(ភ្នំពេញ)៖ សមត្ថភាពខ្លាំងជាងមុន ប្រសិទ្ធភាពត្រូវបានបង្កើន ដើម្បីឆ្លើយតបចំពោះការរីកលូតលាស់ឥតឈប់ឈរ ក្រុមហ៊ុន AirAsia បានចុះហត្ថលេខាលើការបញ្ជាទិញ ជាក់លាក់មួយនូវយន្ត​ហោះដឹកអ្នកដំណើរ A321neo ចំនួន១០០ គ្រឿង។

កិច្ចសន្យានេះត្រូវបានប្រកាសនៅ Farnborough Airshow ដោយប្រធានក្រុមនាយកប្រតិបត្តិ AirAsia លោក Tony Fernandes រួមជាមួយប្រធាន និងនាយកប្រតិបត្តិក្រុមហ៊ុន Airbus លោក Fabrice Brégier។

កិច្ចសន្យានេះតំណាងឱ្យការបញ្ជាទិញលើកទីមួយរបស់ AirAsia សម្រាប់យន្តហោះធំជាងគេក្នុងត្រកូល A320 ដែលលក់ដាច់បំផុតនេះ។ ដោយអាចផ្ទុកអ្នកដំណើរបានរហូតដល់ ២៣៦នាក់ យន្ត​ហោះ A321neo នឹងជួយបង្កើនសមត្ថភាព របស់ក្រុមហ៊ុនអាកាសចរណ៍ AirAsia ដោយផ្តល់តម្លៃប្រតិបត្តិការដ៏ទាប នៅក្នុងប្រភេទយន្តហោះ ដែលមានច្រកដើរតែមួយ។

ការប្រកាសនេះបង្ហាញថា ចំនួនសរុបនៃការបញ្ជារទិញគ្រួសារ A320 ដោយ AirAsia កើនឡើងដល់ ៥៧៥ គ្រឿង ហើយដែលបញ្ជាក់ជាថ្មីអំពីឋានៈរបស់ក្រុមហ៊ុនអាកាសចរណ៍មួយនេះ ក្នុងនាមជា​អតិថិជនធំជាងគេបំផុត សម្រាប់ខ្សែសង្វាក់ផលិតកម្មយន្តហោះ ដែលមានច្រកដើរតែមួយ។ គិតត្រឹមថ្ងៃនេះ មានយន្តហោះប្រភេទ A320s ចំនួន ១៧០ គ្រឿងហើយដែលត្រូវបានបញ្ជូន មកដល់ក្រុម​ហ៊ុនអាកាសចរណ៍នេះ ហើយដែលកំពុងហោះហើរនៅក្នុងប្រទេស ម៉ាឡេស៊ី ថៃ ឥណ្ឌា ឥណ្ឌូនេស៊ី និងហ្វីលីពីន។

លោក Tony Fernandes ដែលជាប្រធាននាយកប្រតិបត្តិរបស់ក្រុមហ៊ុន AirAsia បានឲ្យដឹងថា «បច្ចុប្បន្ន ក្នុងមួយថ្ងៃ AirAsia Group ធ្វើប្រតិបត្តិការជិត ១,០០០ ជើងទៅកាន់ទិស​ដៅធ្វើដំណើរ​ជាង ១២០ ទីតាំងនៅក្នុងប្រទេសចំនួន ២៤។ យើងបានបង្កើតកំណត់ត្រាកត្តាផ្ទុកដ៏រឹងមាំ ៨៥% នៅត្រីមាសទីមួយឆ្នាំ ២០១៦ ដោយមានពិន្ទុកើនឡើង ៨% ធៀបនឹងរយៈពេលដូចគ្នាកាលពីឆ្នាំមុន ហើយយើងមានទំនុកចិត្តយ៉ាងខ្ពស់ក្នុងការរក្សាសន្ទុះនេះ។ យន្តហោះ A321neo នឹងជួយយើងឱ្យឆ្លើយតបបាន​ទាំងស្រុងចំពោះតម្រូវ​ការដ៏ខ្ពស់ រួមទាំងការកាត់បន្ថយតម្លៃក្នុងមួយ Available Seat Kilometre (រង្វាស់សមត្ថភាពផ្ទុកអ្នកដំណើរ) បន្ថែមទៀតសម្រាប់អតិថិជនរបស់យើង។ យើងសូមអបអរក្រុមហ៊ុន Airbus ចំពោះការផលិតយន្តហោះប្រភេទ A321neo ទំនើបចុងក្រោយគេដែល​អាចឆ្លើយតប ចំពោះតម្រូវការសម្រាប់ប្រសិទ្ធភាព ប្រតិបត្តិការរបស់យើង»។

លោក Fernandes បានបន្ថែមទៀតថា «A321neo នឹងត្រូវធ្វើប្រតិបត្តិការ នៅលើផ្លូវហោះហើរពេញនិយមជាងគេរបស់យើង និងជាពិសេសនៅអាកាសយានដ្ឋាន ដែលមានបញ្ហា​ផ្នែកហេដ្ឋារចនាសម្ព័ន្ធ។ វានឹងអនុញាតឱ្យយើងដឹកជញ្ជូន អ្នកដំណើរកាន់តែច្រើននៅ​ក្នុងជើងតែមួយ ដែលនេះក៏ជាការផ្តល់អត្ថប្រយោជន៍ ដល់អាកាសយានដ្ឋានដែរ។ ក្នុងចំណោម​អត្ថប្រយោជន៍នានា ក៏មានរួមបញ្ចូលផងដែរនូវ ប្រសិទ្ធភាពប្រតិបត្តិការ កំណើនចំណូលពីសេវាអតិថិជន និងការជាវទំនិញរាយនៅអាកាសយានដ្ឋាន។ យើងនឹង​បន្តរក្សាពេល​វេលាដែលត្រូវចំណាយត្រឹម ២៥ នាទី ជាមួយនឹងការឡើងយន្តហោះ ២ ឬ ៣ ដំណាក់កាលដែលអាចធានា ចំពោះការប្រតិបត្តិទាន់ពេលវេលារបស់យើង»។

លោក Fabrice Brégier ប្រធាន និងនាយកប្រតិបត្តិក្រុមហ៊ុន Airbus បានថ្លែងថា «យើងរីករាយក្រៃលែងដែលទទួលបានការបញ្ជាទិញបន្ថែមទៀតពី AirAsia»។

 លោកថា «នេះជាសមិទ្ធិផលដ៏រឹងមាំមួយទៀតសម្រាប់សមាជិកគ្រួសារយន្តហោះដែលមានច្រកដើរតែមួយដ៏ធំជាងគេរបស់យើង ហើយដែលបច្ចុប្បន្នគឺជាក្រុមហ៊ុន​ឈានមុខ​គេយ៉ាង​ពិត​ប្រាកដ​នៅក្នុងប្រភេទយន្តហោះដែលមានកៅអីអង្គុយលើសពី ២០០។ យើងរង់ចាំមើល A321neo ហោះហើរដោយពណ៌របស់ AirAsia ហើយរួមចំណែកជួយឱ្យក្រុមហ៊ុន​អាកាសចរណ៍​នេះ​បន្តភាពជោគជ័យក្នុងនាមជាក្រុមហ៊ុនដឹកអ្នកដំណើរតម្លៃទាបឈានមុខគេលើពិភពលោក»។

គ្រួសារ A320 គឺជាយន្តហោះមានច្រកដើរតែមួយ ដែលលក់ដាច់ជាងគេបំផុតនៅលើពិភពលោកដោយមានការបញ្ជារទិញជិត ១២,៦០០ គ្រឿងហើយចាប់ពីបង្ហាញវត្តមានលើទីផ្សារមក និងមានជាង ៧,១០០ គ្រឿងត្រូវបានបញ្ជូនទៅដល់ក្រុមហ៊ុនដែលធ្វើប្រតិបត្តិការដោយយន្តហោះប្រភេទ 320 នៅទូទាំងពិភពលោក។ គ្រួសារ A320neo បានបញ្ចូលបច្ចេកវិទ្យាទំនើបចុងក្រោយគេដែលរួមមាន ម៉ាស៊ីនជំនាន់ថ្មី និងឧបករណ៍ចុងស្លាប Sharklet ដែលទាំងពីរនេះរួមគ្នាជួយសន្សំប្រេងឥន្ធនៈជាង ១៥% នៅថ្ងៃទីមួយ និង ២០% នៅឆ្នាំ ២០២០ ជាមួយនឹងការច្នៃប្រឌិតផ្ទៃខាងក្នុងបន្ថែមទៀត៕