញនេះ នាយឧត្តមសេនីយ៍ សឹង សំណាង បានបំពាក់គ្រឿងឥស្សរិយយការពារជាតិ ជូនអតីតយុទ្ធជន និងគ្រួសាពលីចំនួន ១៦៨នាក់។ ក្នុងនោះគ្រឿងឥស្សរិយយសថា្នក់មាសចំនួន១០ និងគ្រឿងឥស្សរិយយសថ្នាក់ប្រាក់ចំនួន ១៥៨៕
