(ភ្នំពេញ)៖ លោកបណ្ឌិត ពេជ្រ ស្រស់ ប្រធានគណបក្សយុវជនកម្ពុជា បានប្រកាសគាំទ្រទាំងស្រុងនូវការផ្តួចផ្តើមរបស់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ក្នុងការធ្វើវិសោធនកម្មច្បាប់បោះឆ្នោត ដើម្បីកែទម្រង់ «សិទ្ធិក្នុងការឈរឈ្មោះឱ្យគេបោះឆ្នោត» ដោយលើកឡើងថា ការតាក់តែងច្បាប់ ហាមបុគ្គលណាមួយមានសិទ្ធិឈរឈ្មោះឱ្យគេបោះឆ្នោតឱ្យ នៅពេលបុគ្គលនោះមិនទៅបោះឆ្នោត គឺជារឿងត្រឹមត្រូវ។
លោកបណ្ឌិត ពេជ្រ ស្រស់ បានបន្ថែមថា សិទ្ធិបោះឆ្នោត និងសិទ្ធិឈរឈ្មោះឱ្យគេបោះឆ្នោតឱ្យ វាគឺជាការពិត ប្រទេសប្រកាន់របបលទ្ធិប្រជាធិបតេយ្យ គឺផ្តល់សិទ្ធិសេរីភាពដល់ពលរដ្ឋឱ្យក្លាយជាម្ចាស់អំណាច តាមរយៈការបោះឆ្នោត ហើយប្រទេសខ្លះក៏បញ្ចូលសិទ្ធិនេះទៅជាកាតព្វកិច្ចផងដែរ ដោយហេតុថាសមាជិកនៃពលរដ្ឋនីមួយៗ គឺជាចលករក្នុងការកសាងប្រទេស និងជាចលករ ដ៏សកម្មក្នុងការចូលរួមអភិវឌ្ឍន៍ប្រទេសផងដែរ ដូច្នេះប្រជាពលរដ្ឋនោះនោះត្រូវទៅបោះឆ្នោត ដើម្បីជ្រើសរើសតំណាងរបស់ខ្លួន។ រីឯអ្នកឈរឈ្មោះឱ្យគេបោះឆ្នោតវិញ គឺត្រូវតែជាបុគ្គលមានលក្ខណៈសម្បត្តិពេញលេញទាំងផ្លូវច្បាប់ និងទាំងការបំពេញសិទ្ធិជាពលរដ្ឋល្អ ហើយក៏ត្រូវជាបុគ្គលគំរូមួយក្នុងការជម្រុញឱ្យពលរដ្ឋចូលរួមបោះឆ្នោតផងដែរ បើសិនជាបុគ្គលដែលឈរឈ្មោះឱ្យគេបោះឆ្នោតមិនទៅបោះឆ្នោតផងនោះ សួរថាសមធ្វើជាតំណាងឱ្យអ្នកដែលគេទៅបោះឆ្នោតដែរឬទេ ? ប្រៀបបានអ្នកលក់អាហារឱ្យគេហូប ប៉ុន្តែខ្លួនឯងមិនហ៊ានហូបអាហារដែលខ្លួនលក់នោះផង។
លោកបន្តថា «ចំពោះការតាក់តែងច្បាប់ ហាមបុគ្គលណាមួយមានសិទ្ធិឈរឈ្មោះឱ្យគេបោះឆ្នោតឱ្យ នៅពេលបុគ្គលនោះមិនទៅបោះឆ្នោត គឺជារឿងត្រឹមត្រូវ ដោយហេតុថាបុគ្គលធ្វើជាតំណាងគេគឺត្រូវតែអនុវត្តសិទ្ធិឱ្យបានត្រឹមត្រូវ និងខ្ជាប់ខ្ជួនជាងគេ បើពុំនោះទេគឺមិនអាចធ្វើជាតំណាងល្អបានឡើយ»។
ការកែទម្រង់ «សិទ្ធិក្នុងការឈរឈ្មោះឱ្យគេបោះឆ្នោត» ត្រូវបានលោកចាត់ទុកថា ដើម្បីពង្រឹង និងលើកកម្ពស់ដំណើរការប្រជាធិបតេយ្យនៅកម្ពុជា ជាពិសេស ដើម្បីឱ្យអនាគតអ្នកដឹកនាំ ទាំងនៅថ្នាក់ជាតិ ទាំងនៅថ្នាក់ក្រោមជាតិ ដែលត្រូវជ្រើសរើសតាមរយៈការបោះឆ្នោត ត្រូវមានការទទួលខុសត្រូវខ្ពស់ចំពោះជាតិ និងប្រជាជន ហើយការទទួលខុសត្រូវនេះ ត្រូវចាប់ផ្តើមពីការអនុវត្តឱ្យបានខ្ជាប់ខ្ជួននូវសិទ្ធិបោះឆ្នោត ដែលជាករណីកិច្ចរបស់ប្រជាពលរដ្ឋគ្រប់រូបចំពោះប្រទេសជាតិ នៅក្នុងសង្គមប្រជាធិបតេយ្យ។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅយប់ថ្ងៃទី១២ ខែមិថុនា ឆ្នាំ២០២៣ បានស្នើឱ្យសិក្សាធ្វើវិសោធនកម្មច្បាប់ស្តីពីការបោះឆ្នោត ដើម្បីដកសិទ្ធិឈរឈ្មោះឱ្យគេបោះឆ្នោត សម្រាប់ជនណាដែលមិនទៅបោះឆ្នោត។ «អ្នកដែលមានបំណងចង់ឈរឈ្មោះឱ្យគេបោះឆ្នោត ត្រូវមានការទទួលខុសត្រូវ ក្នុងនាមជាពលរដ្ឋល្អរបស់ជាតិ ក្នុងសង្គមប្រជាធិបតេយ្យ ដោយចាប់ផ្តើមពីការអនុវត្ត ឱ្យបានខ្ជាប់ខ្ជួននូវសិទ្ធិបោះឆ្នោត ក្នុងន័យនេះអ្នកដែលមិនបានបោះឆ្នោត ដោយគ្មានមូលហេតុសមរម្យតាមផ្លូវច្បាប់ នឹងត្រូវចាត់ទុកថា បានបាត់បង់នូវលក្ខខណ្ឌក្នុងការឈរឈ្មោះឱ្យគេបោះឆ្នោត ប៉ុន្តែអ្នកទាំងនោះនៅតែមានសិទ្ធិទៅបោះឆ្នោតក្នុងនាមជាពលរដ្ឋដដែល ដោយមិនមានផលប៉ះពាល់អ្វីឡើយ»។
សម្តេចតេជោ ហ៊ុន សែន បានបន្ថែមថា ប្រសិនបើជននោះ មិនបានទៅបោះឆ្នោតលើកទី១ទេ រូបគេក៏មិនអាចទៅឈរឈ្មោះឱ្យគេបោះឆ្នោតឱ្យដែរ ក្នុងនោះមានទាំងការបោះឆ្នោតជ្រើសរើសក្រុមប្រឹក្សាឃុំសង្កាត់ ការបោះឆ្នោតជ្រើសរើសសមាជិកក្រុមប្រឹក្សាក្រុងស្រុកខណ្ឌ ក្រុមប្រឹក្សាខេត្ត ទាំងសមាជិកព្រឹទ្ធសភា និងសមាជិករដ្ឋសភា។
សម្តេចតេជោ ហ៊ុន សែន បានលើកឡើងទៀតថា ការធ្វើវិសោធនកម្មច្បាប់នេះ គឺជារឿងចាំបាច់ ដើម្បីចៀសវាងការនិយាយចុះឡើង ប៉ុន្តែត្រូវតែនិយាយអំពីបញ្ហាផ្លូវច្បាប់។
សម្តេចបានបន្ថែមថា ការធ្វើវិសោធនកម្មនេះ នឹងធ្វើឱ្យស្របតាមមាត្រា៣៤ថ្មី នៃរដ្ឋធម្មនុញ្ញកម្ពុជា ហើយគ្មានអ្វីដែលផ្ទុយនឹងរដ្ឋធម្មនុញ្ញនោះឡើយ។ សម្តេចបានបន្តថា ក៏អាចធ្វើដូចថៃពេលនេះ ប៉ុន្តែនឹងមិនធ្វើឱ្យប៉ះពាល់ដល់សិទ្ធិប្រជាពលរដ្ឋទៅបោះឆ្នោត ឬមិនបោះឆ្នោតនោះទេ៕
