(ភ្នំពេញ)៖ នៅរសៀលថ្ងៃទី១២ ខែឧសភា ឆ្នាំ២០២៣នេះ លោក ធឹម សំអាន អភិបាលខណ្ឌព្រែកព្នៅ បានដឹកនាំមន្ត្រីជំនាញ ចុះពិនិត្យមើលការស្ថាបនាផ្លូវបេតុង ស្ថិតនៅភូមិទួលពន្សាំង ភូមិព្រៃស្នួល ភូមិតាស្គរ រហូតដល់ភូមិត្នោតខ្ពស់ នៃសង្កាត់ពន្សាំង។
លោកអភិបាលខណ្ឌ បានបញ្ជាក់ថា កន្លងមកផ្លូវនេះជាផ្លូវដី ដែលលោក ឃួង ស្រេង អភិបាលរាជធានីភ្នំពេញ បានជួយឧបត្ថម្ភជាថវិកា ចំនួន២១,៤០០ដុល្លារ។
លោកបន្ថែមថា ហើយក្រោយមកមូលនិធិខណ្ឌ ក៏បានស្ថាបនាជាផ្លូវបេតុងវិញ បានប្រវែង១,២០០ម៉ែត្រ។ លុះថ្មីៗនេះ ដោយមានការស្នើសុំពីចៅសង្កាត់ពន្សាំងទៅលោក ឃួង ស្រេង ហើយលោកក៏បានសម្រេចជួយស្ថាបនាបន្ថែម ចំនួន ១,១០០ម៉ែត្រទៀត កំរាស់១តឹកកន្លះ ដោយបានឆ្អឹងដែក និងចាក់បេតុងបានត្រឹមត្រូវ។
នាឱកាសចុះពិនិត្យផ្លូវបេតុង ដែលជាអំណោយរបស់លោក ឃួង ស្រេង អភិបាលរាជធានីភ្នំពេញ និងលោកស្រី ជា ស៊ីណាត ឃួង ស្រេងនោះ ក៏មានការអមដំណើរដោយអភិបាលរងខណ្ឌ និងចៅសង្កាត់ពន្សាំង ព្រមទាំងប្រជាពលរដ្ឋផងដែរ។
បន្ទាប់ពីចុះពិនិត្យផ្លូវបេតុងនេះ លោក ធឹម សំអាន បានដឹកនាំមន្ត្រី បន្តចុះត្រួតពិនិត្យការស្តារប្រឡាយបឹងក្រចាប់ ដើម្បីរំដោះទឹកបឹងក្រចាប់ កុំឲ្យជន់លិច និងដើម្បីបានទឹកប្រើប្រាស់ សម្រាប់ប្រជាពលរដ្ឋបង្កបង្កើនផល។ លោកអភិបាលខណ្ឌបញ្ជក់ថា ការប្រឡាយនេះ ក្រោយការស្តាររួចរាល់ បង្កើតបានជាហេដ្ឋារចនាសម្ព័ន្ធផ្លូវទឹក បានផ្តល់ផលប្រយោជន៍ ដល់ប្រជាកសិករបង្កបង្កើនផល ពិសេសអាចបើកការណូតបានផងដែរ។
នាឱកាសនោះ ប្រជាពលរដ្ឋបានសម្តែងការសារទរ ដោយសេចក្តីរីករាយយ៉ាងខ្លាំង ចំពោះការជួយស្ថាបនាផ្លូវបេតុងមួយខ្សែនេះ ហើយពួកគាត់សន្យាថា នឹងតបស្នងសងដល់លោក ឃួង ស្រេង អភិបាលរាជធានីភ្នំពេញ ដោយបោះឆ្នោតជូនគណ:បក្សប្រជាជនកម្ពុជាគ្រប់ៗគ្នា។
ខណៈចុះពិនិត្យការស្ថាបនាផ្លូវបេតុងនេះ លោក ធឹម សំអាន ក៏បានឃើញប្រជាពលរដ្ឋដែលមានជំងឺ កំពុងសំរាកព្យាបាលនៅក្នុងផ្ទះដោយក្តីអាណិតអាសូរ ក្នុងនាមជាកូន ជាចៅ លោកក៏បានជួយឧបត្ថម្ភជាថវិកា១០០ដុល្លារ ដើម្បីជួយរំលែកនូវទុក្ខលំបាកដល់គាត់៕
