(បន្ទាយមានជ័យ)៖ លោកឧត្តមសេនីយ៍ត្រី ឱ បូរិន មេបញ្ជាការអាវុធហត្ថខេត្ត នៅរសៀលថ្ងៃទី២២ ខែកក្កដា ឆ្នាំ២០១៦ បានបើកកិច្ចប្រជុំពិភាក្សា ផ្សព្វផ្សាយសារសំខាន់ៗដែលបានដាក់ដោយ លោកនាយឧត្តមសេនីយ៍ សៅ សុខា ​អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ដល់មន្ដ្រីអាវុធហត្ថក្រោមឱវាទទូទាំងខេត្ត។ ក្នុងកិច្ចប្រជុំ នោះដែរ ក៏មានការចូលរួមពី ​លោកមេបញ្ជាការរង នាយ នាយរងសេនាធិការ ប្រធាន អនុប្រធានមន្ទីរ នាយ នាយរងការិយាល័យ មេបញ្ជាការ មេបញ្ជាការរង ក្រុង ស្រុក និងស្នាក់សន្តិសុខ​៧៥នាក់ បានចូលរួមផងដែរ។

សារសំខាន់ៗដែរ លោកឧត្តមសេនីយ៍ត្រី បានថ្លែងទៅកាន់អង្គពិធីក្នុងឱកាសនោះ រួមមាន ទី១-​កម្លាំងអាវុធហត្ថ ណាដែលប្រើប្រាស់គ្រឿងញៀន ត្រូវលុបឈ្មោះចោល ទី២-ត្រួតពិនិត្យកម្លាំង អាវុធហត្ថណា​ដែលអនុវត្តន៍ខុសច្បាប់ ទី៣-ត្រួតពិនិត្យកម្លាំងអាវុធហត្ថណា ដែលបាត់មុខយូរ ត្រូវលុបឈ្មោះចោល​ ៤-អនុវត្តច្បាប់តឹងរឹងចំពោះ កម្លាំងអាវុធហត្ថណា ដែលយកតួនាទី ទៅកាងខុសច្បាប់ ឬប្រព្រឹតអំពើពុករលួយ ទី៥-ធ្វើការអប់រំចំពោះ កម្លាំងអាវុធហត្ថណា ដែលប្រើបណ្ដាញសង្គមFacebook មិនត្រឹមត្រូវ ត្រូវតម្រង់ទិស ទី៦-កាប្រើប្រាស់ស្លាកលេខកងទ័ព ត្រូវបង់ពន្ធជូនរដ្ឋ ទី៧-គ្រប់គ្រងកម្លាំងអាវុធហត្ថដែលដើរហើរសេរី ហើយចំពោះការឈប់សម្រាក ត្រូវសុំច្បាប់ជាលាយលក្ខណ៍អក្សរតាមឋានានុក្រម ទី៨-យើងជាមន្រ្តីអនុវត្តច្បាប់ ត្រូវគោរពច្បាប់ចរាចរណ៍ និងទី៩-ណែនាំកម្លាំងអាវុធហត្ថគ្រប់រូប មិនត្រូវឆ្លើយឆ្លងព័ត៍មាន ក្រៅពីអ្នកនាំពាក្យរបស់មេបញ្ជាការ។

បន្ថែមពីនេះ លោកមេបញ្ជាការ សង្ឈឹមជឿជាក់ថា មន្ដ្រីកងរាជអាវុធទាំងអស់ នឹងអនុវត្តនូវវិធានការណ៍ដែលបានដាក់ចេញ ដោយក្នុងស្មារតីទទួលខុសត្រូវខ្ពស់៕