(បាត់ដំបង)៖ ដោយមើលឃើញពីតម្រូវការជាក់ស្តែង ក្នុងការរស់នៅ និងប្រកបរបរចិញ្ចឹមជីវិតរបស់ប្រជាជន ដែលកំពុងរស់នៅ​លើដីបុរីកម្មករ នៃអតីតរោងចក្រតម្បាញសំពត់ ខេត្តបាត់ដំបង ដែលជាអចលនទ្រព្យរបស់រដ្ឋ​ ស្ថិតនៅក្នុងបញ្ជីសារពើភ័ណ្ឌ របស់ក្រសួងឧស្សាហកម្ម និងសិប្បកម្ម សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា តាមរយៈក្រសួងឧស្សាហកម្ម និងសិប្បកម្ម បានសម្រេចកាត់ដីរដ្ឋ (បុរីកម្មករ) នៃអតីតរោងចក្រតម្បាញសំពត់ខេត្តបាត់ដំបង ជូនប្រជាពលរដ្ឋចំនួន ៤៩គ្រួសារ ដែលកំពុងរស់នៅលើដីនោះ ដើម្បីមានសិទ្ធទទួលបានប័ណ្ណកម្មសិទ្ធ​ស្របច្បាប់។

ជាក់ស្តែង ដោយទទួលបានការសម្រេច ពីរាជរដ្ឋាភិបាល ដែលមានសម្តេចតេជោ​ជាប្រមុខ នៅព្រឹកថ្ងៃទី១៤ ខែមិថុនា ឆ្នាំ២០១៦ នេះ លោក គឹម ទូច រដ្ឋលេខាធិការ តំណាងរបស់ លោកទេសរដ្ឋមន្រ្តី ចម ប្រសិទ្ធ រដ្ឋមន្រ្តី ក្រសួងឧស្សាហកម្ម និងសិប្បកម្ម និងលោក ចាន់ សុផល អភិបាលនៃគណៈអភិបាល​ខេត្តបាត់ដំបង បានចុះជួបផ្ទាល់ ជាមួយប្រជាពលរដ្ឋ ដើម្បីប្រគល់ដីបុរីកម្មករ នៃរោងចក្រ​តម្បាញសំពត់ ខេត្តបាត់ដំបង ដែលមានទំហំ ៥.៧៧១ ម៉ែត្រការ៉េ ជូនប្រជាពលរដ្ឋ ៤៩គ្រួសារ (ភាគច្រើនជាអតីតកម្មករ) ដោយក្នុងនោះមាន​ ៣.៨៦៤ ម៉ែត្រការ៉េ សម្រាប់ប្រជាពលរដ្ឋកាន់កាប់ និង ១.៩០៧ ម៉ែត្រការ៉េ សម្រាប់ហេដ្ឋារចនាសម្ព័ន្ធ។

ជាការឆ្លើយតប ប្រជាពលរដ្ឋទាំង ៤៩ គ្រួសារ ដែលបានទទួលសិទ្ធកាន់កាប់ដីស្របច្បាប់ ពីរាជរដ្ឋាភិបាល បានសម្តែងនូវ​សេចក្តីរីករាយ ជាពន់ពេក និងសូមថ្លែងនូវអំណរគុណ​យ៉ាងជ្រាលជ្រៅ ជូនចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលតែងគិតគូ ពីសុខទុក្ខរបស់ប្រជាពលរដ្ឋ៕