(ភ្នំពេញ)៖ ឧកញ៉ា ឈាវ មុន្និន បានប្តឹងម្ចាស់គណនីហ្វេសប៊ុកឈ្មោះ «Da Da» ទៅកាន់អយ្យការអមសាលាដំបូងរាជធានីភ្នំពេញ ពីបទបរិហាកេរ្តិ៍ជាសាធារណៈ ជេរ​ប្រមាថ​​ជា​សាធារណៈ និងញុះញង់ឱ្យមានការរើសអើង។

ការប្តឹងនេះ បានធ្វើឡើងបន្ទាប់ពីម្ចាស់គណនីហ្វេសប៊ុកឈ្មោះ «Da Da» កាលពី​ថ្ងៃ​ទី៣១ ខែឧសភា ឆ្នាំ២០២៣កន្លងទៅនេះ បានបង្ហោះសារដោយចោទប្រកាន់​ឧកញ៉ា ឈាវ មុន្និន ជាអ្នករកស៊ីចងការប្រាក់ ហើយបោកលុយរបស់ខ្លួន។

ក្នុងពាក្យបណ្តឹងដាក់ទៅកាន់អយ្យការអមសាលាដំបូងរាជធានីភ្នំពេញនោះ ឧកញ៉ា ឈាវ មុន្និន ចាត់ទុកការបង្ហោះខាងលើនេះ គឺជាអំពើបរិហាកេរ្តិ៍ជាសាធារណៈ ជេរប្រមាថ​ជាសាធារណៈ និងញុះញង់ឱ្យមានការរើសអើងលើរូបលោក។ ជាពិសេសសកម្មភាព​នេះ បានធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់លោកនៅក្នុងសង្គមយ៉ាង​ធ្ងន់ធ្ងរជាទីបំផុត។

ឧកញ៉ា ឈាវ មុន្និន បានស្នើព្រះរាជអាជ្ញាអមសាលាដំបូងរាជធានីភ្នំពេញ ស្វែងរកម្ចាស់គណនីហ្វេសប៊ុកដែលមានឈ្មោះ «Da Da» និងឃាង់ខ្លួន ឃុំខ្លួន ដើម្បីបញ្ចប់បទល្មើស ឬបង្ការបទល្មើសកុំឱ្យកើតជាថ្មីទៀត និងផ្តន្ទាទោសទៅតាមផ្លូវច្បាប់។

ឧកញ៉ា ឈាវ មុន្និន ក៏បានទាមទារសំណងជំងឺចិត្ត និងសេវាផ្នែកច្បាប់ ជាទឹកប្រាក់ចំនួន ៥ម៉ឺនដុល្លារ។

សូមបញ្ជាក់ថា ឧកញ៉ា ឈាវ មុន្និន គឺជាឧកញ៉ាមួយរូប ដែលស្រឡាញ់កិច្ចការសង្គម ហើយតែងតែចូលរួមធ្វើសកម្មភាពមនុស្សធម៌នៅក្នុងសង្គមជាច្រើនផងដែរ៕