(ភ្នំពេញ)៖ លោកស្រី ជា សិរី អគ្គទេសាភិបាលរងធនាគារជាតិនៃកម្ពុជា និងជាអនុប្រធានទី១ក្រុមការងារថ្នាក់កណ្តាលចុះជួយស្រុកសន្ទុកបានលើកទឹកចិត្តយុវជន ជ្រើសយកការលេងកីឡា តាមជំនាញ និងចំណង់ចំណូលចិត្តរបស់ខ្លួន ហើយចៀសឱ្យឆ្ងាយ ពីគ្រឿងញៀន និងការប្រព្រឹត្តភាពអសកម្មនានា នៅក្នុងសង្គម។
ការលើកឡើង របស់លោកស្រី ជា សិរី ធ្វើឡើងក្នុងឱកាសចូលរួមបើកការប្រកួតបាល់ទាត់មិត្តភាព រវាងយុវជន ឃុំប្រាសាទ និងឃុំកំពង់ថ្មនៅថ្ងៃទី១៥ ខែឧសភា ឆ្នាំ២០២៣។
ក្រុមការងារចុះជួយស្រុក និងក្រុមយុវជនគណបក្សស្រុកសន្ទុក បានរៀបចំការប្រកួតបាល់ទាត់មិត្តភាព រវាងយុវជនឃុំប្រាសាទ និងឃុំកំពង់ថ្ម ដើម្បីអបអរការប្រកួតកីឡាស៊ីហ្គេមលើកទី៣២ ដែលប្រទេសកម្ពុជាធ្វើជាម្ចាស់ផ្ទះ និងដើម្បីពង្រីកកិច្ចសហប្រតិបត្តិការ រវាងយុវជន និងយុវជន ឱ្យកាន់តែល្អប្រសើរឡើងបន្ថែមទៀត។
ការរៀបចំការប្រកួតបាល់ទាត់មិត្តភាព រវាងយុវជនឃុំប្រាសាទ និងឃុំកំពង់ថ្ម ធ្វើនៅថ្ងៃទី១៤ ខែឧសភាឆ្នាំ២០២៣បិតបញ្ចប់ការប្រកួតនៅអំឡុងសប្តាហ៍ទី៤ នៃខែមិថុនា ឆ្នាំ២០២៣ ក្នុងនោះសម្រាប់រង្វាន់លើក ទឹកចិត្តដល់ជ័យលាភីលេខ ១ ទទួលបានថវិកា១ លានរៀល,លេខ២ចំនួម៧០ម៉ឺនរៀល និងលេខ៣ថវិកាចំនួន៥០ម៉ឺនរៀល។
លោក ឡង គីសឹង ប្រធានគណបក្សស្រុកសន្ទុក បានចាត់ទុកវត្តមាន លោកស្រី ជា សិរី ក្នុងការបើកប្រកួតបាល់ទាត់មិត្តភាពរវាងយុវជនឃុំប្រាសាទ និងឃុំកំពង់ថ្មនាថ្ងៃនេះ បានបង្ហាញឲ្យឃើញច្បាស់ អំពីគុណតម្លៃដ៏ឧត្តុង្គឧត្តមរបស់ថ្នាក់ដឹកនាំទាំងបក្សទាំងរដ្ឋ ដែលជានិច្ចកាលតែងផ្សារភ្ជាខ្លួន ជាមួយក្រុមយុវជនគ្រប់លំដាប់ថ្នាក់ ហើយតាមរយៈនេះក៏បានបង្កើននូវជំនឿទុកចិត្ត និងការផ្សារភ្ជាប់មនោសញ្ចេតនាជ្រាលជ្រៅ ជាមួយយុវជនតាមមូលដ្ឋានថែមទៀតផង។
លោកស្រី ជា សិរី បានលើកឡើងថា ពិតជាមានការសប្បាយរីករាយយ៉ាងក្រៃលែង ដែលបានចូលរួមក្នុងពិធីបើកការប្រកួត បាល់ទាត់មិត្តភាពយុវជននៅឃុំប្រាសាទ និងកំពង់ថ្មក្រោមប្រធានបទ កីឡារស់ក្នុងសន្តិភាព។
លោកស្រីបានបញ្ជាក់ដែរថា «ការប្រកួតបាល់ទាត់មិត្តភាពក្របខណ្ឌយុវជននេះ រៀបចំឡើង ដើម្បីលើកកម្ពស់សកម្មភាព ការលេងកីឡាឱ្យបានកាន់តែទូលំទូលាយននៅតាមមូលដ្ឋាន ដើម្បីសុខភាព មិត្តភាព និងសាមគ្គីភាពជាមួយគ្នាកាន់តែជិតស្និទ្ធបន្ថែមទៀត។ កម្មវិធីប្រកួតបាល់ទាត់មិត្តភាពយុវជននាពេលនេះ ក៏ត្រូវបានធ្វើឡើងស្របពេលដែលប្រទេសកម្ពុជា កំពុងធ្វើជាម្ចាស់ផ្ទះននៃការប្រកួតកីឡាស៊ីហ្គេមលើកទី៣២ ដែលបានចាប់ផ្តើមពីថ្ងៃទី៥-១៧ ខែឧសភា ឆ្នាំ២០២៣។
លោកស្រីបានបញ្ជាក់ថា «តាមរយៈនៃការលេងកីឡាបានជាប្រចាំពីយុវជនម្នាក់ៗ នឹងផ្ដល់នូវអត្ថប្រយោជន៍យ៉ាងច្រើនទាំងសម្រាប់សុខភាព រាងកាយ និងប្រាជ្ញាស្មារតី ព្រមទាំងពង្រឹង និងពង្រីកកិច្ចសហប្រតិបត្តិការរវាងយុវជន និងយុវជន ឱ្យកាន់តែល្អប្រសើរឡើងបន្ថែមទៀត។ ដូច្នេះយុវជនយើងគប្បីជ្រើសរើសយកការលេងកីឡាផ្សេងៗ ទៅតាមជំនាញនិងចំណង់ចំណូលចិត្តរបស់ខ្លួន ហើយត្រូវចៀសវាងឱ្យឆ្ងាយពីការប្រើប្រាស់ គ្រឿងញៀន គ្រឿងស្រវឹង ការលេងល្បែងស៊ីសង និងការប្រព្រឹត្តភាព អសកម្មនានានៅក្នុងសង្គម»។
លោកស្រី ជា សិរី ក៏បានអញ្ជើញចុះទៅប្រគល់ផ្ទះថ្មីចំនួន២ខ្នង និងប្រកាសជួយសាងសង់ថ្មី៣ខ្នង បន្ថែមដល់គ្រួសារចាស់ជរា គ្រួសារខ្វះខាត និងនិវត្តិជនរស់នៅឃុំប្រាសាទនិងបាននាំយកអំណោយដ៏ថ្លៃថ្លារបស់លោបណ្ឌិត ជា ចាន់តូ សមាជិកគណៈអចិន្ត្រៃយ៍ គណៈកម្មាធិការកណ្ដាល និងជាប្រធានក្រុមការងារគណបក្សចុះមូលដ្ឋានខេត្តកំពង់ធំ និងលោកស្រីរួមមានគ្រឿងឧបភោគបរិភោគ និងថវិកាមួយចំនួនចែកជូនគ្រួសារទាំងនោះផងដែរ៕
