(កំពង់ចាម)៖ គុណសម្បត្តិដឹកនាំ និងសមិទ្ធផលដ៏មហាសាលក្រោមការដឹកនាំរបស់គណបក្សប្រជាជនកម្ពុជា ធ្វើឱ្យប្រជាពលរដ្ឋគាំទ្រ ស្រឡាញ់ចូលចិត្ត និងបានចូលរួមធ្វើសកម្មភាពនយោបាយ ដើម្បីបក្សទទួលបានការគាំទ្រកាន់តែខ្លាំងក្លាថែមទៀត។
ជាក់ស្តែងនាព្រឹកថ្ងៃទី១៨ ខែមិថុនា ឆ្នាំ២០២៣ គណបក្សប្រជាជនកម្ពុជាស្រុកបាធាយ ខេត្តកំពង់ចាម បានរៀបចំបញ្ចូលសមាជិក សមាជិកាថ្មី នៅក្នុងឃុំបាធាយចំនួន ១,៩២៦នាក់ទៀត។ តាមរយៈសមាជិកថ្មីជិត ២ពាន់នាក់នេះ ធ្វើឱ្យគណបក្សប្រជាជនកម្ពុជា ក្នុងឃុំបាធាយ ស្រុកបាធាយ មានភាពរឹងមាំកាន់តែខ្លាំងឡើង។
ពិធីប្រកាសបញ្ចូលសមាជិកថ្មីក្នុងឃុំបាធាយ ប្រព្រឹត្តទៅក្រោមអធិបតីភាព លោក ប៉ាន សូរស័ក្តិ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានស្រុកព្រៃឈរ និងស្រុកបាធាយ ខេត្តកំពង់ចាម។
ក្នុងពិធីនោះ លោក ប៉ាន សូរស័ក្តិ បានពាំនាំនូវការផ្ដាំផ្ញើការសួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលលោកទាំងពីរតែងតែគិតគូរពីសុខទុក្ខរបស់ប្រជាពលរដ្ឋ។
លោកប្រធានក្រុមការងារ បានសម្ដែងការអបអរសាទរយ៉ាងកក់ក្តៅ ចំពោះការសម្រេចចិត្តក្នុងការចូលជាសមាជិកគណបក្សប្រជាជនកម្ពុជារបស់បងប្អូនទាំងអស់គ្នានាថ្ងៃនេះនិងបានថ្លែងថា ការសម្រេចចិត្តចូលជាសមាជិកគណបក្សប្រជាជនកម្ពុជានេះ គឺជាការសម្រេចចិត្តដ៏ត្រឹមត្រូវមួយ ដែលបងប្អូនបានមើលឃើញពីពលីកម្មមិនគិតពីអាយុជីវិតផ្ទាល់ខ្លួន ជួយសង្គ្រោះប្រជាជនកម្ពុជាពីរបបប្រល័យពូជសាសន៍ពីសង្គ្រាមស៊ីវិលរ៉ាំរ៉ៃ ពីជំងឺឆ្លងដ៏កាចសាហាវកូវីដ-១៩។ ម្យ៉ាងទៀត គណបក្សប្រជាជនកម្ពុជា គឺជាគណបក្សធំ និងចំណាស់ជាងគេនៅកម្ពុជា ដែលមានអាយុរហូតដល់ ៧២ឆ្នាំ បើគិតមកដល់ថ្ងៃទី២៨ ខែមិថុនា ឆ្នាំ២០២៣ខាងមុខនេះ ជាមួយនឹងបទពិសោធន៍ និងប្រវត្តិតស៊ូ រួមសុខរួមទុក្ខជាមួយប្រជាជនកម្ពុជា, មានឧត្តមគតិស្នេហាជាតិ មានគោលនយោបាយច្បាស់លាស់ ដោយប្រតិបត្តិតាមគោលការណ៍លទ្ធិប្រជាធិបតេយ្យ ផ្អែកតាមគោលការណ៍គ្រឹះ «គណបក្សប្រជាជនកម្ពុជា គឹជាគណបក្សរបស់ប្រជាជន បង្កើតឡើងដោយប្រជាជន និងដើម្បីប្រជាជន» ព្រមទាំងបានអនុវត្តកម្មវិធីនយោបាយរបស់ គណបក្សបានយ៉ាងខ្ជាប់ខ្ជួនរហូតសម្រេចបានសមិទ្ធិផលធំៗជាប្រវត្តិសាស្ត្រយ៉ាងច្រើនជូនជាតិមាតុភូមិ តួយ៉ាង ដូចជា ការនាំមកនូវសុខសន្តិភាព និងការអភិវឌ្ឍលើគ្រប់វិស័័យ ធ្វើឱ្យកិត្យានុភាពកម្ពុជាស្មើមុខមាត់ ល្បីរន្ទឺពេញពិភពលោក តាមរយៈភាពជោគជ័យលេចធ្លោរបស់កម្ពុជា រួមមានជាអាទិ៍ ភាពជោគជ័យនៃការប្រយុទ្ធឈ្នះជំងឺកូវីដ-១៩ និងការពុះពារដោះស្រាយផលវិបាកសង្គមបង្កឡើងដោយជំងឺកូវីដ-១៩ ដែលនាំសង្គមជាតិមកកាន់ប្រក្រតីភាពធម្មតាឡើងវិញដូចសព្វថ្ងៃ, ជោគជ័យដ៏ត្រចះត្រចង់ក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន, ជោគជ័យក្នុងការរៀបចំកម្មវិធីអង្គរសង្ក្រាន្តនៅទូទាំងប្រទេស, ជោគជ័យជាប្រវត្តិសាស្រ្តក្នុងការធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ព្រឹត្តិការណ៍ប្រកួតកីឡាជនពិការអាស៊ាន លើកទី១២ ឆ្នាំ២០២៣ ដោយទទួលបានមេដាយជាច្រើនពុំធ្លាប់មាន និងការរក្សារបាននូវលំនឹងសេដ្ឋកិច្ច ពាណិជ្ជកម្ម និងនយោបាយ ក៏ដូចជាការទប់ទល់បញ្ហាប្រឈមដទៃទៀតដែលបង្កដោយវិបត្តិសកលនៃការប្រែប្រួលអាកាសធាតុ ការប្រជែងដណ្តើមភូមិសាស្រ្តនយោបាយ និងការអូសបន្លាយនៃសង្គ្រាមអ៊ុយក្រែន។ល។
ប្រធានក្រុមការងារ បន្តថា ជោគជ័យទាំងអស់នេះ គឺបានមកពីការខិតខំប្រឹងប្រែងលះបង់កម្លាំងកាយ កម្លាំងចិត្ត ពេលវេលា និងក្នុងស្មារតីតម្កល់ផលប្រយោជន៍គណបក្ស និងជាតិជាធំ ពីសំណាក់ថ្នាក់ដឹកនាំគណបក្សគ្រប់ជាន់ថ្នាក់ ជាពិសេសក្រោមការចង្អុលបង្ហាញពីអគ្គមគ្គុទេសដ៏ឆ្នើមរបស់សម្តេចតេជោ ហ៊ុន សែន ប្រធានគណបក្សដែលតែងតែយកចិត្តទុកដាក់លើសុខទុក្ខរបស់សមាជិក សមាជិកាទាំងអស់ផ្ដល់ការបណ្តុះបណ្តាលធនធានយុវជនជំនាន់ក្រោយ និងបណ្តុះទឹកចិត្តឱ្យមានស្មារតីស្នេហាជាតិ ស្រលាញ់សន្តិភាព និងមានឆន្ទៈកសាងប្រទេសជាតិពិតប្រាកដ។
ឆ្លៀតក្នុងឱកាសនោះ លោកប្រធានក្រុមការងារ បានផ្ដាំផ្ញើដល់សមាជិកថ្មីចំនួន ១,៩២៦នាក់ ដែលទើបធ្វើពិធីបញ្ចូលថ្មីនេះ សូមយកចិត្តទុកដាក់ស្វែងយល់ពីភារកិច្ចរបស់សមាជិកគណបក្ស ដែលមាត្រាទី៧ ជំពូកទី៣ នៃលក្ខន្តិកៈគណបក្សប្រជាជនកម្ពុជាបានកំណត់ច្បាស់ មានភារកិច្ច៤ ត្រូវអនុវត្ត គឺ៖ ១- ត្រូវខិតខំប្រតិបត្តិឱ្យបានត្រឹមត្រូវ តាមកម្មវិធីនយោបាយ និងលក្ខន្តិកៈរបស់គណបក្ស, ២- ធ្វើជាប្រជាជនល្អ ជាសមាជិក សមាជិកាល្អរបស់គណបក្ស និងឃោសនាផ្សព្វផ្សាយពីកម្មវិធីគោលនយោបាយរបស់បក្ស ច្បាប់របស់រដ្ឋដល់ប្រជាជន (ប្រជាជនល្អ ពលរដ្ឋល្អ គឺធ្វើជាគំរូក្នុងការគោរពច្បាប់ និងមិនប្រព្រឹត្តរាល់អំពើ ឬសកម្មភាពដែលច្បាប់ហាមឃាត់ ពោល គឺមិនត្រូវល្មើសច្បាប់ដាច់ខាត), ៣- ថែរក្សាធ្លុងសាមគ្គីឯកភាពផ្ទៃក្នុង ជានិច្ចកាលជួយគ្នាទៅវិញទៅមកដើម្បីការរីកចម្រើន, និង៤- ត្រូវខិតខំរៀនសូត្រលើកកម្ពស់សមត្ថភាព និងគុណធ៌មដើម្បីសម្រេចភារកិច្ចជូនជាតិមាតុភូមិ។ ភារកិច្ចទាំង ៤នេះ ជាភារកិច្ច សមាជិកគណបក្សត្រូវរួមគ្នាអនុវត្ត ដើម្បីគណបក្សប្រជាជនកម្ពុជា ដើម្បីសង្គមកម្ពុជា និងដើម្បីឱ្យក្លាយពលរដ្ឋល្អ គ្រប់ៗគ្នា។
លោកប្រធានក្រុមការងារ បានសម្ដែងនូវការគាំទ្រយ៉ាងពេញទំហឹងចំពោះ សម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រី សម្រាប់នីតិកាលទី៧ នៃរដ្ឋសភា ឆ្នាំ២០២៣ និងគាំទ្រលោកបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រី សម្រាប់ពេលអនាគត ព្រមទាំងបានសម្តែងនូវការគាំទ្រចំពោះសារនយោបាយរបស់សម្តេចតេជោ គឺ «អរគុណសន្តិភាព» ដែលមានតម្លៃមិនសាបសូន្យ ព្រោះថាបើគ្មានសន្តិភាពទេនោះ យើងនឹងត្រូវបាត់បង់អ្វីៗទាំងអស់ ហេតុនេះយើងទាំងអស់គ្នា ត្រូវប្តេជ្ញាចិត្តចូលរួមក្នុងការការពារសន្តិភាព ឱ្យរឹងមាំស្ថិតស្ថេរគង់វង្សជានិច្ច តាមរយៈការទៅចូលរួមបោះឆ្នោតនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗគ្នា ហើយត្រូវបោះឆ្នោតជូនគណបក្សប្រជាជនកម្ពុជា ដែលមាន លេខរៀងទី១៨ និងមានរូបសញ្ញាទេវតាបាចផ្កាជាសម្គាល់ ដើម្បីរក្សាសុខសន្តិភាព ការអភិវឌ្ឍ និងភាពរីកចម្រើនបន្តទៀត។
សូមជម្រាបជូនថា ក្នុងកម្មវិធីបញ្ជូលសមាជិកថ្មីនេះ លោក ប៉ាន សូរស័ក្តិ ប្រធានក្រុមការងារ បានឧបត្ថម្ភថវិកាមួយចំនួនជូនសមាជិក-សមាជិកគណបក្សឃុំបាធាយដែលទើបបានបញ្ចូលថ្មី ចំនួន ១,៩២៦នាក់ ក្នុងម្នាក់ៗទទួលបានថវិកា ២ម៉ឺនរៀល, អចិន្ត្រៃយ៍ សមាជិកគណៈកម្មាធិការគណបក្សស្រុក យុវជនបក្សស្រុក ប្រធានគណៈកម្មាធិការគណបក្សឃុំ ចំនួន ៣៤នាក់ ក្នុងម្នាក់ៗទទួលបានថវិកា ២ម៉ឺនរៀល, កងកម្លាំងទាំង ៣ប្រភេទ ចំនួន ៣០ម៉ឺនរៀល និងក្រុមគ្រូពេទ្យ ១០ម៉ឺនរៀល៕
