(ភ្នំពេញ)៖ ខ្សែភាពយន្តថ្មីមួយទៀត របស់ផលិតកម្ម មហាហង្ស មានចំណងជើងថា «សួស្ដីលោកគ្រូកំឡោះ» ដែលបានរៀបចំកម្មវិធីក្រុងពាលីថតជាផ្លូវការ នាព្រឹកថ្ងៃទី១៥ ខែកក្កដា ឆ្នាំ២០១៦នេះ នឹងត្រៀមខ្លួនចូលរួមប្រកួតប្រជែងកម្មវិធី មហោស្រពភាពយន្តប្រចាំឆ្នាំ២០១៧ ខាងមុខនេះ បន្ទាប់ពីរឿងនេះថតចប់រួចរាល់ និងត្រូវបានដាក់បញ្ចាំងជាផ្លូវការ។ នេះជាការបង្ហាញមហិច្ឆតាថ្មីមួយទៀត របស់ផលិតកម្មមហាហង្ស ក្រោយពីទទួលបានជោគជ័យជាបន្តបន្ទាប់ ក្នុងការផលិតរឿង ទាំងរឿងភាគ និងរឿងដុំ ដាក់បញ្ចាំងនៅក្នុងទីផ្សារភាពយន្តខ្មែរ។
ចាងហ្វាងផលិតកម្ម មហាហង្ស លោក អ៉ិន សុភិន បានថ្លែងប្រាប់នៅក្នុងពិធីក្រុងពាលី ចេញថតរឿង «សួស្ដីលោកគ្រូកំឡោះ» កាលពីព្រឹកមិញនេះ ថា រឿង«សួស្ដីលោកគ្រូកំឡោះ» ដែលលោកកំពុងតែផលិតឡើងនេះ នឹងត្រៀមដាក់ចូលប្រកួតប្រជែង ក្នុងព្រឹត្តិការណ៍មហោស្រព ភាពយន្តនាឆ្នាំក្រោយនេះ (ឆ្នាំ២០១៧) ពីព្រោះរឿងនេះ លោកបានសម្រិតសម្រាំងឡើង យ៉ាងយកចិត្តទុកដាក់ជាទីបំផុត ដើម្បីឲ្យមានគុណភាពខ្លាំងជាងរឿងមុនៗ។
លោកនិយាយថា« រឿង សួស្ដីលោកគ្រូកំឡោះ គឺខ្ញុំបានឲ្យអ្នកដឹកនាំសម្ដែងជើងចាស់ម្នាក់ ជួយដឹកនាំសម្ដែង គឺលោក ទិត ធារិទ្ធ ដែលលោកធ្លាប់ដឹកនាំសម្ដែង ក្នុងរឿង អ្នកនាងម្ចាស់ឡឺកឺ ហើយរឿង អ្នកនាងម្ចាស់ឡឺកឺ គឺទទួលបានការគាំទ្រយ៉ាងខ្លាំង ក្រោយពេលខ្ញុំដាក់បញ្ចាំង។ ដូច្នេះរឿងនេះ ខ្ញុំបានឲ្យគាត់មកដឹកនាំសម្ដែងទៀត គឺជឿជាក់ថា នឹងកាន់តែល្អទ្វេដង ហើយនឹងខ្លាំងជាងរឿង អ្នកនាងម្ចាស់ឡឺកឺ !»។
លោក អ៉ិន សុភិន បានបន្តថា រឿង «សួស្ដីលោកគ្រូកំឡោះ» ជាប្រភេទរឿងកំប្លែង កាច់កុងឌឺដង និងមនោសញ្ចេតនា ជាពិសេសគឺផ្ដោតសំខាន់លើការអប់រំច្រើន ហើយតួសម្ដែងក៏សុទ្ធតែ កំពុងមានទីផ្សារគាំទ្រខ្លាំង ពីសំណាក់ទស្សនិកជន។ ចំពោះមូលហេតុដែលលោក សម្រេចចិត្តជ្រើសរើសយករឿង «សួស្ដីលោកគ្រូកំឡោះ» ដើម្បីចូលរួមប្រកួតប្រជែង ក្នុងមហោស្រពភាពយន្ត ព្រោះតែរឿងនេះ មានសាច់រឿងល្អជាងមុន និងមានការអប់រំច្រើន ក្នុងសង្គមរស់នៅរបស់សិស្សានុសិស្ស ជាពិសេសការសិក្សារបស់យុវវ័យ ហើយក៏ប្រមូលផ្ដុំដោយអ្នកដឹកនាំ និងនិពន្ធមានស្នាដៃល្អៗ ទើបជាហេតុលោកសម្រេចបែបនេះ ។
ម្យ៉ាងវិញទៀត តួសម្ដែងក្នុងរឿងនេះ ក៏សុទ្ធតែមានទេពកោសល្យ និងមានទីផ្សារខ្ពស់ក្នុងពិភពសម្ដែង ដូចជាតួឯក គឺអ្នកនាង សុខ សោម៉ាវត្តី និងលោក ជា សុវណ្ណនរាហ៍ ហើយក៏មានការបង្ហាញវត្តមានជាលើកដំបូង ចូលមកក្នុងផលិតកម្ម មហាហង្ស ពីសំណាក់តារាកំប្លែង នាយ ពាក់មី និងនាយគ្រឿន អ្នកនាង ប៉េងប៉ោង ដែលកាន់តែធ្វើឲ្យសាច់រឿង អស្ចារ្យទ្វេដង។
សូមបញ្ជាក់ថា រឿង «សួស្ដីលោកគ្រូកំឡោះ» ក្រៅពីតារាសម្ដែងខាងលើនេះ ក៏មានវត្តមានតារាសម្ដែងល្បីៗ ជាច្រើនទៀតដូចជា អ្នកនាង ខ្ញុង, កញ្ញា នីឡា, កញ្ញា ម៉ៅ គឹមធីតា, លោក ងួន សុបិន, លោក អូន ឧស្សាហ៍, លោក លឹម រដ្ឋា, កញ្ញា ផាន់ ផាផួង, កញ្ញា យ៉ែម ស្រីពេជ្រ, លោក ផាត់ គង់, លោក ស្រេង វណ្ណ ព្រមទាំងតារាកិត្តិយស ជាច្រើនដួងទៀត៕
