(ភ្នំពេញ)៖ យោងតាមលទ្ធផលនៃការស្រង់មតិអនទ្បាញប្រចាំឆ្នាំ របស់ស្លាកយីហោទាំង១០០០ដ៏កំពូលប្រចាំអាស៊ី ដែលបានរៀបចំទ្បើងដោយការធ្វើយុទ្ធនាការនៅតំបន់អាស៊ីប៉ាស៊ីហ្វិក និងសហការជាមួយក្រុមហ៊ុនទីផ្សារ Nielsen ដ៏ល្បីល្បាញមួយ បានបញ្ជាក់ថា ក្រុមហ៊ុន Samsung ជាប់ចំណាត់ថ្នាក់ជាស្លាកយីហោល្អបំផុតប្រចាំអាស៊ីក្នុងឆ្នាំ ២០១៦ សម្រាប់រយៈពេលប្រាំឆ្នាំជាប់ៗគ្នានេះ។

ការដាក់ចំណាត់ថ្នាក់នេះ ផ្តោតលើផលិតផលធំៗទាំង ១៤ប្រភេទ រួមមានដូចជា៖ គ្រឿង​យន្ត ការលក់រាយ សម្ភារៈផ្ទះបាយ ចំណីអាហារនិងភេសជ្ជៈ រួមទាំងគ្រឿងបរិក្ខារអេទ្បិក​ត្រូនិកជាដើមដែលផ្អែកលើការយល់ឃើញរបស់អ្នកប្រើប្រាស់ និងផ្តល់នូវការស្ទាបស្ទង់ដ៏ច្បាស់លាស់នៃឈ្មោះស្លាកយីហោដ៏ល្បីល្បាញនៅថ្ងៃនេះ។

លោក ឆែ សុខទ្បេង ដែលជាប្រធានផ្នែកផ្សព្វផ្សាយនៃក្រុមហ៊ុន Samsung ថៃអេទ្បិកត្រូនិកនៅកម្ពុជា បានមានប្រសាសន៍ថា៖ ខណៈពេលដែលស្លាកយីហោក្រុមហ៊ុន​Samsung ឈានមុខគេក្នុងអាស៊ី យើងនឹងបន្តធ្វើឲ្យពិភពលោកពោរពេញទៅដោយ​បច្ចេកវិទ្យា និងភាពច្នៃប្រឌិតទំនើប ដែលជួយឲ្យអ្នកប្រើប្រាស់ទទួលបាននូវបទពិសោធន៍​ថ្មីៗ និងស្វែងរកឱកាសល្អៗតាមរយៈផលិតផល និងសេវាកម្មរបស់យើង។
ដោយសារតែភាពឈានមុខគេលើគំនិតបង្កើតថ្មី ជារៀងរាល់ឆ្នាំ ក្រុមហ៊ុន Samsung វិនិយោគ ១៤ពាន់លានដុល្លារ សម្រាប់ការសិក្សាស្រាវជ្រាវ និងការអភិវឌ្ឍន៍ ដើម្បីធានានូវភាពច្នៃប្រឌិតដ៏ទាន់សម័យ ដែលជាហេតុធ្វើឲ្យ Samsung នាំមុខគេជានិច្ចខាងផ្នែកបចេ្ចកវិទ្យា និងការច្នៃប្រឌិត ជាមួយនឹងការបង្ហាញខ្លួនថ្មីនៃទូរស័ព្ទ Samsung Galaxy S7 និង S7 edge ដែលមានកាមេរ៉ាទូរស័ព្ទដំបូងបំផុតភ្ជាប់មកជាមួយបច្ចេកវិទ្យា Dual Pixel Sensor ដ៏ទំនើប ដែលអាចជួយឲ្យអ្នកប្រើប្រាស់ថតរូបភាពហ្មត់ច្បាស់ល្អនៅកន្លែងងងឹត មិនធ្លាប់មានពីមុនមក និងទូរទស្សន៍ Samsung SUHD TV 2016 ដែលដំណើរការឥតដែនកំណត់ ផ្តល់រូបភាពបានភ្លឺច្បាស់ល្អបំពាក់ដោយបច្ចេកវិទ្យា Quantum dot display ។

ការកត់សម្គាល់ និងការបំពេញតម្រូវការរបស់អ្នកប្រើប្រាស់ គឺជាកាតព្វកិច្ចដ៏ចម្បងរបស់ក្រុមហ៊ុន Samsung។ ដោយផ្តោតទៅលើចំណុចខ្លាំង គុណតម្លៃ គោលដៅនៃការច្នៃប្រឌិត គុណភាព និងការរចនា។ ក្រុមហ៊ុន Samsung នឹងបន្តវិវឌ្ឍទៅមុខជានិច្ច ដើម្បីរក្សាតំណែងរបស់ខ្លួនជាស្លាកយីហោដ៏ល្អបំផុតប្រចាំអាស៊ី៕