(ក្រចេះ)៖ រថយន្តដឹកទំនិញមួយគ្រឿង បានបុកបុរសម្នាក់កំពុងជិះម៉ូតូតាមផ្លូវ បណ្ដាលឲ្យស្លាប់បាត់បង់ជិវិត ខណៈពេលបញ្ជូនទៅសង្គ្រោះនៅមន្ទីរពេទ្យបង្អែក ខេត្តក្រចេះ។ ហេតុការណ៍ គ្រោះថ្នាក់ចរាចរណ៍នេះ បានកើតឡើងកាលពីល្ងាចថ្ងៃទី១៧ ខែឧសភា ឆ្នាំ២០២៣ នៅលើផ្លូវជាតិលេខ៧ ត្រង់ចំណុចទូទ្រាំង ភូមិអូរគ្រៀង ឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ ។

ប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ គេឃើញម៉ូតូមួយគ្រឿង បើកបរដោយបុរសវ័យកណ្ដាលម្នាក់ កំពុងបើកបរក្នុងទិសដៅពីជើងទៅត្បូង លុះដល់ចំណុចកើតហេតុស្រាប់តែ រថយន្តដឹកទំនិញបើកមកបុកពេញទំហឹង ក្នងទិសដៅបញ្រ្ចាសទិសគ្នា បណ្ដាលឲ្យបុរសអ្នកបើកបរម៉ូតូ បានស្លាប់ខណៈពេលបញ្ជូនទៅសង្គ្រោះនៅមន្ទីរពេទ្យ។

សមត្ថកិច្ចមូលដ្ឋាន បានបញ្ជាក់ថា រថយន្តបង្កម៉ាកកូរ៉េ ពណ៌ស ភ្នំពេញ 2BN:9353 អ្នកបើកបរមិនស្គាល់អត្តសញ្ញាណត្រូវបានរត់គេចខ្លួន ដោយឡែក ជនរងគ្រោះឈ្មោះ ពៅ ព័ន្ធ ភេទប្រុស អាយុ៤៣ឆ្នាំ
បើកបរម៉ូតូម៉ាក់ហុងដាឌ្រីម ពណ៌ខ្មៅ ពាក់ផ្លាកលេខ ក្រចេះ1G:3469មានទីលំនៅភូមិសង្គម ឃុំសណ្ដាន់ ស្រុកសំបូរ ខេត្តក្រចេះ។

វត្ថុតាងត្រូវបានសមត្ថកិច្ច នាំយកទៅរក្សាទុកនៅប៉ុស្តិ៍នគរបាលរដ្ឋបាលអូរគ្រៀង ជាបណ្តោះអាសន្ន ដើម្បីរង់ចាំដោះស្រាយ៕