(កណ្តាល)៖ លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម និងជាប្រធានក្រុមការងារថ្នាក់ជាតិ ចុះជួយស្រុកពញឮ ខេត្តកណ្តាល រួមជាមួយលោកអភិបាលស្រុកពញាឮ នៅថ្ងៃទី០៧ ខែឧសភា ឆ្នាំ ២០២៣នេះ បានអញ្ជេីញចុះពិនិត្យវឌ្ឍនភាពនៃការសាងសង់សាលារៀនអនុវិទ្យាល័យ១ខ្នង មាន៨ បន្ទប់ តម្លៃ ១៤២,៧០០ដុល្លារ ស្ថិតក្នុងវិហារឃ្លាំងស្បែក ភូមិឃ្លាំងស្បែក ឃុំកំពង់លួង ស្រុកពញាឮ ដែលជាអំណោយសប្បុរសធម៌ដ៏ថ្លៃថ្លារបស់លោករដ្ឋមន្រ្តី។
គិតត្រឹមថ្ងៃនេះការងារសាងសង់សម្រេចបានប្រមាណ ៨១% ហេីយគ្រោងនឹងបញ្ចប់ការងារសាងសង់ ១០០% នៅកំឡុងចុង ខែឧសភា ឆ្នាំ២០២៣នេះ។
ក្នុងឱកាសអញ្ជេីញចុះពិនិត្យជាក់ស្តែងនេះ លោករដ្ឋមន្ត្រី បានទទួលយកនូវសំណូមពររបស់លោកគ្រូ អ្នកគ្រូ និងគណៈកម្មការសាលា ដោយបានឧបត្ថម្ភនូវ តុ កៅអី សម្រាប់សិស្សានុសិស្សសិក្សា ដល់សាលាអនុវិទ្យាល័យទាំង ៨ បន្ទប់ផងដែរ។
ឆ្លៀតក្នុងឱកាសនេះ លោករដ្ឋមន្រ្តី ក៏បានអញ្ជើញចូលរួមជួបសំណេះសំណាលជាមួយ គណៈចលនាកម្មករ-កម្មការិនីស្រុកពញាឮ បងប្អូនកម្មករ-កម្មការិនីប្រចាំឃុំទាំង ១១នាក់ និងតំណាងមណ្ឌលតាមបណ្តាភូមិទាំង ១៥៩នាក់ នៃស្រុកពញាឮ៕
