(តួកគី)៖ យោងតាមការចេញផ្សាយ Update របស់ទីភ្នាក់ងារព័ត៌មានចិនស៊ិនហួ នៅមុននេះបន្តិចបាន​ឲ្យដឹង​ថា​ ចំនួនអ្នកស្លាប់នៅក្នុងករណីរដ្ឋប្រហារយោធានៅក្នុងប្រទេសតួកគី បានកើនឡើងដល់ ៦០នាក់ ខណៈ​មននុស្ស ១២០នាក់ត្រូវបានចាប់ខ្លួន។

នៅមុននេះសារព័ត៌មាន Reuters បានរាយការណ៍មកថា ក្នុងចំណោមអ្នកស្លាប់ទាំងនោះ មាន​មន្ត្រីប៉ូលិស ១៧នាក់ និង​មាន​អ្នករបួស ១៥០នាក់​ ចំណែកទីភ្នាក់ងារព័ត៌មានតួកគី Anadolu បានចេញផ្សាយផងដែរថា ជើងហោះហើរទាំងអស់នៅក្នុង​អាកាសយានដ្ឋាន Ataturk International Airport បានធ្វើចរាចរណ៍ឡើងវិញដូចធម្មតា។

ប្រធានាធិបតីតួកគី លោក Tayyip Erdogan បាននិយាយដោយចំពោះទៅកាន់យោធាថា «យើងមិនអាចទទួលយកអ្នកណា ដែលយកកាំភ្លើងមកភ្ជង់ម្តាយខ្លួនឯងនោះទេ»។ លោកក៏បាន​អះអាងបន្ថែម​ទៀតថា លោកនឹងបោសសម្អាតឬសគល់ទាំងអស់ ដែលចង់ធ្វើរដ្ឋប្រហារ ខណៈទីក្រុងកម្សាន្តចុងសប្តាហ៍ របស់លោកមួយនៅភាគត្បូងប្រទេស ត្រូវបានគេបំផ្ទុះគ្រាប់បែក។ ទោះជាបែបនេះក្តីលោក Erdogan នៅតែបញ្ជាក់ថា អ្នកដែលចូលរួមរដ្ឋប្រហារទាំង អស់ត្រូវទទួលការតបស្នងតាមដែលអាចទៅរួច។

សូមបញ្ជាក់ថា រហូតមកដល់ពេលនេះ គេនៅមិនទាន់ដឹងថា តើខាងណាជាអ្នកឈ្នះឲ្យពិតប្រាកដនោះទេ ខណៈទាំងយោធាធ្វើរដ្ឋប្រហារ និងមេដឹកនាំរដ្ឋាភិបាល អះអាងពីការគ្រប់គ្រងស្ថានការណ៍ទូទាំងប្រទេសបានរៀងៗខ្លួន៕