(ភ្នំពេញ)៖ លោកបណ្ឌិត ហ៊ុន ម៉ាណែត នឹងអញ្ជើញជាតំណាងសម្ដេចតេជោ ហ៊ុន សែន នាយករដ្ឋមន្ត្រីកម្ពុជា ធ្វើជាអធិបតី ក្នុងពិធីបញ្ចុះខណ្ឌសីមាព្រះវិហារ និងឆ្លងសមិទ្ធផលនានាក្នុងវត្តបទុមវង្សា ហៅវត្តកំពង់ភ្នំក្រៅ ស្ថិតនៅស្រុកលើកដែក ខេត្តកណ្ដាល នាថ្ងៃទី៣ ខែឧសភា ខាងមុខនេះ។
ព្រះបទុមវង្សា ម៉េត សាម៉ន ព្រះចៅអធិការវត្តបទុមវង្សា បានមានព្រះថេរដីកាឱ្យដឹងថា ព្រះវិហារថ្មីដែលត្រៀមប្រារព្ធពិធីបុណ្យបញ្ចុះខណ្ឌសីមា នាពេលខាង មុខនេះ កសាងឡើងរយៈពេលជិត ១៣ឆ្នាំ ដោយចំណាយថវិកាប្រមាណជាង៨០ម៉ឺនដុល្លារអាមេរិក ក្រោមការជួយជ្រោមជ្រែងពីក្រុមការងារចុះមូលដ្ឋាន និងពុទ្ធបរិស័ទ។
បើតាមព្រះបទុមវង្សា ពិធីបុណ្យបញ្ចុះខណ្ឌសីមាព្រះវិហារ ដែលប្រៀបបាននឹងបេះដូងនៃទីអារាមនេះ នឹងប្រព្រឹត្តទៅចាប់ពីថ្ងៃចន្ទទី១ រហូតដល់ថ្ងៃព្រហស្បតិ៍ ទី៤ ខែឧសភា ឆ្នាំ២០២៣ ដោយមានពិធីសាសនា ការសម្ដែងល្ខោនបាសាក់ ចាប៉ីដងវែង ការបាញ់កាំជ្រួច និងបង្ហោះគោមជាដើម។
ព្រះចៅធិការបានមានព្រះថេរៈដីការអំពាវនាវក្នុងន័យដើមថា «សូមអញ្ជើញចូលរួមបំពេញបុណ្យកុលសចុងក្រោយ ហៅថាអប្បរាបរចេតនា ជាការជ្រះថ្លៃចំពោះបុណ្យរបស់យើង កុំឱ្យជាប់មន្ទិលថា ព្រះវិហារបស់អញតទៅទៀត គឺថា យើងបានប្រគេនព្រះសង្ឃ ថ្វាយព្រះរតនត្រ័យហើយនាពិធីបញ្ចុះខណ្ឌសីមានេះ»។
នាថ្ងៃទី២៦ ខែមេសា ថ្នាក់ដឹកនាំ និងមន្ត្រីនៃរដ្ឋបាលខេត្តកណ្ដាល រដ្ឋបាលស្រុកលើកដែក ព្រះចៅអធិការវត្ត និងអាជ្ញាធរឃុំ បានបើកកិច្ចប្រជុំជាមួយក្រុមការងារលោកបណ្ឌិត ហ៊ុន ម៉ាណែត ដើម្បីសម្រេចអំពីរបៀបវារៈសំខាន់ នៃពិធីបុណ្យនាពេលខាងមុខ។
ព្រះវិហារ គឺជាទីសេនាសនៈដ៏ឧត្តុង្គឧត្តមបំផុតនៅក្នុងវត្តអារាម ដ្បិតមានតែក្នុងព្រះវិហារមួយគត់ដែលព្រះសង្ឃអាចប្រារព្ធកិច្ចសំខាន់ៗ ដូចជាសម្ដែងអាបត្តិ បំបួសព្រះសង្ឃ ក្រាលគ្រងកឋិនទាន ដែលកិច្ចសំខាន់ទាំងនេះ មិនអាចធ្វើនៅលើកុដ្ឋ សាលា ឬទីសេនាសនៈណាផ្សេងបានឡើយ។
សូមបញ្ជាក់ថា នៅមុននិងក្រោយពិធីបុណ្យចូលឆ្នាំថ្មី ប្រពៃណីជាតិ គឺជាឱកាសដែលទីអារាមនានាតែងប្រារព្ធពិធីបុណ្យបញ្ចុះខណ្ឌសីមា និងពិធីបុណ្យសម្ពោធឆ្លងសមិទ្ធផលនានាដែលកើតឡើងដោយសារការគាំទ្រពីថ្នាក់ដឹកនាំជាតិ និងកម្លាំងសទ្ធាជ្រះថ្លារបស់ប្រជាពុទ្ធបរិស័ទ៕
