(ព្រះសីហនុ)៖ កម្លាំងនគរបាលខេត្តព្រះសីហនុ បានបង្ក្រាប និងស្រាវជ្រាវឃាត់ខ្លួនជនសង្ស័យចំនួន ៧នាក់ ដែលធ្វើសកម្មភាពលួចដោះដែកបង្គោលខ្សែភ្លើងអគ្គិសនីកម្ពុជា។
សមត្ថកិច្ចនគរបាលខេត្តព្រះសីហនុ បានឲ្យដឹងនៅថ្ងៃទី២៧ ខែមេសានេះថា ការបង្ក្រាបនេះធ្វើឡើង នៅថ្ងៃទី២៥ ខែមេសា ឆ្នាំ២០២៣ ម៉ោង៣៖៤០នាទីរសៀល ស្ថិតនៅចំណុច ភូមិឫទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ បន្ទាប់ពីមានប្រជាពលរដ្ឋរាយការណ៍ ពេលជនសង្ស័យកំពុងធ្វើសកម្មភាព ឡើងដោះដែកបង្គោលអគ្គិសនីកម្ពុជា។
សមត្ថកិច្ចបញ្ជាក់ថា បន្ទាប់ពីបានឃាត់ខ្លួនជនសង្ស័យចំនួន២នាក់ ដែលធ្វើសកម្មភាពឡើងដោះដែកបង្គោលអគ្គិសនីកម្ពុជាហើយនោះ ក៏បានធ្វើការសួរនាំ និងស្រាវជ្រាវបន្តរកឃើញជនសង្ស័យជាប់ពាក់ព័ន្ធចំនួន ៥នាក់ថែមទៀត សរុបជនសង្ស័យដែលឃាត់ខ្លួនចំនួន ៧នាក់ ជាមួយនឹងវត្ថុតាងដែកបន្ទះបង្គោលភ្លើងអគ្គិសនីរបស់រដ្ឋចំនួន៦៦ដើម។
ជនសង្ស័យទាំង៧នាក់រួមមាន៖ ឈ្មោះស៊ុន តាំង ភេទប្រុស អាយុ២២ឆ្នាំ, ឈ្មោះវ៉ាន់ ចំរើន ភេទប្រុស អាយុ២៨ឆ្នាំ, ឈ្មោះសំ ប៊ុនរ៉ាត់ ភេទប្រុស អាយុ២២ឆ្នាំ, ឈ្មោះម៉ី វត្តនា ភេទប្រុស អាយុ២១ឆ្នាំ, ឈ្មោះ មៀល គឹមសេង ភេទប្រុស អាយុ២៣ឆ្នាំ, ឈ្មោះ ផែង គឹមដុង ភេទស្រី អាយុ៣៤ឆ្នាំ និងឈ្មោះ ឡុង ឡេង ភេទប្រុសអាយុ ៣៨ឆ្នាំ។
បច្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូន ទៅសាលាដំបូងខេត្តព្រះសីហនុ ចាត់ការតាមនីតិវិធី។
ជាមួយគ្នានេះ សមត្ថកិច្ចអំពាវនាវ ដល់បងប្អូនប្រជាពលរដ្ឋ សូមមេត្តាកុំធ្វើសកម្មភាពដោះបំផ្លាញដែកបង្គោលខ្សែអគ្គិសនីដែលជាសម្បត្តិរដ្ឋ អាចធ្វើឲ្យប៉ះពាល់ដល់អាយុជីវិតផង និងអាចមានទោសទណ្ឌដូចករណីខាងលើនេះ៕
