(ភ្នំពេញ)៖ លោក ឃុត ចាន់ដារ៉ា សមាជិកគណៈកម្មាធិការកណ្តាគណបក្សប្រជាជនកម្ពុជា និងជាប្រធានផ្នែកក្រសួង ស្ថាប័នយុវជនគណបក្សប្រជាជនកម្ពុជាថា្នក់កណ្តាល បានដឹកនាំគណប្រតិភូក្រុមការងារយុវជនគណបក្សប្រជាជនកម្ពុជាតាមក្រសួងស្ថាប័នទាំង៤១សរុបចំនួន២៧២នាក់ ទៅធ្វើទស្សនកិច្ចសិក្សា ស្វែង យល់បន្ថែម ពីប្រវត្តិស្នាដៃនៃវីជន ថ្នាក់នាំគណបក្សប្រជាជនកម្ពុជា នៅវិមានអនុ ស្សា វ រីយ៍ រណសិរ្ស២ធ្នូ ស្ថិតនៅភូមិជើងឃ្លូ ឃុំ២ធ្នូ ស្រុកស្នួល ខេត្តក្រចេះ មានរយៈពេល២ថ្ងៃ ថ្ងៃទី១០ ១១ ខែមិថុនា ឆ្នាំ២០២៣។
ដោយបានទទួលស្វាគមន៍យ៉ាងកក់ក្តៅ និងស្និទ្ធស្នាលបំផុតពីសំណាក់ លោក ស៊ុំ ជួន ប្រធានការិល័យគ្រប់គ្រងវិមានអនុស្សាវរីយ៍រណសិរ្ស២ធ្នូ និងក្រុមការងារ និងបានធ្វើចំណាប់អារម្មណ៍រំលឹកឡើងវិញនៅក្នុងរបបប្រល័យពូជសាសន៍ប៉ុលពត បានកាប់សម្លាប់ប្រជាជនខ្លួនឯងជាង ៣លាននាក់។ ទោះបីពេលវេលាកន្លងហួសទៅជិត ៤ទសវត្សរ៍ក៏ដោយ ក៏ប្រជាជនកម្ពុជានៅតែចងចាំមិនភ្លេចនូវការឈឺចាប់ខ្លោចផ្សាធ្វើទារុណកម្មបង្អត់អាហារ កាប់សម្លាប់យ៉ាងព្រៃផ្សៃធ្វើឱ្យប្រជាជនរងទុក្ខវេទនាបែកបាក់ព្រាត់ប្រាស់ប្តីប្រពន្ធកូនចៅ និងគ្រួសាររួមជាមួយហេដ្ឋារចនាសម្ពន្ធ័សង្គម ត្រូវបានបំផ្លាញខ្ទេចខ្ទីស្ទើរ គ្មានសល់ ក្នុងរបបឧក្រិដ្ឋកម្មប្រល័យពូជសាសន៍ប៉ុលពត។
ដោយមានការឈឺចាប់ជិៈជាន់កាប់សម្លាប់របស់ប៉ុលពត ទើបមានកម្លាំងអ្នកស្នេហាជាតិ បានរត់ចូលព្រៃបង្កើតជារណសិរ្សសាមគ្គីសង្គ្រោះជាតិកម្ពុជានៅថ្ងៃទី២ ខែធ្នូ ឆ្នាំ១៩៧៨ ដើម្បីវាយរំលំ រំដោះប្រជាជនកម្ពុជានិងប្រទេសជាតិចេញផុតពីរបបប៉ុលពតរហូតទទួលបានជ័យជម្នះ នៅថ្ងៃទី៧ ខែមករា ឆ្នាំ១៩៧៩ ហើយស្ដារកសាងប្រទេស ឡើងវិញពីបាតដៃទទេរហូតដល់មានអ្វីៗគ្រប់បែបយ៉ាង និងការអភិវឌ្ឍ និងរីកចម្រើន ដូចសព្វថ្ងៃនេះ ក្រោមការដឹកនាំដ៏ត្រឹមត្រូវរបស់គណបក្សប្រជាជនកម្ពុជា។
លោក ស៊ុំ ជួន បានឱ្យដឹងថា ថ្នាក់នាំគណបក្សប្រជាជនកម្ពុជា បានកសាងវិមានអនុស្សាវរីយ៍រណសិរ្ស២ធ្នូ ជាទីតាំងជាប្រវត្តិសាស្រ្ត ដើម្បីរំលឹកពីប្រវត្តិស្នាដៃនៃវីរជន ស្នេហាជាតិជាច្រើនរូប ដែលបានធ្វើពលីកម្មដើម្បីបុព្វហេតុរំដោះជាតិមាតុភូមិចេញពីរបបប្រល័យពូជសាសន៍ប៉ុលពត។
លោកប្រធានប្រតិភូ និងក្រុមការងារ បានអុជធូបរំលឹកគុណ និងគោរពវិញ្ញាណក្ខន្ធ ដល់វីរជនស្នេហាជាតិ ដែលបានពលីជីវិតក្នុងបុព្វហេតុសង្គ្រោះ និងការពារជាតិមាតុភូមិ បន្ទាប់មកក្រុមការងារគណៈប្រតិភូ បានដាំដើមឈើទុកជាអនុស្សាវរីយ៍ និងពិសារបាយសាមគ្គីរួមគ្នាដោយភាពស្និទ្ធស្នាល និងដោយក្តីរីករាយបំផុត។
នៅពេលរសៀលថ្ងៃដដែល គណៈប្រតិភូ បានបន្តទៅសិក្សាស្វែងយល់ និងពិនិត្យមើលសមិទ្ធផលនានា នៅតំបន់ប្រវត្តិសាស្រ្តយោធាតេជោកោះថ្ម (X16) ស្ថិតនៅឃុំទន្លូងស្រុកមេមត់ខេត្តត្បូងឃ្មុំ ដែលជាទីតាំងប្រវត្តិសាស្រ្តនៃដំណើរឆ្ពោះទៅផ្ដួលរំលំរបបប្រល័យពូជសាសន៍ប៉ុលពត របស់សមមិត្ត ហ៊ុន សែន និងកម្មាភិបាលដ៏ទុកចិត្ត៤នាក់ បានភៀសខ្លួនទៅវៀតណាមស្វែងរកការគាំទ្រជំនួយឧបត្ថម្ភ ដើម្បីការកសាងកម្លាំងប្រដាប់អាវុធកម្ពុជានៅថ្ងៃទី២០ ខែមិថុនា ឆ្នាំ១៩៧៧ ប្រឈម នឹងគ្រោះថ្នាក់រាប់រយជំពូក ចាកចោលប្រពន្ធកូនជាទីស្រលាញ់ យកជីវិតធ្វើជាដើមទុន ដើម្បីរំដោះប្រទេសជាតិ និងប្រជាជនកម្ពុជាចេញពីរបបប្រល័យពូជសាសន៍ប៉ុលពត។
តំបន់ប្រវត្តិសាស្រ្តយោធាតេជោកោះថ្ម (X 16) បានកសាងឡើងនូវសមិទ្ធផលជាច្រើនក្នុងអត្ថន័យ និងគោលបំណងចារទុកប្រវត្តិសាស្រ្តសម្រាប់មនុស្សគ្រប់ជំនាន់ ជាពិសេសអប់រំយុវជន និងមនុស្សជំនាន់ក្រោយ ឱ្យបានដឹងនិងចងចាំនូវព្រឹត្តិការណ៍ជាប្រវត្តិសាស្រ្តដែលប្រទេសកម្ពុជា បានឆ្លងកាត់នូវសោដនាកម្មដ៍ព្រៃផ្សៃបំផុត ។
រំលឹកដឹងគុណមគ្គុទេសក៍ឯក និងប្រតិបត្តិករឈ្នៈឈ្នៈ ប្រែក្លាយតំបន់ប្រវត្តិសាស្រ្តកោះថ្មឱ្យមានតម្លៃជារម្យណីយដ្ឋានបម្រើឱ្យវិស័យវប្បធម៌ទេសចរណ៍ សេដ្ឋកិច្ច ទំនាក់ទំនងមិត្តភាពរវាងប្រទេស និងប្រជាជនប្រទេសជិតខាងទាំងពីរកម្ពុជា និងវៀតណាម (តាមប្រសាសន៍របស់សម្ដេចតេជោ សែន ប្រែក្លាយសមរភូមិឱ្យទៅជាទីផ្សារកសាងព្រំដែនសន្តិភាពមិត្តភាពសហប្រតិបត្តិការនិងការអភិវឌ្ឍ) ។
លុះព្រឹកឡើងថ្ងៃទី១១ ខែឧសភា ឆ្នាំ២០២៣គណៈប្រតិភូ បានបន្តមកទស្សនាវិមាន ឈ្នះឈ្នះ ដោយបានទទួលស្វាគមន៍យ៉ាងកក់ក្ដៅបំផុត ពីសំណាក់នាយឧត្តមសេនីយ៍ ណឹម សុវត្ថិ ទីប្រឹក្សាពិសេស សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ និងជាអគ្គនាយក អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ។
នាយឧត្តមសេនីយ៍ ណឹម សុវត្ថិ បានធ្វើបទបង្ហាញពីសំណង់វិមានឈ្នះឈ្នះ បានចាប់ផ្ដើមកសាងឡើងនៅឆ្នាំ២០១៦ លើទំហំដី ៨ហិកតា ស្ថិតនៅសង្កាត់ព្រែកតាសេក ខណ្ឌជ្រោយចង្វារ (ប៉ែកខាងជើងរាជធានីភ្នំពេញ)ដែលជានិមិត្តរូប នៃសុខសន្តិភាពដែលកម្ពុជាទទួលបានក្រោយពីបញ្ចប់សង្គ្រាមដ៏រ៉ាំរ៉ៃជាច្រើនទសវត្សរ៍កន្លងមក ហើយវិមាននេះ នឹងក្លាយជាមរតកសម្រាប់កូនចៅជំនាន់ក្រោយផងដែរ។
សម្ដេចតេជោ ហ៊ុន សែន ជាស្ថាបនិកនយោបាយឈ្នះឈ្នះ និងជាគោលនយោបាយដ៏ធំមួយក្នុងការដឹកនាំប្រទេសកម្ពុជា ដើម្បីនាំមកនូវការបញ្ចប់សង្រ្គាមស៊ីវិលទាំងស្រុង ដោយឈរលើការឯកភាពជាតិជាធំ ក្រោយរបបកម្ពុជាប្រជាធិបតេយ្យបានដួលរលំទៅនោះ បានដាក់ចេញនូវការប្រើប្រាស់និតិវិធីធ្វើយ៉ាងណាឱ្យប្រជាជនកម្ពុជាទាំងអស់បានមករួមរស់ជួបជុំគ្រួសារ និងសង្គមជាតិឡើងវិញ។
ការធានាទាំងនោះរួមមាន ការធានារូបរាងកាយ និងអាយុជីវិត, ការធានាអាជីពនិងមុខរបរ ការទទួលស្គាល់កម្មសិទ្ធិនិងទ្រព្យសម្បត្តិទាំងចលនទ្រព្យនិងអចលនទ្រព្យ ។ ការស្ថាបនាវិមានឈ្នះឈ្នះមានគោលដៅសំខាន់ៗចំនួន៥រួមមាន៖ ទី១) រម្លឹកសារៈសំខាន់នៃសន្តិភាព សមិទ្ធផលនិងដំណើរការដែលបាននាំឱ្យមានសន្តិភាពតាមគោលនយោបាយឈ្នៈឈ្នៈនិងការបង្រួបបង្រួមជាតិ, ទី២) គោរពនិងចារឹតទុកអំពីការលះបង់ការដឹកនាំ និងភាពច្នៃប្រឌិតរបស់មគ្គុទេសក៍ដឹកនាំ និងប្រតិបត្តិករស្នូលកម្ពុជា ដែលបាននាំមកនូវផ្សះផ្សារជាតិ និងបញ្ចប់សង្គ្រាមស៊ីវិលដោយគ្មានការបង្ហូរឈាមដែលនាំមកនូវវិបុលភាព និងសន្តិភាពដល់ប្រទេសកម្ពុជា, ទី៣) បង្កើតមជ្ឈមណ្ឌលមួយដែលផ្ដល់នូវការរៀនសូត្រដល់ប្រជាជនគ្រប់ជំនាន់ទាំងអស់ឱ្យបន្តការសិក្សា និងទទួលការយល់ដឹងពីប្រវត្តិសាស្រ្តពិតរបស់ប្រទេសកម្ពុជា និងបន្តអនុវត្តគោលនយោបាយឈ្នៈឈ្នៈរបស់តេជោសែននិងគុណតម្លៃក្នុងការធ្វើសមាហរណកម្មក្នុងដំណើរការកសាងដឹកនាំ និងអភិវឌ្ឍប្រទេសនាពេលអនាគត, ទី៤) បង្ហាញពីគុណតម្លៃវប្បធម៌ អរិយធម៌ និងស្ថាបត្យករខ្មែរតាមរចនាបទសិល្បៈនិមិត្តរូប និមិត្តសញ្ញា ចម្លាក់នានា និងហេដ្ឋារចនាសម្ពន្ធ័ផ្សេងៗ ដើម្បីឱ្យប្រជាជនគ្រប់ជំនាន់បានឈ្វេងយល់, ទី៥)បង្កើតគោលដៅទេសចរណ៍មួយនៅទីក្រុងភ្នំពេញ ដែលមានលក្ខណៈជាទេសចរណ៍ប្រវត្តិសាស្រ្ត វប្បធម៌ ក៏ដូចជាគោលដៅសម្រាប់ទស្សនកិច្ចសិក្សាស្រាវជ្រាវនានា៕
