(សៀមរាប)៖ លោកបណ្ឌិតនាយឧត្តមសេនីយ៍ សឹង សំណាង អគ្គមេបញ្ជាការរង មេបញ្ជាការកងទ័ពជើងអាកាស និងលោកស្រី អ៊ូ សិទ្ធិរី ជាភរិយា បានអញ្ជើញសម្ពោធឧប្បដ្ឋានសាលា និងពុទ្ធាភិសេកពុទ្ធរូប សម្រាប់ប្រជាពុទ្ធបរិស័ទនៅភូមិសំរោង ឃុំខ្នារពោធិ៍ ស្រុកសូទ្រនិគម ខេត្តសៀមរាប គោរពប្រតិបត្តិព្រះពុទ្ធសាសនា។ ពិធីនេះ បានប្រារព្ធធ្វើឡើងកាលពីវេលាព្រឹកថ្ងៃទី ៤ ខែឧសភា ឆ្នាំ២០២៣។
ក្នុងពិធីនោះ ក៏មានការអញ្ជើញចូលរួមពីនាយទាហានកងទ័ពជើងអាកាស និងភរិយា អាជ្ញាធរដែនដីស្រុក ឃុំ ភូមិ និងប្រជាពលរដ្ឋចំនួន ៥០០នាក់។
នាយឧត្តមសេនីយ៍ សឹង សំណាង នៅក្នុងឱកាសនោះ បានថ្លែងសំណេះសំណាល និងជម្រាបជូនពីការនឹករលឹករបស់សម្តេចតេជោ ហ៊ុន សែន នាយករដ្ឋមន្ត្រី សម្តេចអគ្គពញ្ញាចក្រី ហេង សំរិន ប្រធានរដ្ឋសភា សម្តេចវិបុលសេនាភក្ដី សាយ ឈុំ ប្រធានព្រឹទ្ធសភា ដែលលោកតែងនឹករលឹក និងខ្វល់ខ្វាយសុខទុក្ខរបស់ប្រជាពលរដ្ឋនៅទូទាំងប្រទេស ។
លោកបណ្ឌិត សឹង សំណាង បានរំលឹកថា កាលពី ៤៥ឆ្នាំមុន ប្រជាពលរដ្ឋនៅទីនេះត្រូវបានរបបខ្មែរក្រហមបិទសិទ្ធិសេរីភាពសព្វបែបយ៉ាងរាប់ទាំងសិទ្ធិធ្វើបុណ្យទាន សិទ្ធិគោរព និងជំនឿសាសនា ការជួបជុំគ្នាប្រារព្វពិធីបុណ្យសាសនា និងចាប់ព្រះសង្ឃផ្សឹកជាដើម។
«ឥឡូវនេះប្រជាពលរដ្ឋមានសេរីភាពសព្វបែបយ៉ាង ដូចជាក្នុងពេលនេះយើងទាំងអស់គ្នាបានប្រារព្វពិធីសម្ពោធឧប្បដ្ឋានសាលា តាមគន្លងប្រពៃណី។ ប្រការសំខាន់យើងកំពុងរស់នៅក្រោមស្ថានភាពសុខសន្តិភាព ក្រោមការដឹកនាំដ៏ត្រឹមត្រូវរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ យើងត្រូវតែប្តូរផ្តាច់ការពារសន្តិភាព ស្ថេរភាពសង្គម ហើយត្រូវចាំទុកថា សន្តិភាពមិនមែនរកបានដោយងាយនោះទេ»។ នេះជាការលើកឡើងរបស់លោកបណ្ឌិត សឹង សំណាង។
លោកបណ្ឌិត សឹង សំណាង បានគូសរំលេចថា ការចាប់ផ្តើមរបស់កម្ពុជាមិនមែនជារឿងងាយស្រួលនោះឡើយ។ កម្ពុជាត្រូវចាប់ផ្តើមពីចំណុចសូន្យទាំងអស់ ព្រោះសង្គមនេះ ត្រូវបានរបបប្រល័យពូជសាសន៍បំផ្លេចបំផ្លាញគ្មានសល់អ្វីទាំងអស់។
លោកបណ្ឌិត បានគូសបញ្ជាក់បែបនេះ «ប្រមុខដឹកនាំរាជរដ្ឋាភិបាលកម្ពុជា ជាអ្នកគូសវាសយុទ្ធសាស្ត្របញ្ចប់សង្គ្រាមដ៏រ៉ាំរៃ បង្កើតបានសន្តិភាពពេញលេញ និងឯកភាពទឹកដីទាំងស្រុងចាប់ពីចុងឆ្នាំ១៩៩៨ តាមរយៈការអនុវត្តគោលនយោបាយឈ្នះ-ឈ្នះ ប្រកបដោយជោគជ័យ។ សមិទ្ធិផលក្នុងថ្ងៃនេះ គឺជាអំណោយផល ដែលកើតចេញពីសុខសន្តិភាព ហើយតម្លៃនៃសន្តិភាពបានផ្តល់នូវគុណប្រយោជន៍ យ៉ាងច្រើនជូនដល់កម្មករ កម្មការិនី អ្នកវិនិយោគទុន មន្ត្រី រាជការ កងកម្លាំង ប្រដាប់អាវុធ នគរបាល ការកសាងហេដ្ឋារចនាសម្ព៍ន្ធ ផ្លូវថ្នល់ ស្ពាន...»៕
