(ភ្នំពេញ)៖ លោក គៀន ពន្លក អតីតប្រធានការិយាល័យបណ្តុះបណ្តាលរបស់អតីតគណបក្សសង្គ្រោះជាតិ និងជាវាគ្មិនតែងឡើងបង្ហាញទស្សនៈនានាលើសារព័ត៌មានអាស៊ីសេរី និងឌឹខេមបូឌាដេលីនោះ បានទម្លាយថា រូបលោកត្រូវបានគេបង្គាប់ឱ្យនិយាយអាក្រក់ពីរាជរដ្ឋាភិបាល ជាមួយការធានាយកទៅរស់នៅក្រៅប្រទេស។
លោក គៀន ពន្លក គ្រូបង្រៀនផ្នែកប្រវត្តិសាស្ត្រនៅវិទ្យាល័យក្នុងខេត្តតាកែវ បានចូលរួមធ្វើសកម្មភាពនយោបាយជាមួយអតីតបក្សសង្គ្រោះជាតិក្នុងឆ្នាំ២០១៣ ហើយត្រូវបានបក្សជ្រើសតាំងជាប្រធានការិយាល័យបណ្តុះបណ្តាលរបស់បក្ស។ ក្រោយ មកទៀត លោកក៏បានចូលជាសមាជិកសមាគមគ្រូបង្រៀនកម្ពុជាឯករាជន ហើយក៏ធ្លាប់ធ្វើជាអគ្គលេខាធិការសហព័ន្ធនិស្សិតបញ្ញវន្តកម្ពុជា។
លោក គៀន ពន្លក តែងបានឡើងបញ្ចេញទស្សនៈយោបាល់នានាលើព្រឹត្តិការណ៍នយោបាយ និងសង្គមនៅកម្ពុជា ជាមួយនឹងវិទ្យុអាស៊ីសេរី និងឌឹខេមបូឌា ដេលី។
លោក គៀន ពន្លក បានអះអាងប្រាប់ Fresh News ថា បន្ទាប់ពីគណបក្សសង្គ្រោះជាតិត្រូវបានរំលាយនៅឆ្នាំ២០១៧ លោក ក៏ត្រូវបានសមាគម ក៏ដូចជាថ្នាក់ដឹកនាំអតីតបក្សសង្គ្រោះជាតិ រៀបចំឱ្យឡើងបញ្ចេញទស្សនៈយោបល់នានាតាមរយៈវិទ្យុខាងលើ។
លោក ពន្លក បានគូសបញ្ជាក់ថា ចាប់តាំងពីឆ្នាំ២០១៩ មក លោកឡើងបញ្ចេញទស្សនៈ តាមរយៈវិទ្យុខាងលើមិនតិចជាង ១០០ដងនោះឡើយ។ លោកបន្តថា រាល់ពេលឡើងបញ្ចេញទស្សនៈ លោកត្រូវបានសមាគម ព្រមទាំងមេដឹកនាំអតីតបក្សសង្គ្រោះជាតិ រួមមានលោកស្រី មូរ សុខហួរ និងលោក អេង ឆៃអ៊ាង បង្គាប់ឱ្យ និយាយវាយប្រហារ និយាយអាក្រក់ពីរាជរដ្ឋាភិបាល ហើយធានារៀបចំឱ្យចេញទៅ ក្រៅប្រទេស បើមានការគំរាមកំហែងណាមួយពីរាជរដ្ឋាភិបាល។
«គេថា [លោកស្រី មូរ សុខហួរ និងលោក អេង ឆៃអ៊ាង] បើសិនយើងនិយាយទៅប៉ះពាល់រាជរដ្ឋាភិបាល ហើយមានការប្តឹងផ្តល់អី គឺគេនឹងផ្តល់ឱកាសសុំសិទ្ធិជ្រកកោននៅក្រៅប្រទេស»។ នេះជាការបញ្ជាក់របស់លោក ពន្លក។
លោក ពន្លក បានទម្លាយទៀតថា រាល់ពេលឡើងលើវេទិកាជាមួយវិទ្យុប្រឆាំង គឺគេតម្រូវឱ្យនិយាយតែរឿងអាក្រក់របស់រាជរដ្ឋាភិបាល។ បើទោះបីរឿងនោះជារឿងវិជ្ជមាន ក៏ត្រូវច្នៃចេញទៅជាអវិជ្ជមានដែរ។
លោក គៀន ពន្លក បានបញ្ជាក់បន្ថែមថា «មែនទែនទៅគ្រប់ប្រធានបទទាំងអស់ គឺអវិជ្ជមាន វាយប្រហារទៅលើរាជរដ្ឋាភិបាលតែម្តង។ មែនទែនទៅទោះរឿងហ្នឹងរាជរដ្ឋាភិបាលធ្វើល្អយ៉ាងណាក៏ដោយ គឺឱ្យយើងរំលេចឱ្យឃើញថារឿងហ្នឹងមិនល្អ»៕
