(ភ្នំពេញ)៖ ក្រោមការដឹកនាំរបស់រាជរដ្ឋាភិបាល ដែលបានយកចិត្តទុកដាក់ខ្ពស់លើវិស័យអប់រំ កូនខ្មែរប្រមាណជិត ៨០០នាក់ទៀតហើយ នាល្ងាចថ្ងៃទី០១ ខែសីហា ឆ្នាំ២០២៣ បានទទួលជោគជ័យលើការប្រកួតយ៉ាងស្វិតស្វាញជំនាញភាសាអង់គ្លេស សម្រាប់កម្មវិធី The World scholar's cup និងត្រៀមចេញទៅបន្តការប្រកួតលំដាប់អន្តរជាតិ នៅប្រទេសអង់គ្លេស ថៃ អូស្រ្តាលី ចិន ឌូបៃ និងកូរ៉េ ក្នុងពេលឆាប់ៗខាងមុខនេះ ដែលមានសិស្សានុសិស្សជុំវិញពិភពលោកប្រមាណ ៦០ប្រទេសចូលរួម។

The World scholar's cup គឺជាបណ្តុំវិញ្ញាសារការប្រកួតប្រជែងជំនាញនៃកម្មវិធីសិក្សា ដើម្បីបំផុសស្មារតី និងផ្តោតលើការសិក្សាស្វែងជ្រាវរបកគំហើញថ្មីៗ បង្កើតទំនុក ចិត្តក្នុងការទំនាក់ទំនង ការងារជាក្រុម ភាពជាអ្នកដឹកនាំ ការនិយាយជាសាធារណៈ និងការស្វែងរកបទពិសោធន៍ថ្មីលើការសិក្សា។

កម្មវិធី The World scholar's cup ដែលបានរៀបចំឡើងក្នុងតំបន់នេះមានការចូលរួមប្រឡងពីសិស្សានុសិស្សក្នុងសាលាផ្សេងៗគ្នា ទាំងសាលារដ្ឋ និងសាលាឯកជន ក្រោមការរៀបចំដោយក្រុមហ៊ុន Bright Education Consultant and Travel ដែលបានផ្តោតសំខាន់លើវិញ្ញសារប្រឡងរួមមាន៖ Team Debate, Collaborative Writing, Scholar's Challenge និង Scholar's Bowl ដែលជាលទ្ធផលមានកូនខ្មែរជាច្រើនរូប មានសមត្ថភាពខ្ពស់លើជំនាញនិយាយភាសាអង់គ្លេស មិនចាញ់ម្ចាស់ដើមនៃភាសានេះឡើយ។

លើកឡើងនាឱកាសនោះលោក អ៊ែល ណូរី ប្រធានទីផ្សារនៅក្រុមហ៊ុន Bright Education Consultant and Travel បានគូសបញ្ជាក់ថា កាប្រកួត The World scholar's cup ជំនាញអង់គ្លេស លើកនេះមានកូនសិស្សមកពីសាលារដ្ឋ និងឯកជនចូលរួម ៨២០នាក់ ក្នុងនោះដែរមានកូនសិស្ស ប្រមាណ៩០% ទទួលបានជោគជ័យ ដែលសបញ្ជាក់ឱ្យឃើញថា សិស្សានុសិស្សរបស់កម្ពុជា គឺមានសមត្ថភាព និយាយភាសាអង់គ្លេសបានល្អ មិនចាញ់បរទេសនោះឡើយ។

លោក អ៊ែល ណូរី បានឱ្យដឹងទៀតថា ការប្រឡង The World scholar's cup បានចែកចេញជា៤វគ្គខុសៗ ដែលមានដូចជា ការសរសេរ Team Debate, Collaborative Writing, Scholar's Challenge និង Scholar's Bowl ហើយនៅពេលដែលសិស្សដឹងថា ខ្លួនទទួលបានជោគជ័យហើយ គឺសិស្សទាំងអស់និងមាន៤ជំរើស ដែលអាចទៅបន្តការប្រកួតនៅក្រៅប្រទេសបាន រួមមាន ចក្រភពអង់គ្លេស ថៃ កូរ៉េ និង អូស្រ្តាលី ហើយបើសិស្សដែលបានប្រឡងជាប់នៅក្នុងប្រទេសណាមួយនោះ នឹងអាចមានឱកាសទៅប្រកួតប្រជែងនៅសាកលវិទ្យាល័យដែលធំជាងគេនៅសហរដ្ឋអាមេរិកផងដែរ។

លោក អ៊ែល ណូរី បានបញ្ជាក់ទៀតថា ក្នុងចំណោមកូនសិស្សទាំងអស់នេះ មានចំនួនប្រមាណ៩០% បើអាណាព្យាបាលព្រមព្រៀង ក្រុមហ៊ុននឹងរៀបចំឱ្យពួកគាត់ បានទៅប្រកួតប្រជែងនៅក្រៅប្រទេស ដើម្បីដណ្តើមយកមេដាយជូនជាតិ។ តាមការរំពឹងទុកលោក អ៊ែល ណូរី បានអះអាងថា កូនសិស្សទាំងអស់គឺមានសង្ឃឹនឹងដណ្តើមយកមេដាយមាសបានច្រើនជូនប្រទេសជាតិផងដែរ៕

សម្រាប់ព័ត៌មានបន្ថែម https://t.me/brightcambodia , https://www.facebook.com/BrightCambodiaECT ៕