(ភ្នំពេញ)៖ យុវជនអង្គការសង្គមស៊ីវិលមួយក្រុម បានចេញមុខលាតត្រដាងនយោបាយខ្មៅរបស់ជនក្បត់ជាតិ សម រង្ស៉ី ដែលពួកគេចាត់ទុកជាគ្រោះថ្នាក់ដ៏ធំសម្រាប់ជាតិ។ ក្រុមយុវជនដែលធ្លាប់ដើរតាមបន្ទាត់នយោបាយរបស់ទណ្ឌិត សម រង្ស៉ី ទាំងនេះ បានប្រកាសប្តេជ្ញាកម្ចាត់នយោបាយខ្មៅកខ្វក់នេះចេញពីសង្គមកម្ពុជា ដើម្បីធានានូវភាពសុខសាន្តសម្រាប់ជាតិ និងប្រជាជនកម្ពុជាទាំង មូល។
ការលាតត្រដាងអំពីនយោបាយខ្មៅរបស់ជនក្បត់ជាតិតជំនាន់ សម រង្ស៉ី បានធ្វើឡើងតាមរយៈសន្និសីទព័ត៌មានមួយនៅទីស្នាក់ការរបស់បណ្តាញយុវជនអង្គការសង្គមស៊ីវិលស្ថិតនៅក្នុងរាជធានីភ្នំពេញ នាព្រឹកថ្ងៃពុធ ទី២៦ ខែមេសា ឆ្នាំ២០២៣នេះ។ យុវជនដែលចូលរួមក្នុងសន្និសីទលាតត្រដាងពីនយោបាយខ្មៅដឹកនាំដោយទណ្ឌិត សម រង្ស៉ី មានសមាសភាពមកពីបណ្តាញអង្គការសង្គមស៊ីវិលមានដូចជា៖ យុវជនខ្មែរមហានគរ, សមាគមអភិវឌ្ឍន៍ធនធានយុវជនកម្ពុជា, មូលនិធិអរិយៈ, យុវជនសង្គមកិច្ច, បណ្តាញយុវជនខ្មែរមហានគរ,
ក្រុមយុវជនកីឡា និងសុខភាព និងក្រុមយុវជនព័ត៌មានវិទ្យា Master IT។
លោក ហេង សំណាង ប្រធានបណ្តុំអង្គការសមាគមសង្គមសុីវិល ជាយុវជនមួយរូប ដែលបានធ្វើសកម្មភាពយ៉ាងសកម្មក្នុងការប្រឆាំងរាជរដ្ឋាភិបាល កាលពីអំឡុងឆ្នាំ២០១៣ និងឆ្នាំបន្តបន្ទាប់ មុនឹងបក្សសង្គ្រោះជាតិត្រូវបានរំលាយក្នុងឆ្នាំ២០១៧។ សំណាង គឺជាយុវជន ដែលបានធ្វើសកម្មភាពគាំទ្រដ៏មុះមុតលើ នយោបាយបក្សប្រឆាំង ដឹកនាំដោយជនក្បត់ជាតិ សម រង្ស៉ី។
ក្នុងសន្និសីទនេះ យុវជន ហេង សំណាង បានរំលឹកពីប្រវត្តិសកម្មភាពរបស់ពួកគេក្នុងពេលប្រឆាំងនឹងរាជរដ្ឋាភិបាល និងបង្ហាញពីមូលហេតុដែលនាំឱ្យរូបគេសម្រេចចិត្តចេញមុខលាតត្រដាងនយោបាយខ្មៅរបស់ទណ្ឌិត សម រង្ស៉ី។ មូលហេតុនាំឱ្យរូបលាតត្រដាងនយោបាយខ្មៅកខ្វក់របស់ទណ្ឌិត សម រង្ស៉ី នេះ ក៏ព្រោះមិនចង់ឱ្យប្រជាពលរដ្ឋខ្មែរ ជាពិសេសយុវជនលង់ជឿនយោបាយខ្មៅកខ្វក់បន្តទៀត ព្រោះមិនបានចំណេញអ្វីដល់ជាតិនោះឡើយ។
ក្នុងសន្និសីទនោះ សំណាង បានអះអាងថា នយោបាយដឹកនាំដោយជនក្បត់ជាតិ សម រង្ស៉ី មិនបាននាំផលចំណេញដល់ប្រជាពលរដ្ឋ ដល់យុវជន និងជាតិនោះឡើយ។ ផ្ទុយទៅវិញ មានតែផ្តល់គ្រោះថ្នាក់ដល់ប្រជាពលរដ្ឋ ដល់យុវជនត្រូវមានទោសទណ្ឌ ហើយជាតិប្រឈមនឹងគ្រោះថ្នាក់។
លោក ហេង សំណាង និងក្រុមយុវជនមកពីបណ្តាញអង្គការសង្គមស៊ីវិលដទៃទៀត បានរកឃើញថា នយោបាយខ្មៅដែលបង្កើត និងដឹកនាំដោយជនក្បត់ជាតិតជំនាន់ សម រង្ស៉ី មានចំនួន១០រួមមាន៖
១៖ ជំរុញឱ្យពលរដ្ឋ ពិសេសយុវជនធ្វើបដិវត្តិពណ៌ និងសកម្មភាពខុសច្បាប់ផ្សេងៗ
២៖ ញុះញង់ឱ្យកងកម្លាំងប្រដាប់អាវុធឱ្យបះបោរប្រឆាំងរដ្ឋាភិបាលស្របច្បាប់
៣៖ អំពាវនាវឱ្យបរទេសផ្តាច់ជំនួយពីកម្ពុជា
៤៖ បង្កើតវប្បធម៌លាបពណ៌ បំបែកបំបាក់ រើសអើងខ្មែរ និងខ្មែរ រើសអើងពូជសាសន៍ អ្នកនយោបាយ
៥៖ សន្យាបែបប្រជាភិថុត ឧទាហរណ៍សន្យាដំឡើងប្រាក់ខែ ព្យាបាលជំងឺដោយឥតគិតថ្លៃ
៦៖ ប្រើភាសាប្រមាថព្រះចេស្ដាអង្គព្រះមហាក្សត្រ
៧៖ បោកប្រាស់អ្នកគាំទ្រ រួចពេលមានបញ្ហាគាត់តែងតែរត់ចោលអ្នកគាំទ្រ
៨៖ ប្រឌិតរឿងមិនពិតក្នុងចេតនាទុច្ចរិត អំពើកិចកលនយោបាយ
៩៖ គិតតែប្រយោជន៍ផ្ទាល់ខ្លួន មិនតម្កល់ប្រយោជន៍ជាតិ
១០៖ ចោទរដ្ឋាភិបាលថាជាអាយ៉ង ញុះញុងឲ្យពលរដ្ឋស្អប់ខ្ពើមរដ្ឋាភិបាលខ្លួនឯង
ដើម្បីកម្ចាត់ចោលនូវនយោបាយខ្មៅទាំងអស់នេះចេញពីសង្គមកម្ពុជា លោក ហេង សំណាង ក៏ដូចជាយុវជនមកពីបណ្តាញអង្គការសង្គមស៊ីវិលដទៃ បានមើលឃើញថា នូវអនុវត្តន៍វិធានការសំខាន់ៗចំនួន៩រួមមាន៖
១៖ ឈប់ស្តាប់ ឈប់ជឿ ឈប់ដើរតាម ឈប់ធ្វើតាម ការញុះញង់របស់លោក សម រង្ស៉ី
២៖ ត្រូវឆ្លើយថាទេចំពោះការអូសទាញ ឬអន្ទាក់នយោបាយរបស់លោក សម រង្ស៉ី
៣៖ ឈប់ស្តាប់ឧបករណ៍ឃោសនានានាដែលមាននិន្នាការផ្អៀងទៅរកលោក សម រង្ស៉ី
៤៖ ចៀសឱ្យឆ្ងាយពីគម្រូអាក្រក់របស់លោក សម រង្ស៉ី ដែលតែងតែប្រមាថអង្គព្រះមហាក្សត្រ
៥៖ បើកចិត្តមើលការអភិវឌ្ឍ និងសមិទ្ធិផលនានា ដែលសម្រេចបានដោយរាជរដ្ឋាភិបាល
៦៖ ចូលរួមដើរតាមគោលនយោបាយរបស់រាជរដ្ឋាភិបាលដើម្បីការអភិវឌ្ឍសង្គមជាតិរួមគ្នា
៧៖ ថ្លឹងថ្លែងរវាងអ្នកដឹកនាំដែលយកជីវិតធ្វើដើមទុនប្តូរយកសន្តិភាពជូនជាតិ និងអ្នកដឹកនាំប្រជាភិថុតដែលមានចេតនាទុច្ចរិតចង់តែបំផ្លាញសន្តិភាព និងតែងតែសន្យាខ្យល់ជាមួយអ្នកគាំទ្រ
៨៖ សង្កេតរវាងអ្នកដឹកនាំដែលតែងតែធ្វើពិត ទទួលបានសមិទ្ធិផលពិត និងអ្នកដឹកនាំដែលបានតែថា និងបានតែសន្យាតែមិនដែលបានធ្វើពិត ឬមិនអាចធ្វើបាន
៩៖ ប្រឹងប្រែងសិក្សារៀនសូត្រ ស្វែងរកចំណេះជំនាញ ដើម្បីទទួលឱកាសការងារល្អៗជាច្រើនក្រោមការដឹកនាំប្រកបដោយគតិបណ្ឌិតរបស់រាជរដ្ឋាភិបាលសព្វថ្ងៃនយោបាយខ្មៅកខ្វក់បង្កើត និងដឹកនាំដោយទណ្ឌិតក្បត់ជាតិ សម រង្ស៉ី គឺជាគ្រោះថ្នាក់ដ៏ធំសម្រាប់ជាតិកម្ពុជា បើបន្តមានវត្តមាន។ ក្នុងន័យនេះយុវជន ហេង សំណាង ក៏ដូចជាយុវជនមកពីបណ្តាញអង្គការសង្គមស៊ីវិលដទៃទៀត ដែលធ្លាប់លង់ជឿលើមនោគមន៍វិជ្ជាទាំងនេះ បានប្តេជ្ញាធ្វើសកម្មភាពកម្ចាត់នូវមនោគមន៍វិជ្ជាទាំងនេះ។ ជាពិសេសប្រឹងប្រែងធ្វើសកម្មភាពនានា ពន្យល់ប្រជាពលរដ្ឋ និងយុវជនខ្មែរឱ្យចាកឆ្ងាយពីមនោគមន៍វិជ្ជាទាំងនេះ និងកុំឱ្យរងគ្រោះ ក៏ដូចជាចាញ់បោកទណ្ឌិត សម រង្ស៉ី និងបក្ខពួកបន្តទៅទៀត៕
