(កណ្ដាល)៖ លោក យូ សិរីវុឌ្ឍ ប្រធានក្រុមការងារកសាងសមាជិកបក្សគណបក្សប្រជាជនកម្ពុជា ក្នុងជួរកម្មករ និយោជិក នៅខេត្តកណ្តាល នៅថ្ងៃទី១៤ ខែឧសភា ឆ្នាំ២០២៣ បានសំណេះសំណាល និងសួរសុខទុក្ខកម្មករនិយោជិត ដែលជាចូលរួមជាសមាជិកគណបក្សប្រជាជនកម្ពុជា នៅក្រុមហ៊ុន ជារួយហ្វេង ចំនួន៩២៥នាក់ ដែលមានទីតាំងស្ថិតនៅភូមិអង្គតាសិត ឃុំទួលព្រេជ ស្រុកអង្គស្នួល ខេត្តកណ្តាល។
ក្នុងជំនួបសំណេះសំណាល និងសួរសុខទុក្ខនេះ ក៏មានការចូលរួមពី លោក ភឺន ផល្លា ជំនួយការសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងលោក គង់ លីវ៉ា ជំនួយការសម្តេចតេជោ ហ៊ុន សែន ព្រមទាំងថ្នាក់ដឹកនាំ សមាជិក សមាជិកាជាច្រើនរូបទៀតផងដែរ។
ថ្លែងក្នុងឱកាសនោះ លោក យូ សិរីវុឌ្ឍ បាននាំនូវការផ្ដាំផ្ញើសាកសួរសុខទុក្ខរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធានគណបក្សប្រជាជនកម្ពុជា ជូនដល់សមាជិក សមាជិកាគណបក្សប្រជាជនកម្ពុជាទាំងអស់ ដោយក្ដីនឹករលឹកជាទីបំផុត។
ស្របពេលដែលការបោះឆ្នោតជ្រើសតាំងតំណាងរាស្ដ្រ នីតិកាលទី៧ កាន់តែខិតជិតចូលមកដល់នោះ លោក យូ សិរីវុឌ្ឍ បានក្រើនរំលឹកដល់សមាជិក សមាជិកគណបក្សប្រជាជនកម្ពុជាទាំងអស់ ត្រូវត្រៀមខ្លួនដើម្បីចូលរួមការបោះឆ្នោតដ៏សំខាន់មួយនេះ ដើម្បីយកជ័យជម្នះឲ្យបានជាដាច់ខាត៕
