(ចិន)៖ បន្ទាប់ពីជំនួបពិភាក្សាផ្លូវការ លើការពង្រឹងកិច្ចសហប្រតិបត្តិការ លើវិស័យអាកាសចរស៊ីវិល ជាមួយលោក Captain Song Zhiyong ប្រធានរដ្ឋបាលអាកាសចរស៊ីវិលចិន គណៈប្រតិភូរដ្ឋលេខាធិការដ្ឋានអាកាសចរស៊ីវិល ដែលដឹកនាំដោយលោកបណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិល បានអញ្ជើញចុះទស្សនកិច្ចសិក្សា និងស្វែងយល់អំពីក្រុមហ៊ុន AMECO (Aircraft Maintenance and Engineering Cooperation) ដែលមានមូលដ្ឋាននៅក្នុងទីក្រុងប៉េកាំង ប្រទេសចិន។

នៅក្នុងឱកាសនោះ គណៈប្រតិភូរដ្ឋលេខាធិការដ្ឋានអាកាសចរស៊ីវិល បានជួបពិភាក្សាជាមួយលោក NI Jiliang ជាប្រធានក្រុមប្រឹក្សាភិបាល និងអគ្គលេខធិការបក្សប្រចាំក្រុមហ៊ុន AMECO និងសហការីក្រុមហ៊ុន AMECO ហើយបានចែករំលែក និងស្វែងយល់លើដំណើរការ និងប្រតិបត្តិការអាជីវកម្ម លើការងារថែទាំជួសជុលអាកាសយាន និងវិស្វកម្មអាកាសយាន។

គួរបញ្ជាក់ផងដែរថា ក្រុមហ៊ុន AMECO (Aircraft Maintenance and Engineering Cooperation) គឺជាក្រុមហ៊ុនដ៏ធំ និងល្បីល្បាញមួយក្នុងវិស័យអាកាសចរស៊ីវិល មានមូលដ្ឋាននៅក្នុងទីក្រុងប៉េកាំង នៃសាធារណរដ្ឋប្រជាមានិតចិន ហើយមានជំនាញ និងផ្តល់ជូនសេវាកម្មសំបូរបែប លើការជួសជុសថែទាំអាកាសយាន និងវិស្វកម្មអាកាសយាន។

បច្ចុប្បន្នក្រុមហ៊ុន AMECO (Aircraft Maintenance and Engineering Cooperation) មានបុគ្គលិកសរុប ១១០០០នាក់ និងមានផ្តល់សេវាកម្មទាក់ទងនឹងវិស័យអាកាសចរណ៍ដូចជា៖ Aircraft Line Maintenance, Aircraft Overhaul, PTF Conversion, Aircraft Engine Overhaul, Landing Gear Services, Cabin Solutions, Engineering Services, Aircraft Component Services។

ថ្លែងប្រាប់បណ្តាញព័ត៌មាន Fresh News លោក ស៊ិន ចាន់សេរីវុត្ថា អនុរដ្ឋលេខាធិកា និងអ្នកនាំពាក្យអាកាសចរណ៍ស៊ីវិល បានបញ្ជាក់ថា នៅក្នុងឱកាសជំនួបសំដែងការគួរសម និងស្វែងយល់ដំណើរអាជីវកម្មនោះផងដែរ បណ្ឌិត ម៉ៅ ហាវណ្ណាល់ ក៏បានលើកសំណើ និងអញ្ជើញក្រុមហ៊ុន AMECO (Aircraft Maintenance and Engineering Cooperation) ពិចារណា និងធ្វើការសិក្សាលទ្ធភាព នៃការវិនិយោគ និងបង្កើតរោងជាងជួសជុលថែទាំអាកាសយាននៅកម្ពុជា ជាពិសេសនៅក្នុងមូលដ្ឋានអាកាសយានដ្ឋានអន្តរជាតិសៀមរាបអង្គរថ្មី ដែលនឹងចាប់ផ្តើមបើកដំណើរការ ក្នុងពេលឆាប់ៗនេះ។

លោករដ្ឋមន្រ្តី ម៉ៅ ហាវណ្ណាល់ ក៏បានបញ្ជាក់ផងដែរថា វត្តមានរោងជាងជួសជុលថែទាំ និងវិស្វកម្មអាកាសយាន កម្រិតខ្នាតអន្តរជាតិ ដែលមានការទទួលស្គាល់ជាសកលនៅក្នុងកម្ពុជា អាចនាំឱ្យមានការរីកចម្រើនផ្នែកសេដ្ឋកិច្ច និងជាពិសេសនឹងជួយជម្រុញឱ្យវិស័យអាកាសចរស៊ីវិលកម្ពុជា មានការរីកលូតលាស់ និងរីកចម្រើនមួយកម្រិតថែមទៀត និងអាចឈានដល់កម្រិតប្រកួតប្រជែងជាមួយបណ្តាប្រទេស ក្នុងតំបន់ផងដែរ នៅក្រោមម្លប់សុខសន្តិភាព ក្រោមមាគ៌ាដឹកនាំដ៏ឈ្លាសវៃ ត្រឹមត្រូវ និងប្រកបដោយគតិបណ្ឌិត របស់សម្តេចតេជោហ៊ុនសែននាយករដ្ឋមន្រ្តីនៃកម្ពុជា។

ជាការឆ្លើយតបសំណូមពររបស់លោករដ្ឋមន្ត្រី ក្រុមហ៊ុននឹងបញ្ជូនក្រុមបច្ចេកទេស ទៅសិក្សាលទ្ធភាពនៃការបង្កើតរោងជាងជួសជុល និងថែទាំអាកាសយាននៅអាកាសយានដ្ឋានអន្តរជាតិសៀមរាបអង្គរ (ថ្មី) នៅពេលវេលាសមស្របណាមួយផងដែរ៕