(ភ្នំពេញ)៖ ជាថ្មីម្តងទៀត លោក គៀត ច័ន្ទថារិទ្ធ អគ្គស្នងការរងនគរបាលជាតិ បានជំទាស់នឹងគំនិតមន្រ្តី​គណបក្សប្រឆាំង ដែលចង់ឱ្យបរទេស​ចូលរួមស៊ើបអង្កេត ករណីឃាតកម្មលើ លោកបណ្ឌិត កែម ឡី អ្នកវិភាគនយោបាយនៅកម្ពុជា។ លោកថា កម្ពុជាមានឯករាជ​ភាពរបស់ខ្លួន ដោយមិនចាំបាច់ឱ្យបរទេស លូកដៃនៅក្នុងរឿងនេះទេ។

លោកនាយឧត្តមសេនីយ៍ គៀត ច័ន្ទថារិទ្ធ បានថ្លែងប្រាប់សារព័ត៌មាន Fresh News ថា «ស្រុកខ្មែរគឺមានឯករាជភាព ស្រុកខ្មែរមានអធិបតេយ្យភាពមានរឿងអី ទៅយកបរទេសទៅត្រួត ពួកខ្ញុំជាកងកម្លាំងនគរបាលជាតិ មិនមែនកងកម្លាំងនគរបាលគណបក្សទេ។ កន្លងមកឃាតកម្មច្រើនណាស់ ករណីរាប់រយរាប់ពាន់ ដែលកម្លាំងនគរបាលជាតិ ហើយបានផ្តន្ទាទោស ឥឡូវសឹងតែរកគុកដាក់គ្មាន ម្តេចចាំបាច់ទៅយកបរទេសណាមកត្រួតត្រាទៀត»។

លោក គៀត ច័ន្ធថារិទ្ធ បានស្នើឱ្យប្រជាពលរដ្ឋ និងអង្គការសង្គមស៊ីវិលបន្តអត់ធ្មត់ទុកឱ្យសមត្ថកិច្ចធ្វើការឱ្យបានពេញលេញ។ លោកថា សមត្ថកិច្ចប្តេជ្ញាថា នឹងខិតខំស្វែងរកអ្នកដែល​ពាក់ព័ន្ធក្នុងការបាញ់សម្លាប់លោក កែម ឡី ទៅផ្តន្ទាទោស។

លោកនិយាយថា «មិនមែនអង្គការមួយចំនួនហ្នឹងឈឺចាប់ជាងនគរបាលទេ នគរបាលឈឺចាប់ជាងអង្គការអស់ហ្នឹងទៀតព្រោះហេតុអ្វី? ព្រោះនេះជាភារកិច្ច ជាតួនាទីនគរបាល អញ្ចឹងជាកិត្តិយសរបស់នគរបាល នគរបាលនឹងខិតខំរកឱ្យឃើញ ប៉ុន្តែត្រូវយល់ថា ឃាតកម្មមួយៗ ឃាតក និងអ្នកពាក់ព័ន្ធបានលាក់មុខ នៅក្នុងកន្លែងងងឹត ឯនគរបាល​នៅកន្លែងភ្លឺ អញ្ចឹងពេលខ្លះនគរបាលមិនត្រូវបញ្ចេញអ្វីភ្លាមៗទេ»។

នាថ្មីៗនេះ មន្រ្តីជាន់ខ្ពស់គណបក្សសង្រ្គោះជាតិ បានអំពាវនាវឱ្យសហគមន៍អន្តរជាតិជាពិសេស អង្គការសហប្រជាជាតិ ចូលរួមស៊ើបអង្កេតលើករណីបាញ់សម្លាប់ លោកបណ្ឌិត កែម ឡី អ្នកស្រាវជ្រាវ​សង្គម និងជាអ្នកវិភាគនយោបាយ នៅក្នុងប្រទេសកម្ពុជា។ លោក អេង ឆៃអ៊ាង តំណាងរាស្រ្តគណបក្សសង្រ្គោះជាតិ បានលើកឡើងថា «យើងសូមឱ្យមានការស៊ើបអង្កេត ដែលមានការចូលរួម​ជា​លក្ខណៈអន្តរជាតិ ជាពិសេសអង្គការសហប្រជាជាតិ ដើម្បីបញ្ចប់នូវមនុស្សឃាត ដ៏សាហាវយង់ខ្នងនៅប្រទេសកម្ពុជា ហើយក៏ដើម្បីបញ្ចប់​ពាក្យថាវាមិនពាក់ព័ន្ធនឹងរឿងនយោបាយ»។
 
កាលពីម្សិលមិញ អង្គការសង្គមស៊ីវិលជាង១០០ស្ថាប័ន ក៏បានចេញសេចក្តីថ្លែងការណ៍មួយដែរ ដោយអំពាវនាវឱ្យសហគមន៍អន្តរជាតិពិនិត្យតាមដានឱ្យ បានហ្មត់ចត់នូវស្ថានភាព និងការស៊ើបអង្កេតករណីឃាតកម្មលើ លោកបណ្ឌិត កែម ឡី និងផ្តល់ការគាំទ្រចាំបាច់ដល់គ្រួសាររបស់សព លោកបណ្ឌិត កែម ឡី ថែមទៀត។

សូមបញ្ជាក់ថា លោកបណ្ឌិត កែម ឡី អ្នកវិភាគឯករាជ្យ ត្រូវបានឃាតកចូលបាញ់សម្លាប់ ខណៈលោកអង្គុយទទួលកាហ្វេ នៅក្នុងស្តាម៉ាតស្ថានីយ៍សាំងកាលតិចស្តុបបូកគោ កាលពីម៉ោង​៨៖៥០នាទី​ព្រឹក ថ្ងៃទី១០ ខែកក្កដា ឆ្នាំ២០១៦។ លោក កែម ឡី ត្រូវបានឃាតកបាញ់ចំនួន២គ្រាប់ ដោយ ១គ្រាប់ត្រូវចំក្បាល និងមួយគ្រាប់ទៀតចំដើមដៃធ្លាយទៅដល់ក្រោមដោះ បណ្តាលឱ្យស្លាប់​នៅកន្លែង​កើត​ហេតុតែម្តង។

ករណីឃាតកម្មនេះ សមត្ថកិច្ចបានឃាត់ខ្លួនបុរសម្នាក់ ភ្លាមៗបន្ទាប់ពីកើតហេតុ ហើយពេលនេះ បុរសខ្មាន់កាំភ្លើងដែលអះអាងថាឈ្មោះ «ជួប សម្លាប់» ក៏ត្រូវបានតុលាការឃុំខ្លួនផងដែរ។ តាមការចោទប្រកាន់របស់តំណាងអយ្យការពីបទ ឃាតកម្មគិតទុកជាមុន បុរសខាងលើអាចប្រឈមនឹង ការជាប់ពន្ធនាគារអស់មួយជីវិត៕