(ភ្នំពេញ)៖ នៅយប់ថ្ងៃទី១៤ ខែមិថុនា ឆ្នាំ២០២៣នេះ លោក កៀង ល័ក្ស អភិបាលខណ្ឌចំការមន បានបន្ដជួបសំណេះសំណាល និងបាននាំយកប័ណ្ណមូលនិធិសមធម៌សុខាភិបាល (ប.ស.ស) មកផ្ដល់ជូនបុគ្គលិកបម្រើការផ្នែកសេដ្ឋកិច្ចក្រៅប្រព័ន្ធ ដែលកំពុងបម្រើការងារនៅភោជនីយដ្ឋាន LUSH KTV ស្ថិតនៅសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ដោយមានការចូលរួមពីលោកអភិបាលរងខណ្ឌ, លោកចៅសង្កាត់ និងមន្ត្រីរដ្ឋបាលខណ្ឌ ពាក់ព័ន្ធទាំងអស់។
ជាការយកចិត្តទុកដាក់អំពីសុខភាពរបស់បុគ្គលិកបម្រើការផ្នែកសេដ្ឋកិច្ចក្រៅប្រព័ន្ធ រាជរដ្ឋាភិបាលសម្រេចផ្ដល់របស់ថែទាំសុខភាពតាមប្រព័ន្ធមូលនិធិសមធម៌សុខាភិបាល សម្រាប់បុគ្គលិកបម្រើការក្នុងសេវាកម្សាន្តទេសចរណ៍ នៃសេដ្ឋកិច្ចក្រៅប្រព័ន្ធ ជាពិសេសស្ត្រីដែលបម្រើការងារនៅតាមរង្គសាល, ឌីស្កូតែក, ខារ៉ាអូខេ, បៀហ្គាដិន, កន្លែងម៉ាស្សា និងស្ប៉ា ស្របតាមលិខិតបទដ្ឋានគតិយុត្តជាធរមាន ដែលរដ្ឋនឹងរាប់រងនូវចំណាយទាំងស្រុង។
លោក កៀង ល័ក្ស បានអះអាងថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា តែងតែគិតគូរទៅដល់សុខទុក្ខប្រជាពលរដ្ឋខ្មែរគ្រប់រូប ពិសេសប្រជាពលរដ្ឋដែលមានជីវភាពខ្វះខាត ដែលកំពុងតែជួបលំបាក សម្ដេចតេជោ មិនឲ្យនរណាម្នាក់ស្លាប់ដោយអត់បាយហូប និងរងទុក្ខលំបាក ដោយគ្មានការថែទាំយកចិត្តទុកដាក់ពីរាជរដ្ឋាភិបាលនោះទេ៕
