(បាត់ដំបង)៖ លោក កែវ រ៉េមី សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានឃុំរកា និងឃុំកំពង់ព្រៀង នៅព្រឹកថ្ងៃទី១៧ ខែមិថុនា ឆ្នាំ២០២៣នេះ បានអញ្ជើញជាអធិបតី ក្នុង ពិធីកាត់ខ្សែបូសម្ពោធទីស្នាក់ការគណបក្សប្រជាជនកម្ពុជា ឃុំកំពង់ព្រៀង។
ពិធីនេះមានការចូលរួមពីអភិបាលរងស្រុកសង្កែ គណកម្មាធិការបក្សឃុំ ក្រុមប្រឹក្សាឃុំ មេឃុំ មេភូមិ មេប៉ុស្ដិ៍ សកម្មជនយុវជន សមាជិកបក្ស ប្រជាការពារ និងប្រជាពលរដ្ឋ សរុប ៣០៨នាក់។
អគារថ្មីនៃទីស្នាក់ការគណបក្សឃុំកំពង់ព្រៀង ជាអគារមួយជាន់ មានកំពស់៨ម៉ែត្រ ទទឹង៧,៣០ម៉ែត្រ បណ្តោយ១២,៤០ម៉ែត្រ មានស្លាបសងខាង១ម៉ែត្រ សាងសង់ពីបេតុង ប្រក់ក្បឿង និងមានឃ្លាំងដាក់សម្ភារៈ និងបន្ទប់ដាច់ដោយឡែក។
ការសាងសង់អគារទីស្នាក់ការបក្សថ្មីនេះ ដោយសារអគារចាស់ដែលសាងសង់តាំងពីឆ្នាំ១៩៩៧ មានស្ថានភាពទ្រុឌទ្រោម ទំហំតូចចង្អៀត លិចទឹក ដែលមិនឆ្លើយតបក្នុងការបំពេញតម្រូវការការងាររបស់គណបក្សឃុំនាពេលបច្ចុប្បន្ន។
បន្ទាប់ពីទទួលបានការអនុញ្ញាតពីគណៈកម្មាធិការគណបក្សស្រុកសង្កែ កាលពីថ្ងៃទី២៤ ខែមករា ឆ្នាំ២០២៣ ការសាងសង់អគារថ្មីទាំងស្រុងបានចាប់ផ្ដើមនៅខែកុម្ភៈ ឆ្នាំ២០២៣ ដោយមានការចាក់ដីបន្ថែមផងដែរ ហើយរហូតមកដល់ពេលនេះសម្រេចបានស្ទើរតែ១០០% ដោយនៅសេសសល់ផ្នែកពិដាន បន្ទប់ទឹក និងឃ្លាំងតែប៉ុណ្ណោះ។ ការសាងសង់បានចំណាយរយៈពេល ៤ខែកន្លះ និងថវិកាប្រមាណជិត ៤០,០០០ដុល្លារ។
ការសាងសង់នេះធ្វើឡើងក្រោមការដឹកនាំ និងចង្អុលបង្ហាញរបស់លោក កែវ រ៉េមី តាមរយៈគណៈកម្មាធិការគណបក្សឃុំកំពង់ព្រៀង ដោយមានការដឹកនាំផ្ទាល់ពីលោក ខៀវ តុលា និងមានការចូលរួមយ៉ាងសស្រាក់សស្រាំពីក្រុមការងារគណបក្សចុះមូលដ្ឋានឃុំកំពង់ព្រៀងទាំងអស់។
ក្នុងឱកាសនោះ លោកកែវ រ៉េមី បានសម្ដែងនូវការដឹងគុណថ្នាក់ដឹកនាំគណបក្សប្រជាជនកម្ពុជា ដែលមានសម្ដេចតេជានាយករដ្ឋមន្ត្រីជាប្រធានបក្ស ដែលបាននាំមកនូវសន្ដិភាពពេញលេញ ទើបកម្ពុជាមានការអភិវឌ្ឍរីកចម្រើនលើគ្រប់វិស័យនៅថ្ងៃនេះ ដោយមានសមិទ្ធផលធំៗជាច្រើនរបស់រាជរដ្ឋាភិបាល រួមទាំងប្រជាធិបតេយ្យ សិទ្ធិមនុស្ស និងនីតិរដ្ឋ។
បន្ថែមពីលើនេះ លោកបានសម្ដែងការសាទរចំពោះសមិទ្ធផលថ្មីរបស់គណបក្សឃុំកំពង់ព្រៀង និងថ្លែងអំណរគុណចំពោះគណៈកម្មាធិការបក្សឃុំ ក្រុមការងារ និងសមាជិក សមាជិកាបក្សទាំងអស់។
លោកបានជម្រាបជូនថា កម្ពុជាប្រកាន់ខ្ជាប់នូវលទ្ធិប្រជាធិបតេយ្យ ហើយការគោរពសិទ្ធិមនុស្សគឺឈានមុខគេនៅក្នុងតំបន់។ ចំពោះការធ្វើវិសោធនកម្មច្បាប់បោះឆ្នោត គឺមិនមានការប៉ះពាល់ទៅដល់សិទ្ធិរបស់អ្នកបោះឆ្នោតទេ ប៉ុន្តែគឺជាការថែរក្សានូវដំណើរការប្រជាធិបតេយ្យ ហើយប្រជាពលរដ្ឋចូលរួមក្នុងការប្រើសិទ្ធិពេញលេញក្នុងការជ្រើសតំណាងដែលគាត់ពេញចិត្ត។
ជាកិច្ចបញ្ចប់ លោក កែវ រ៉េមី បានផ្ដាំផ្ញើឱ្យមានការចូលរួមថែទាំអគារទីស្នាក់ការបក្សថ្មី ដើម្បីបម្រើជាប្រយោជន៍របស់សមាជិក សមាជិកាបក្សទាំងអស់នៅឃុំកំពង់ព្រៀង ទាំងក្នុងការងារបក្ស និងការអភិវឌ្ឍរីកចម្រើននៅក្នុងឃុំទាំងមូល។
លោកក៏បានផ្តាំផ្ញើឱ្យប្រជាពលរដ្ឋអញ្ជើញទៅបោះឆ្នោតទាំងអស់គ្នា នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ៕
