(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានទម្លាយថា លោក ស ឡុងដេត កំពុងរត់គេចខ្លួន ហើយសម្តេចតេជោ បានហៅមន្ត្រីគណបក្សភ្លើងទៀនរូបនេះ ត្រឡប់មកវិញ ដើម្បីត្រៀមខ្លួនឡើងតុលាការរឿងក្តីពាក់ព័ន្ធនឹងបញ្ហានិយាយពីព្រឹត្តិការណ៍ស៉ីហ្គេម។

សម្តេចតេជោ ហ៊ុន សែន ថ្លែងបែបនេះ នៅថ្ងៃអង្គារ ទី១៣ ខែមិថុនា ឆ្នាំ២០២៣ ពេលបន្តចុះជួបសំណេះសំណាលជាមួយកម្មករ កម្មការិនី សរុបជិត២ម៉ឺននាក់ មកពីរោងចក្រ សហគ្រាសចំនួន១១ ដែលកំពុងដំណើរការអាជីវកម្ម ក្នុងរាជធានី​ភ្នំពេញ។

សម្តេចតេជោ បានបញ្ជាក់ថា លោក ស ឡុងដេត មិនអាចចេញទៅក្រៅប្រទេសបាននោះឡើយ ព្រោះមានដីកាពីតុលាការហាមចេញក្រៅប្រទេស ដោយសារត្រូវបានគេប្តឹង រឿងនិយាយបង្ខូចពាក់ព័ន្ធនឹងព្រឹត្តិការណ៍ស៉ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។ សម្តេចតេជោ ហ៊ុន សែន ថ្លែងថា ទោះបីជា ស ឡុងដេត រត់ទៅដល់ថៃក៏សម្តេចស្នើសុំថៃ ឲ្យចាប់បញ្ជូនមកវិញដែរ។

សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «ឥឡូវ សូមអំពាវនាវ ស ឡុងដេត សូមត្រលប់មកវិញ យប់មិញចាកចេញពីភ្នំពេញ ចាំបាច់រត់ធ្វើអី? បើគង់តែរត់ទៅ ខ្ញុំសុំឲ្យថៃចាប់បញ្ជូនមកវិញដែរ។ យប់មិញ ទៅដល់ថ្មដា ថៃគេអត់ឲ្យឆ្លងទេ ឥលូវកំពុងតែឆ្ពោះទៅចាំយាម។​ ចៅហ្វាយខេត្តចាំយាម ដីកាតុលាការហាមចេញក្រៅប្រទេស បើចេញក្រៅប្រទេសចាប់ភ្លាម នៅនឹងទល់ដែន។ ឥលូវ ស ឡុងដេត បានលឺហើយ ត្រលប់មកវិញ។ ត្រលប់មកដេកផ្ទះឲ្យស្រួល ហើយទៅឆ្លើយជាមួយតុលាការទៅ អាបញ្ហាចោទប្រកាន់រឿងស៊ីហ្គេម។ គណៈកម្មការស៊ីហ្គេមគេប្តឹង ព្រោះចោទប្រកាន់គេវាធ្ងន់ពេក»។

សូមជម្រាបថា សម្តេចតេជោ ហ៊ុន សែន ធ្លាប់បានថ្លែងសារព្រមាន លោក ស ឡុងដេត និងបន្តប្រកាសថា សម្តេចមិនអត់ឱនជនណា ដែលមានទំនាក់ទំនងជាមួយជនក្បត់ជាតិ ៣ជំនាន់នោះឡើយ។

សារព្រមានរបស់សម្តេចតេជោ បានធ្វើឡងបន្ទាប់ពី លោក ស ឡុងដេត ក្នុងកិច្ចប្រជុំថ្មីៗនេះ ចង់បង្កើតឃុំមួយរបស់បក្សប្រជាជនកម្ពុជា និងឃុំមួយរបស់ភ្លើងទៀន។ ជាមួយគ្នានេះ លោក ស ឡុងដេត ក៏បានរិះគន់លើការរៀបចំស៉ីហ្គេម និងអាស៊ានប៉ារ៉ាហ្គេម ដែលកម្ពុជាមិនយកថ្លៃសំបុត្រ មិនយកថ្លៃស្នាក់នៅនិងអាហារ ព្រមទាំងមិនយកថ្លៃលើសិទ្ធិផ្សាយ។

«ហ្អែងកុំភ្លេចណា ទំនាក់ទំនងហ្អែង និងអាក្បត់ជាតិ ៣ជំនាន់នៅសល់។ ហ៊ុន សែន មិនអត់ឲ្យនរណាទាំងអស់ ដែលមានទំនាក់ទំនងជាមួយអាក្បត់ជាតិ ៣ជំនាន់ ហើយអ្នកណាក៏ដោយ​ដែលផ្តាច់ខ្លួន ពីអាក្បត់ជាតិ ៣ជំនាន់ គឺ ហ៊ុន សែន លើកលែងទោសទាំងអស់»។ នេះជាសាររបស់សម្តេចតេជោ ហ៊ុន សែន ពេលអញ្ជើញចុះជួបកម្មករ កម្មការិនីជាង ១ម៉ឺន ៦ពាន់នាក់ នៅស្រុកកណ្តាលស្ទឹង ខេត្តកណ្តាល នាថ្ងៃទី១០ ខែមិថុនា ឆ្នាំ២០២៣។

យោងតាមខ្លឹមសាររបស់សម្តេចតេជោ ហ៊ុន សែន លើបណ្តាញ Telegram គឺលោក ស ឡុងដេត បានប្រជុំជាមួយមន្ត្រីបក្សភ្លើងទៀនខណ្ឌដូនពេញ ខណ្ឌ៧មករា ខណ្ឌទួលគោកនៅថ្ងៃទី៣ ខែមិថុនា ឆ្នាំ២០២៣។

បើតាមប្រសាសន៍សម្តេចតេជោ ហ៊ុន សែន បក្សប្រឆាំងត្រូវបានគេទុកផ្លូវឲ្យដើរច្រើនហើយ ប៉ុន្តែពួកគេតែងតែចង់បំផ្លាញបក្សកាន់អំណាច។ សម្តេចតេជោ បានចាត់ទុកថា ការចង់បំផ្លាញបក្សកាន់អំណាច ប្រៀបបីដូចជាបក្សប្រឆាំង កំពុងធ្វើការសម្លាប់ជីវិតនយោបាយដោយខ្លួនឯង។

សម្តេចតេជោ ហ៊ុន សែន បានថ្លែងឲ្យដឹងថា ក្រុមបក្សប្រឆាំងក្រៅប្រទេស កំពុងធ្វើយុទ្ធនាការមិនឲ្យពលរដ្ឋទៅបោះឆ្នោត។ ដោយសារបញ្ហានេះ សម្តេចបានស្នើឲ្យវិសោធនកម្មច្បាប់ស្តីពីការបោះឆ្នោត ដែលអ្នកមិនចូលរួមបោះឆ្នោត មិនអាចឈរឈ្មោះឲ្យគេបោះឆ្នោតបាននោះឡើយ។

សម្តេចតេជោ បានបញ្ជាក់ថា ការណ៍ដែលជំរុញឱ្យសម្តេចធ្វើវិសោធនកម្មស្តីពីការបោះឆ្នោត ព្រោះតែមេដឹកនាំក្រុមប្រឆាំង កំពុងផុសចលនា «WIFI» គឺរារាំងសមាជិកពួកគេមិនឲ្យចូលរួមបោះឆ្នោត៕