(ភ្នំពេញ)៖ ទោះបីមានរយៈពេលជិត១០ឆ្នាំទៅហើយក្តី តែគេប្រហែលជាមិនទាន់ភ្លេចនៅឡើយទេជុំវិញការផ្ទុះបាតុភាពតវ៉ា និងអុកឡុកតាមមណ្ឌលបោះឆ្នោតក្នុងព្រឹត្តិការណ៍បោះឆ្នោតជ្រើសតាំងតំណាងរាស្ត្រនីតិកាលទី៥ ពីសំណាក់អ្នកគាំទ្រអតីតគណបក្សសង្គ្រោះជាតិ។
សមរភូមិនយោបាយនៅកម្ពុជាឆ្នាំ២០១៣ អាចរាប់ថាជាសមរភូមិដ៏ក្តៅគគុកមួយ និងមានការប្រកួតប្រជែងដ៏ស្រួចស្រាវរវាងគណបក្សប្រជាជនកម្ពុជា និងអតីតគណបក្សសង្គ្រោះជាតិ។
នៅល្ងាចថ្ងៃទី២៨ ខែកក្កដា ឆ្នាំ២០១៣ ក្រោយពេលមណ្ឌលបោះឆ្នោតនីមួយៗដល់ម៉ោងបិទទ្វារបញ្ចប់ការបោះឆ្នោត និងឈានទៅរាប់សន្លឹកឆ្នោតនោះ មានហេតុការណ៍ ភ្ញាក់ផ្អើលជាច្រើនបានកើតឡើង។ មណ្ឌលបោះឆ្នោតក្នុងរាជធានីភ្នំពេញជាច្រើន ត្រូវបានអ្នកគាំទ្រអតីតគណបក្សសង្គ្រោះជាតិចូលអុកឡុក មិនទទួលយកលទ្ធផលបោះឆ្នោត ដោយចោទប្រកាន់ថាមានភាពមិនប្រក្រតី។ មន្ត្រីរៀបចំការបោះឆ្នោតនៅ តាមមណ្ឌលបោះឆ្នោតមួយចំនួន ត្រូវបានអ្នកគាំទ្រអតីតបក្សសង្គ្រោះជាតិឃាត់ខ្លួនថែមទៀតផង។
កាន់តែធ្ងន់ធ្ងរថែមទៀតនោះ គឺមានការផ្ទុះអំពើហិង្សារវាងអ្នកគាំទ្រអតីតបក្សសង្គ្រោះជាតិ ជាមួយកម្លាំងសមត្ថកិច្ចនៅមុខវត្តស្ទឹងមានជ័យ រហូតដល់ការចាប់ខ្លួនសមត្ថកិច្ច និងដុតកម្ទេចរថយន្តរបស់កងរាជអាវុធហត្ថជាដើម។ នៅយប់ថ្ងៃបោះឆ្នោតនោះ ក៏មានការបិទផ្លូវនៅស្ពានអាកាសក្បាលថ្នល់ពីសំណាក់អ្នកគាំទ្រអតីតគណបក្សសង្គ្រោះជាតិផងដែរ។
បើគេមើលមួយភ្លែតអាចស្មានថា ជាការតវ៉ាទាមទាររកយុត្តិធម៌លើការបោះឆ្នោតពីសំណាក់អ្នកគាំទ្រអតីតបក្សសង្គ្រោះជាតិ។ តែគេមិនបានដឹងពីចេតនាទុច្ចរិតរបស់ថ្នាក់ដឹកនាំអតីតបក្សសង្គ្រោះជាតិ បង្កការអុកឡុកការបោះឆ្នោត ហើយបង្កើតជាលេសធ្វើសកម្មភាពខុសច្បាប់ដណ្តើមអំណាចពីបក្សដែលឈ្នះឆ្នោតនោះឡើយ។
រឿងអាក្រក់ល្អសខ្មៅមិនអាចលាក់បាំងជារៀងរហូតនោះឡើយ ពោលអ្វីៗនឹងត្រូវលាតត្រដាងទៅតាមពេលវេលាគ្រាន់តែយូរ និងឆាប់ប៉ុណ្ណោះ។ ១០ឆ្នាំក្រោយ បន្ទាប់ពីទឹកបានរងថ្លា ការពិតក៏ត្រូវបានលាតត្រដាងឱ្យឃើញនូវល្បិចកិច្ចកលដ៏អាក្រក់ និងពិសពុលរបស់អតីតបក្សសង្គ្រោះជាតិផងដែរ។
លោក គោរម្យ ដាឡា គឺជាមេចលនាមួយរូបក្នុងការកៀរគរនិស្សិត បញ្ញវន្ត ដើម្បីចូលរួមក្នុងសកម្មភាពតវ៉ាដែលរៀបចំដោយគណបក្សសង្គ្រោះជាតិនាពេលនោះ។ លោក គោរម្យ ដាឡា ក៏ជាមនុស្សដែលបានចូលរួមក្នុងសកម្មភាពតវ៉ានៅមណ្ឌលបោះឆ្នោត និងស្ថិតនៅក្នុងសកម្មភាពប៉ះទង្គិចនៅមុខវត្តស្ទឹងមានជ័យផងដែរ។
ក្នុងសន្និសីទសារព័ត៌មានមួយ លោក គោរម្យ ដាឡា បានទម្លាយថា រាល់ការតវ៉ានៅតាមមណ្ឌលបោះឆ្នោត គឺជាការរៀបចំមួយរបស់មេដឹកនាំអតីតបក្សសង្គ្រោះជាតិ។ លោកបានលើកឧទាហរណ៍នៅក្នុងមណ្ឌលបោះឆ្នោតក្នុងខណ្ឌមានជ័យ ក្រុមអ្នកគាំទ្រអតីតបក្សសង្គ្រោះជាតិ បានបង្ខំឱ្យមន្ត្រីរៀបចំការបោះឆ្នោត ទទួលស្គាល់សន្លឹកឆ្នោតមិនបានការ។ បន្ថែមពីលើនោះ ពួកគេបានចាប់បង្ខាំងមន្ត្រីរៀបចំការបោះឆ្នោត ព្រោះតែមិនធ្វើតាមគេថែមទៀតផង។
«ជាផែនការរបស់គេ គឺបង្កការអុកឡុកការបោះឆ្នោត និងបង្កើតឱ្យទៅជាហិង្សា។ បើមានហិង្សា គឺគេបានលេសដាក់សម្ពាធផ្សេងៗលើអាជ្ញាធរ និងសមត្ថកិច្ច»។ នេះជាការបញ្ជាក់របស់លោក គោរម្យ ដាឡា។
បើតាមលោក គោរម្យ ដាឡា ទាំងហិង្សានៅមុខវត្តស្ទឹងមានជ័យ និងហិង្សានៅលើផ្លូវវេងស្រេង គឺសុទ្ធតែជាការរៀបចំឡើងរបស់មេដឹកនាំអតីតបក្សសង្គ្រោះជាតិ។ បំណងរបស់ពួកគេ គឺចង់ប្រើកម្លាំងមហាជន ដើម្បីដណ្តើមអំណាចពីបក្សប្រជាជនកម្ពុជាតែម្តង៕
