(បន្ទាយមានជ័យ)៖ ក្របីឡើងក១ក្បាល បានរត់ចូលទៅក្នុងផ្សារត្រីដេញវ័ធប្រជាពលរដ្ឋ បណ្តាលឲ្យមានអ្នករងរបួស៦នាក់។ ហេតុការណ៍នេះកើតឡើងនាថ្ងៃទី១២ ខែមិថុនា ឆ្នាំ២០២៣ ស្ថិតភូមិក្បាលស្ពានពីរ សង្កាត់អូរជ្រៅ ក្រុងប៉ោយប៉ែត។
លោក តាំង លីហេង សមាជិកក្រុមប្រឹក្សាសង្កាត់អូរជ្រៅ បានប្រាប់ថា មានក្របីឈ្មោល១ក្បាល បានបោលចូលផ្សារត្រីខាងជើង ផ្សារអគ្គរក្រុងប៉ោយប៉ែត ដោយដេញវ័ធអ្នកជិះម៉ូតូនៅតាមផ្លូវបណ្តាលឲ្យមានអ្នករងរបួស៦នាក់ ក្នុងនោះធ្ងន់៤នាក់ ត្រូវបានសង្គ្រោះកាន់មន្ទីពេទ្យបង្អែកក្រុងប៉ោយប៉ែត។
លោកក្រុមប្រឹក្សាសង្កាត់អូរជ្រៅ បានបញ្ជាក់ថា ក្រោយក្របីឈ្មោល១ក្បាលនោះដេញវ័ធប្រជាពលរដ្ឋ កម្លាំងនគរបាល និងកម្លាំងកងរាជអាវុធហត្ថ រួមជាមួយប្រជាពលរដ្ឋ បាននាំគ្នាដេញទាក់ចាប់ក្របីឡើងក១ក្បាលនោះ ដើម្បីធានាឲ្យមានសុវត្ថភាពឡើងវិញ ក្រោយចំណាយពេលជិត២ម៉ោង ទើបប្រជាពលរដ្ឋម្នាក់បានដើរលបៗទៅជិតខ្លួនក្របីនោះ ហើយលូកដៃអង្អែលពងនិងក្បាល រួចយកខ្សែទាក់ក និងចងជើងទាំង៤ ហើយដឹកមកទុកនៅអធិការដ្ឋានក្រុងប៉ោយប៉ែត។
លោក តាំង លីហេង បានបញ្ជាក់ថា ក្រោយចាប់ក្របីឈ្មោល១ក្បាលខាងលើ ដេញវ័ធប្រជាពលរដ្ឋបណ្តាលឲ្យមានអ្នករងរបួសធ្ងន់ស្រាល៦នាក់ និងចាប់ក្របីបានយកមករក្សាទុកនៅអធិការដ្ឋាននគរបាលក្រុងប៉ោយប៉ែត សមត្ថកិច្ចបានស្រាវជ្រាវរកម្ចាស់ ហើយជាមួយគ្នានោះដែរ ម្ចាស់ក្របីខាងលើក៏មកទទួលខុសត្រូវចំពោះច្បាប់៕
