(តួកគី)៖ យោងតាមការចេញផ្សាយ Update របស់សារព័ត៌មាន CNN នៅមុននេះបន្តិចបានឲ្យដឹងថា​ កង​កម្លាំងយោធា ៧៥៤នាក់ នៅទូទៅប្រទេសត្រូវបានចាប់ខ្លួន ពាក់ព័ន្ធនឹងករណីធ្វើរដ្ឋប្រហារដោយកម្លាំង​យោ​ធា​នៅព្រឹកថ្ងៃទី១៦ ខែកក្កដានេះ។ នេះបើការលើកឡើងរបស់រដ្ឋមន្ត្រីក្រសួងមហាផ្ទៃ។

នៅមុននេះប្រធានាធិបតីតួកគី លោក Recep Erdogan បានប្រកាសឲ្យដឹងថា នៅពេលនេះរដ្ឋប្រហារ​ដោយ​យោធាត្រូវបានបញ្ចប់ ហើយនៅខណៈនេះ រដ្ឋាភិបាលបាននិងកំពុងតែគ្រប់គ្រង់ស្ថាន​ការណ៍ទាំងមូល។

ក្រោយពីលោកប្រធានាធិបតីតួកគី បានប្រកាសថា រដ្ឋប្រហារយោធាត្រូវបានបញ្ចប់ សារព័ត៌មាន Reuters ក៏បានរាយការណ៍មកថា មានមនុស្ស ៦០នាក់បានស្លាប់ និងរបួស១៥០នាក់ ហើយក្នុងចំណោមអ្នកស្លាប់​ទាំងនោះ ​មាន​មន្ត្រីប៉ូលិស១៧នាក់។

លោក Erdogan បានថ្លែងថា «ខ្ញុំកំពុងដោះស្រាយបញ្ហា។ អំពើក្បត់របស់អ្នកចំពោះប្រទេសជាតិមួយនេះ វាត្រូវបានបញ្ចប់។ យើងមិនអនុញ្ញាតឲ្យអ្នកបង្កភាពចលាចល និង​ភាពរញ៉េរញ៉ៃ​ម្ដងទៀតឡើយ»។

ប្រធានាធិបតីតួកគី លោក Tayyip Erdogan បាននិយាយដោយចំពោះទៅកាន់យោធាថា «យើងមិនអាចទទួលយកអ្នកណា ដែលយកកាំភ្លើងមកភ្ជង់ម្តាយខ្លួនឯងនោះទេ»។ លោកក៏បាន​អះអាងបន្ថែម​ទៀតថា លោកនឹងបោសសម្អាតឬសគល់ទាំងអស់ ដែលចង់ធ្វើរដ្ឋប្រហារ ខណៈទីក្រុងកម្សាន្តចុងសប្តាហ៍ របស់លោកមួយនៅភាគត្បូងប្រទេស ត្រូវបានគេបំផ្ទុះគ្រាប់បែក។ ទោះជាបែបនេះក្តីលោក Erdogan នៅតែបញ្ជាក់ថា អ្នកដែលចូលរួមរដ្ឋប្រហារទាំងអស់ ត្រូវទទួលការតបស្នងតាមដែលអាចទៅរួច។

គួរបញ្ជាក់ផងដែរថា ប្រទេសតួកគី ធ្លាប់ជួបករណីរដ្ឋប្រហារ​ចំនួន ៤ដងរួចមកហើយ គឺនៅឆ្នាំ ១៩៦០, ១៩៧១, ១៩៨០ និង ១៩៩៧ ចំណែកនៅឆ្នាំ ២០១៦នេះ គឺជាលើកទី៥៕