(កំពង់ចាម)៖ ស្លាកគណបក្សភ្លេីងទៀននៅក្នុងស្រុកស្ទឹងត្រង់ ខេត្តកំពង់ចាម ត្រូវបានអ្នកគាំទ្រផ្តួលចោលជាបន្តបន្ទាប់ ព្រោះតែពួកគេអស់ជំនឿ និងស្អប់ខ្ពើមចំពោះការប្រើ នយោបាយនាំមកនូវការបែកបាក់ និងអន្តរាយដល់ជាតិ។
នៅថ្ងៃព្រហស្បតិ៍ ទី១៥ ខែមិថុនា ឆ្នាំ២០២៣ ស្លាកគណបក្សភ្លើងទៀតចំនួនពីរទៀត នៅក្នុងភូមិទួលពោធិ៍ និងភូមិព្រះ ឃុំព្រែកក់ ស្រុកស្ទឹងត្រង់ ខេត្តកំពង់ចាម ត្រូវបានអ្នក គាំទ្ររបស់ខ្លួននាំគ្នាផ្តួលចោលជាបន្តបន្ទាប់។ មិនត្រឹមតែផ្តួលស្លាកបក្សចោលនោះទេ ក្រុមអ្នកគាំទ្រ ដែលធ្លាប់ធ្វើសកម្មភាពគាំទ្របក្សភ្លើងទៀន ក៏បាននាំគ្នាដោះមួក ដោះអាវ ដែលមានរូបសញ្ញាបក្សភ្លើងទៀនចេញពីខ្លួន ជានិមិត្តរូបនៃបោះបង់ និងចាកចេញពីបក្សភ្លើងទៀន។
លោក ហ៉ីម មូសា វ័យ ៣៨ឆ្នាំ អ្នកគាំទ្របក្សភ្លើងទៀន នៅភូមិទួលពោធិ៍ និងលោក ម៉ាន់ ម៉ាលិច អាយុ ៥៣ឆ្នាំ អ្នកគាំទ្របក្សភ្លើងទៀន នៅភូមិព្រះ ឃុំព្រែកកក់ សុទ្ធសឹង ជាអ្នកដែលធ្លាប់គាំទ្រយ៉ាងមុតមាំជាមួយបក្សភ្លើងទៀន ហើយធ្វើសកម្មភាពកៀរគររក អ្នកគាំទ្រដល់បក្ស។
ជាមួយការផ្តួលស្លាកបក្សនេះ លោក ហ៉ីម មូសា និងលោក ម់ាន់ ម៉ាលិច បានលើកឡើងថា ការណ៍ដែលនាំឱ្យពួកគេផ្តួលស្លាកបក្សភ្លើងទៀន ដោះអាវ ដោះមួកបក្សចោលនេះ ក៏ព្រោះតែអស់ជំនឿចិត្តជាមួយការដឹកនាំបក្សមួយនេះ។ ជាពិសេសពួកគេស្អប់ខ្ពើមនឹងបក្ស ដែលបន្តធ្វើតាមនយោបាយមេបក្សស្រមោល សម រង្ស៉ី អនុវត្តន៍នយោបាយពិសពុលបំបែកបំបាក់ជាតិ និងនាំមកនូវមហន្តរាយដល់ជាតិ៕
