(ស្វីស)៖ ប្រធានសហព័ន្ធកីឡាបាល់ទាត់ពិភពលោក FIFA ថ្មី លោក Gianni Infantino នឹងចូលបំភ្លឺនៃអំពើករណីពុករលួយ​ក្នុងអង្គ​ភាព​មួយ​នេះ ក្នុង​បទ​សម្ភាសន៍​របស់​ក្រុម​ប្រឹក្សា គណៈ​កម្មា​ធិ​ការ FIFA នា​រាត្រី​ថ្ងៃ​សុក្រ ទី១៥ ខែកក្កដា ឆ្នាំ២០១៦ នៅទីក្រុង Zurich ប្រទេសស្វីសតែម្តង។

សារព័ត៌មានដ៏ល្បីរបស់អង់គ្លេស BBC បានផ្សាយឲ្យដឹងថ្ងៃសុក្រ ទី១៥ ខែកក្កដានេះថា បុរសវ័យ៤៦ឆ្នាំ ជនជាតិស្វីស Infantino នឹង​ត្រូវ​ជួប​សម្ភាសន៍​ផ្ទាល់​ជា​មួយ​លោក Robert Torres និងសមាជិកជាច្រើនទៀតរបស់ FIFA នារាត្រីនេះ ជុំវិញរឿងអាស្រូវនានាពុក​រលួយ​នានា ដែល​បាន​កើត​ក្នុង​ស្ថាប័ន​ដែល​មិន​គិត​ពី​ប្រាក់​កំរ៉ៃ​មួយ​នេះ នា​ពេល​កន្លង​មក ហើយប្រសិនបើមានភស្តុតាងគ្រប់គ្រាន់ FIFA នឹង​បើក​ការ​ស៊ើប​អង្កេត​​ទៅ​លើ​លោក Infantino មុន​ឈាន​ដល់​ការ​ព្យួរ​មុខ​តំណែង​ដែល​មាន​រហូត​ដល់ ៩០​ថ្ងៃ (៣​ខែ)។​

សូមបញ្ជាក់ផងដែរថា ចំណុចដែលគួរឲ្យចាប់អារម្មណ៍ មុនឈានដល់ការកោះអញ្ជើញប្រធាន FIFA បច្ចុប្បន្ន មកធ្វើការស្រាយបញ្ជាក់នេះដែរ ក្រោយ​ពេល​ទទួល​បាន​របាយ​ការណ៍​ថា លោក Infantino បានប្រើប្រាស់យន្តហោះ ផ្ទាល់ខ្លួន (Jet) ក្នុង​ការ​ធ្វើ​ដំណើរ​ទៅ​ទស្សន​កិច្ច​ពី​ការ​សាង​សង់​ពហុ​កីឡដ្ឋាន​នា​នា​សម្រាប់ World Cup 2018 នៅ​រុស្ស៊ី និង World Cup 2022 នៅប្រទេសកាតា ពេលថ្មីៗនេះ។

លើសពីនេះទៅទៀត អតីតអគ្គលេខាធិការសហព័ន្ធកីឡាបាល់ទាត់ប្រចាំទ្វីបអឺរ៉ុប UEFA រូបនេះ ក៏បានទិញពូកដេក តម្លៃ ៨៧៩៥ផោន, ទិញ​ម៉ាស៊ីន​ហាត់​ប្រាណ ៦៨២៩​ផោន, អាវ​រាសី​សម្រាប់​បុរស (Tuxedo) តម្លៃ ១០៨៦ផោន, ផ្កា ៦៧៧ផោន និងម៉ាស៊ីនបោកគក់ផ្ទាល់ខ្លួន តម្លៃ ១៣២ផោន ទៀតផង។

សូមរំលឹកផងដែរថា លោក Gianni Infantino ដែលអាចនិយាយបាន ៥ភាសាយ៉ាងស្ទាត់ជំនាញរួមមាន បារាំង អង់គ្លេស អាល្លឺម៉ង់ អេស្ប៉ាញ និង​អ៊ីតាលី រួម​ទាំង​ភាសា​អារ៉ាប់​ទៀត​នោះ ត្រូវ​បាន​បោះ​ឆ្នោត​ឲ្យ​ឡើង​កាន់តំណែងជា ប្រធាន FIFA កាលពីថ្ងៃទី២៦ ខែកុម្ភៈ ឆ្នាំ​២០១៦ ជំនួស​កៅអី​លោក Sepp Blatter វ័យ​​៨០​​ឆ្នាំ ដែល​ជា​ជន​ជាតិ​ស្វីស​ដូច​គ្នា​៕