(ភ្នំពេញ)៖ លោក ថា យ៉ាវ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារចុះស្រុកស្ទោង លើកឡើងថា គណបក្សប្រជាជនកម្ពុជា នៅតែទទួលស្វាគមន៍ជានិច្ច ចំពោះបងប្អូនដែលស្ម័គ្រចិត្ត ដោយស្មោះចូលមករួមរស់ជាមួយគណបក្សប្រជាជនកម្ពុជា។
ការបញ្ជាក់របស់លោក ថា យ៉ាវ ធ្វើឡើង ក្នុងពិធីប្រកាសទទួលស្គាល់សមាជិកថ្មីចំនួន៩០៤នាក់ មកពីឃុំ២របស់ស្រុកស្ទោង គឺឃុំចំណារក្រោម និងឃុំសំព្រោជ ជាសមាជិកគណបក្សប្រជាជនកម្ពុជា ស្រុកស្ទោងធ្វើនៅថ្ងៃទី៦ ខែឧសភា ឆ្នាំ២០២៣។
លោក ថា យ៉ាវ បានលើកឡើងថា ក្នុងនាមប្រធានក្រុមការងារ ចុះជួយខេត្តកំពង់ធំ និងក្រុមការងារចុះជួយស្រុកស្ទោង សូមការស្វាគមន៍ចំពោះសមាជិកថ្មីទាំង៩០៤រូប និងបានចាត់ទុកការចូលមករួមរស់ ក្នុងជីវភាពនយោបាយជាមួយគណបក្សប្រជាជនកម្ពុជា របស់បងប្អូនទាំង៩០៤នាក់ ជាការសម្រេចចិត្តដ៏ត្រឹមត្រូវបំផុត ព្រោះបច្ចុប្បន្ននេះមិនមានគណបក្សនយោបាយណាមួយ មានគោលនយោបាយ ច្បាស់លាស់ ក្នុងការដឹកនាំប្រទេសជាតិ ឲ្យមានការរីកចម្រើនដូចគណបក្សប្រជាជនកម្ពុជានោះទេ។
លោកបានបញ្ជាក់ថា ជាងនេះទៀតថ្នាក់ដឹកនាំគណបក្សប្រជាជនកម្ពុជា គ្រប់លំដាប់ថ្នាក់ពិសេសសម្ដេចតេជោ ហ៊ុនសែន ប្រធានគណបក្ស តែងតែរស់នៅរួមសុខរួមទុក្ខជាមួយប្រជាជនកម្ពុជា គ្រប់ពេលវេលា និងគ្រប់កាលៈទេសៈទាំងអស់ ហើយក៏មិនដែលរត់ចោលប្រជាជននោះទេ មិនតែប៉ុណ្ណោះនៅពេលប្រជាជនជួបការលំបាកខ្វះខាតក៏ដូចជួបគ្រោធម្មជាតិផ្សេងៗ គណបក្សប្រជាជនកម្ពុជា តែងចុះជួយសង្រ្គោះបានទាន់ពេលវេលាថែមទៀត និយាយរួមមិនដែលបោះបង់ និងបានមិនគិតដល់សុខទុក្ខ របស់ប្រជាជនម្ដងនោះទេ។ ដូចនេះយើងត្រូវតែបន្តរួមសុខរួមទុក្ខ ជាមួយគ្នាជាបន្តទៀត ដើម្បីភាពសុខសាន្តរបស់ប្រជាជន និងការនាំមកនូវការអភិវឌ្ឍលើគ្រប់វិស័យដល់ជាតិមាតុភូមិ និងកូនចៅជំនាន់ក្រោយៗ។
លោកប្រធានក្រុមការងាររូបនេះ នូវបានចាត់ទុកការចូលរួម របស់សមាជិក សមាជិកាថ្មីទាំង៩០៤នាក់ នាពេលនេះគឺជាបង្ហាញឲ្យឃើញយ៉ាងច្បាស់ការជឿជាក់ និងការគាំទ្រចំពោះការដឹកនាំដ៏ត្រឹមត្រូវ របស់គណបក្សប្រជាជនកម្ពុជា។
តាមរយ:សមាជិកថ្មីនេះ ក៏បានបង្កើនកម្លាំងគណបក្សប្រជាជនកម្ពុជា កាន់តែមានកម្លាំងកាន់តែខ្លាំងក្លាថែមទៀត ក្នុងការបំពេញភារកិច្ចបម្រើជាតិប្រជាជន និងការអភិវឌ្ឍប្រទេស។
លោក ថា យ៉ាវ បានបង្ហាញឲ្យសមាជិកយើងបានដឹងពីភាពរីកចម្រើន របស់ប្រទេស នារយ:ពេល៥ឆ្នាំចុងក្រោយផងដែរ ក្រោមការដឹកនាំដោយគណបក្សប្រជាជនកម្ពុជា ពិសេសតម្លៃនៃសន្តិភាព ក្រោមនយោបាយ ឈ្នះ ឈ្នះ របស់សម្ដេចតេជោ ហ៊ុន សែន៕
