(កណ្តាល)៖ ដើម្បីអបអរសាទរខួបអនុស្សាវរីយ៍លើកទី១៣៧ នៃទិវាពលកម្មអន្តរជាតិ ០១ ឧសភា លោក សែម សុវណ្ណនី ប្រធានក្រុមការងាររាជរដ្ឋាភិបាល ចុះមូលដ្ឋានឃុំពើក ស្រុកអង្គស្នួល ខេត្តកណ្តាល បានចុះជួបសំណេះសំណាលជាមួយកម្មករ កម្មការិនីចំនួន ២,០០០នាក់ ដែលជាសមាជិកបក្សទាំង១៩ភូមិ ទូទាំងឃុំពើក។
ពិធីនេះបានធ្វើឡើងនៅព្រឹកថ្ងៃទី៣០ ខែមេសា ឆ្នាំ២០២៣នេះ នៅទីស្នាក់ការគណបក្សស្រុកអង្គស្នួល ដែលមានចូលរួមពីលោក លោកស្រីជាប្រធាន អនុប្រធាន អស់លោក លោកស្រី ក្រុមការងារចុះជួយភូមិ ទាំង១៩ភូមិ ក្នុងឃុំពើក លោក សាមុត ធឿន អនុប្រធាន គណបក្សស្រុក លោក អ៉ឹម សាក់ អនុប្រធានប្រចាំការបក្សស្រុក លោក ជួប រដ្ឋា អភិបាលរងស្រុក ក្រុមការងារសមាជិក សមាជិការ គណបក្សឃុំពើក ចំនួនចូលរួមសរុប ២,០៦៨នាក់។
ស្ថិតក្នុងឱកាសនោះ ក្រៅពីការជួបជុំសំណេះសំណាល របស់លោក សែម សុវណ្ណនី និងកម្មករ កម្មការិនីប្រកបដោយភាពសប្បាយរីករាយ។
ទន្ទឹមនឹងនោះដែរ លោក សែម សុវណ្ណនី បានក្រើនរំលឹកដល់មន្ត្រីអាជ្ញាធរមូលដ្ឋាន សូមយកចិត្តទុកដាក់ ពិនិត្យ និងធ្វើការដោះស្រាយនូវបញ្ហាប្រឈមនានា ជូនដល់ប្រជាពលរដ្ឋ និងជួយលើកកម្ពស់គុណភាពជីវិត ដើម្បីឱ្យប្រជាពលរដ្ឋរស់នៅ ប្រកបដោយភាពសុខសាន្ត និងបំពេញការងារទទួលបានប្រាក់ចំណូលសមរម្យ ដែលអាចធានាបានក្នុងការផ្គត់ផ្គង់ជីវភាព គួបផ្សំការអភិវឌ្ឍក្នុងមូលដ្ឋាន ក្នុងការលើកកម្ពស់កម្រិតជីវភាព របស់ប្រជាពលរដ្ឋផងដែរ។
លោក សែម សុវណ្ណនី បានឧបត្ថម្ភបក្សស្រុក ១លានរៀល, ក្រុមការងារឃុំ ១លានរៀល ចំណាយការរៀបចំកម្មវិធី អនាម័យ ១លានរៀល, សមាជិកបក្សជាកម្មករ កម្មការនី ចូលរួម ១,៩១៧នាក់ ក្នុងម្នាក់ៗទទួលបាន ២០ម៉ឺនរៀល និងចំណាយផ្សេងៗទៀតចំនួន ២៥,០៩៥ដុល្លារ៕
