(ភ្នំពេញ)៖ វគ្គសិក្សាថ្មីរបស់ មជ្ឈមណ្ឌលបណ្ដុះបណ្ដាលព័ត៌មាន Fresh News (FTC) អំពី «របៀបសរសេរព័ត៌មានដំណឹង និងបទយកការណ៍សម្រាប់ទូរទស្សន៍ និងវិទ្យុ» បានចាប់ផ្ដើមដំណើរការសិក្សានៅព្រឹកថ្ងៃទី១៧ ខែមិថុនា តាមការកំណត់។ វគ្គសិក្សាអំពីការសរសេរព័ត៌មាននេះ គឺជាវគ្គទី៥ នៃថ្នាក់ព័ត៌មានរបស់ FTC។ ប៉ុន្តែវគ្គនេះបានផ្ដោតសំខាន់ទៅលើការសរសេរព័ត៌មានបែបដំណឹង បទយកការណ៍ និងការអានព័ត៌មាន សម្រាប់ទូរទស្សន៍ និងវិទ្យុ ដែលធ្វើឲ្យថ្នាក់សិក្សាមួយនេះ កាន់តែពិសេសជាងវគ្គមុនៗទៅទៀត។
វគ្គសិក្សាថ្មីនេះ បង្រៀនផ្ទាល់ដោយ លោក ម៉ារ យ៉ារិទ្ធ ដែលជាប្រធានមជ្ឈមណ្ដុះបណ្ដាល FTCនេះផ្ទាល់ និងជាអ្នកជំនាញសារព័ត៌មានជើងចាស់ រយៈពេលជិត៤០ឆ្នាំមកហើយ។ លោកធ្លាប់ជាភ្នាក់ងារសារព័ត៌មានបរទេសល្បីៗជាច្រើនដូចជា៖ UPI, AP និង VOA ជាដើម។ លោក ម៉ារ យ៉ារិទ្ធ គឺជាអតីតនិស្សិតខ្មែរដែលបានសិក្សាវិស័យវិជ្ជាជីវៈសារព័ត៌មានក្នុង សកលវិទ្យាល័យមីឈីហ្គែន University of Michigan និងសកលវិទ្យាល័យមែរីលែន University of Maryland ក្នុងសហរដ្ឋអាមេរិក។
វគ្គសិក្សាអំពី «របៀបសរសេរព័ត៌មានដំណឹង និងបទយកការណ៍សម្រាប់ទូរទស្សន៍ និងវិទ្យុ» នេះ មានរយៈពេល៣ខែ និងសិក្សារៀងរាល់ថ្ងៃសៅរ៍ ចាប់ពីម៉ោង១០ព្រឹកដល់ម៉ោង១២ថ្ងៃត្រង់ ។ សម្រាប់វគ្គនេះ លោក ម៉ារ យ៉ារិទ្ធ ផ្តោតទៅលើការបង្រៀនសរសេរអត្ថបទ និងការអានព័ត៌មានសម្រាប់វិទ្យុ និងទូរទស្សន៍ ដែលនេះជាចំណុចពិសេស ហើយប្លែកជាវគ្គមុនៗទៅទៀត។
នៅក្រោយការបញ្ចប់វគ្គសិក្សា សិក្ខាកាមនឹងទទួលបានវិញ្ញាបនបត្របញ្ជាក់ការសិក្សាមួយ ដែលចេញដោយអង្គភាព និងគ្រូបង្គោល ជាពិសេសសម្រាប់សិក្ខាកាមដែលឆ្នើម មានទេពកោសល្យល្អ នឹងទទួលបានឱកាសចូលហាត់ការណ៍ និងបម្រើការនៅក្នុងអង្គភាពព័ត៌មាន Fresh News ទៀតផង។
គួរជម្រាបថា មជ្ឈមណ្ឌលបណ្តុះបណ្តាលព័ត៌មាន Fresh News (Fresh News Training Center) ជាផ្នែកមួយរបស់អង្គភាពព័ត៌មាន Fresh News ដែលត្រូវបានបង្កើតឡើងនៅខែកញ្ញា ឆ្នាំ២០២១ ក្រោមគំនិតផ្ដួចផ្ដើមរបស់ លោក លឹម ជាវុត្ថា ដែលស្ថាបនិក និងជាអគ្គនាយកនៃអង្គភាពព័ត៌មាន Fresh News ដើម្បីចូលរួមចែករំលែកចំណេះដឹង និងបទពិសោធន៍ផ្នែកព័ត៌មាន ក៏ដូចជាចូលរួមបណ្តុះបណ្តាលយុវជនជំនាន់ក្រោយ ក្នុងវិស័យព័ត៌មានជាដើម។
សម្រាប់ព័ត៌មានលម្អិត ពាក់ព័ន្ធនឹងវគ្គសិក្សាទាំងអស់របស់ FTC សូមទំនាក់ទំនង៖
* លោក ពេជ្រ ប៊ុនសាយ អគ្គនាយករង Fresh News និងជាអនុប្រធានប្រចាំការ FTC
Tel: 089 960 090
Telegram: https://t.me/pichbunsay
* កញ្ញា ថាន រស្មី ប្រធានផ្នែកទំនាក់ទំនងសាធារណៈ FTC តាមរយៈ
Tel: 092 322 334
Telegram: https://t.me/raksmeythanfn
* កញ្ញា រិន ម៉ានីកា បុគ្គលិកផ្នែករដ្ឋបាល FTC
Tel: 012 876 948
Telegram: https://t.me/rinmanikfn
