(ភ្នំពេញ)៖​ រថយន្តសេរីទំនើបមួយគ្រឿង រងការខូចខាតខ្ទេចមុខ ដោយសារម្ចាស់ស្រវឹង បើកទៅបុកបង្គោលភ្លើង​ ត្រង់ផ្លូវសីហនុកែង និងផ្លូវត្រសក់ផ្អែម​ នាម៉ោង១៖៥០នាទីរំលងអាធ្រាត្រ ឈានចូលថ្ងៃទី២២​ ខែកក្កដា​ ឆ្នាំ​២០១៦​ ស្ថិតក្នុងសង្កាត់បឹងកេងកងទី១ ខណ្ឌចំការមន​។

ប្រភពព័ត៌មានពីកន្លែង ដែលមានគ្រោះថ្នាក់​បានឲ្យដឹងថា មុនកើតហេតុគេបានឃើញ បុរសម្នាក់បើករថយន្តស៊េរីទំនើបមួយគ្រឿងម៉ាក​ Honda City ពណ៌ស ស្លាកលេខភ្នំពេញ 2AG-1117 តាមបណ្តោយផ្លូវព្រះសីហនុ ទិសដៅពីកើតទៅលិច ក្នុងល្បឿនយ៉ាងលឿន​ លុះបើកមកដល់ចំណុចកើតហេតុ​ ត្រង់ផ្លូវបំបែក​ ទៅផ្លូវត្រសក់ផ្អែម​ បុរសជាអ្នកបើកបរមិនបង្អង់ល្បឿនទេ គឺបត់ឆ្វេងដៃឆ្ពោះទៅផ្លូវត្រសក់ផ្អែម​ យ៉ាងលឿន ហើយបួងចង្កូតមិនទាន់ ធ្វើឲ្យរថយន្តជ្រុលទៅបុកជាមួយបង្គោលភ្លើងចំនួន២ដើម​ បណ្តាលឲ្យរថយន្តខ្ទេចមួយកំណាត់មុខ តែមិនបណ្តាលឲ្យបុរសជាអ្នកបើកបររងរបួសនោះទេ​ ហើយបានបើកទ្វាររថយន្ត​ រួចគេចខ្លួនចេញពកន្លែងកើតហេតុ បាត់ស្រមោល​ ដោយបន្សល់ទុកតែរថយន្ត ដែលរងការខូចខាត នៅកន្លែងបុកតែប៉ុណ្ណោះ​  ។

ចុងក្រោយរថយន្ត ត្រូវបានខាងជំនាញចុះ មកយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលក្រុងភ្នំពេញ​ ដើម្បីរង់ចាំម្ចាស់ចូលខ្លួន ទៅដោះស្រាយនៅពេលក្រោយ​៕