(ភ្នំពេញ)៖ ក្រុមការងារព័ត៌មាន​ និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ​ បានបញ្ជាក់ថា នៅថ្ងៃទី២៧ ខែឧសភា ឆ្នាំ២០៣ អ្នកបើកបររថយន្តម៉ាកព្រូសពាក់ផ្លាកលេខភ្នំពេញ 2AA-8891 មានឈ្មោះ ឈឹម ពុទ្ធឧត្តម ភេទប្រុស អាយុ៣៧ឆ្នាំ មុខរបរជាងដាក់ GPS ទីលំនៅផ្ទះលេខ18D ផ្លូវលំ ភូមិត្រពាំង សង្កាត់កាកាប ខណ្ឌពោធិ៍សែនជ័យ បានចូលខ្លួនមកបំភ្លឺករណីខាងលើនៅអធិការដ្ឋាននគរបាលខណ្ឌចំការមន ភាគីខាងរថយន្តបានសារភាព និងទទួលកំហុសឆ្គងរបស់ខ្លួន ព្រមទាំងបានសម្របសម្រួលគ្នាជាមួយជនរងគ្រោះ ដោយបានឯកភាពគ្នាសងសំណងទៅស្ត្រីរងគ្រោះចំនួន២០០ដុល្លារ ដើម្បីបញ្ចប់រឿង។

លោកឧត្តមសេនីយ៍ត្រី សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឱ្យដឹងថា ទាក់ទងទៅរថយន្តម៉ាក Prius ពាក់ផ្លាកលេខ2AA.8891 ដែលបានបើកបរកៀម៉ូតូស្ត្រីម្នាក់បណ្ដាលឱ្យដួលរងរបួស កាលពីវេលាម៉ោង៨:១៩នាទី ថ្ងៃទី២១ ខែឧសភា ឆ្នាំ២០២៣ នៅចំណុចគល់ស្ពានព្រះមុនីវង្សចាស់ត្រើយខាងលិច សង្កាត់ទន្លេបាសាក់ខណ្ឌចំការមន

លោកឧត្តមសេនីយ៍ត្រី សាន សុខសីហា បន្ទាប់ពីបានឃេីញការផ្សាយព័ត៌មាននៅលើបណ្ដាញសង្គមទាក់ទងទៅនឹងករណីនេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានផ្តល់ព័ត៌មានឱ្យអធិការដ្ឋាននគរបាលខណ្ឌចំការមន ដេីម្បីធ្វើការស្រាវជ្រាវករណីគ្រោះថ្នាក់ចរាចរណ៍នៅគោលដៅគល់ស្ពានព្រះមុនីវង្សត្រើយខាងលិច ដែលរថយន្តម៉ាក់ prius បើកបរពីទិសខាងកើតទៅលិចបានបើកកៀម៉ូតូស្ត្រីម្នាក់បណ្ដាលឱ្យដួលម៉ូតូរងរបួស។ ក្រោយពេលកើតហេតុរថយន្តបានបើកគេចខ្លួនបាត់ ចំណែកឯស្ត្រីរងគ្រោះ ត្រូវបានបងប្អូនមកនាំយកទៅព្យាបាល។

ជាមួយគ្នានោះដែរសមត្ថកិច្ចបានធ្វើការណែនាំអប់រំ ធ្វើកិច្ចសន្យាជាមួយម្ចាស់រថយន្ត ដោយបានណែនាំដល់ជនបង្កឱ្យចូលរួមគោរពច្បាប់ចរាចរណ៍ និងបេីកបរដោយប្រុងប្រយ័ត្ន ចៀសវាងបង្កគ្រោះថ្នាក់ដល់អ្នកដ៏ទៃជាលេីកទី២ទៀត៕