(ភ្នំពេញ)៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានកត់សម្គាល់ឃើញថា ទំហំពាណិជ្ជកម្មរវាងកម្ពុជា និងតំបន់ស្វយ័តក្វាងស៊ី របស់ចិន កំពុងមានកំណើនខ្ពស់ ដែលជាឱកាសដ៏ល្អសម្រាប់អ្នកវិនិយោគ។
លោក ប៉ាន សូរស័ក្តិ បានកត់សម្គាល់បែបនេះ ក្នុងឱកាសទទួលជួបពិភាក្សាការងារជាមួយលោក ឡាន ធានលី អភិបាលតំបន់ស្វយ័តក្វាងស៊ី នារសៀលថ្ងៃទី២១ ខែមេសា ឆ្នាំ២០២៣ នៅសណ្ឋាគារសូហ្វីតែលភោគីត្រា។ ជំនួបនេះធ្វើឡើងក្នុងបំណងបន្តពង្រឹងកិច្ចសហប្រតិបត្តការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ ប្រជាជន និងប្រជាជន រវាងកម្ពុជា និងខេត្តក្វាងស៊ី។
ក្នុងឱកាសនៃជំនួបពិភាក្សានោះ លោករដ្ឋមន្ត្រី ប៉ាន សូរស័ក្តិ បានសម្តែងការស្វាគមន៍យ៉ាងកក់ក្តៅចំពោះវត្តមាន លោក ឡាន ធានលី និងគណៈប្រតិភូអមដំណើរទាំងអស់ ដែលបានមកបំពេញទស្សនកិច្ចផ្លូវការនៅកម្ពុជា។ លោករដ្ឋមន្ត្រី បានរំឭកអំពីខួបអនុស្សាវរីយ៍លើកទី៦៥ឆ្នាំ នៃការបង្កើតទំនាក់ទំនងការទូតរវាងកម្ពុជា-ចិន និងបានជម្រាបជូនភ្ញៀវពីចំណងមិត្តភាពកាន់តែរឹងមាំ និងស៊ីជម្រៅឈានឡើងមួយកម្រិតពីមិត្តភាពដែកថែប ទៅជាមិត្តភាពក្នុងក្របខ័ណ្ឌកិច្ចសហប្រតិបត្តិការត្បូងពេជ្រ និងយល់ចិត្តថ្លើមគ្នា ដោយរដ្ឋាភិបាលនៃប្រទេសទាំងពីរកម្ពុជា-ចិន បានប្តេជ្ញាខិតខំរួមគ្នាជំរុញការកសាងសហគមន៍ជោគវាសនាតែមួយ និងជំរុញការបង្កើនទំហំពាណិជ្ជកម្មទ្វេភាគីឱ្យកើនឡើងថែមទៀតក្នុងបណ្តាឆ្នាំខាងមុខ។
លោករដ្ឋមន្ត្រីបន្តថា តាមរយៈចំណងមិត្តភាពនេះ កម្ពុជា-ចិន បានក្លាយជាដៃគូយុទ្ធសាស្រ្ត និងកិច្ចសហប្រតិបត្តិការគ្រប់ជ្រុងជ្រោយចាប់តាំងពីឆ្នាំ២០១០ កន្លងមក។ កម្ពុជា បានគាំទ្រចំពោះគំនិតផ្តួចផ្តើមបង្កើតផ្លូវសូត្រខ្សែក្រវាត់សេដ្ឋកិច្ច និងផ្លូវសូត្រសមុទ្រសតវត្សរ៍ទី២១ (The Silk Road Economic Belt and The 21st Century Maritime Silk Road) របស់រដ្ឋាភិបាលចិន តាំងពីឆ្នាំ២០១៦កន្លងមក។ តាមរយៈគោលនយោបាយនេះ រដ្ឋាភិបាលនៃប្រទេសទាំងពីរ បានធ្វើកិច្ចសហប្រតិបត្តិការ និងអភិវឌ្ឍន៍រួមគ្នាលើវិស័យសំខាន់ៗជាច្រើន ដូចជា៖ វិស័យហេដ្ឋារចនាសម្ព័ន្ធ កសិកម្ម ពាណិជ្ជកម្ម ការកសាងធនធានមនុស្ស ការអភិវឌ្ឍន៍តំបន់សេដ្ឋកិច្ចពិសេស ការផ្លាស់ប្តូរវប្បធម៌ ទេសចរណ៍ និងការការពារបរិស្ថាន ហើយកាលពីថ្ងៃទី១ ខែមករា ឆ្នាំ២០២១កន្លងទៅ រដ្ឋាភិបាលនៃប្រទេសទាំងពីរ បានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន ដែលតាមការរំពឹងទុកកិច្ចព្រមព្រៀងពាណិជ្ជកម្មសេរីទ្វេភាគីនេះ នឹងជួយជំរុញទំហំពាណិជ្ជកម្មរវាងប្រទេសយើងទាំងពីរ ឱ្យកាន់តែរីកចម្រើនមួយកម្រិតថែមទៀត។
លោក ប៉ាន សូរស័ក្តិ បានជម្រាបជូនពីទំហំពាណិជ្ជកម្មទ្វេភាគីកម្ពុជា និងខេត្តក្វាងស៊ីផងដែរ។ នៅក្នុងឆ្នាំ២០២២កន្លងទៅ ទំហំពាណិជ្ជកម្មនាំចេញ-នាំចូល មានទឹកប្រាក់ចំនួន ១,៩៧០លានយន់ កើនឡើង ៨៨.២ភាគរយ ធៀបនឹងឆ្នាំ២០២១។ ក្នុងនោះ ខេត្តក្វាងស៊ី នាំចេញមកកម្ពុជា មានចំនួន ១,៨៦០លានយន់ កើនឡើង ៨៨.៥ភាគរយ រីឯកម្ពុជានាំចេញទៅខេត្តក្វាងស៊ី មានចំនួន ១១០លានយន់ កើនឡើង ៨៥.៣ភាគរយ។ គិតត្រឹមខែធ្នូ ឆ្នាំ២០២២ ក្រុមហ៊ុនមកពីខេត្តក្វាងស៊ី មកវិនិយោគនៅក្នុងប្រទេសកម្ពុជា (មិនមែនហិរញ្ញវត្ថុ) សរុបមានចំនួន ៥៦ក្រុមហ៊ុន។ ទំនិញសំខាន់ៗដែលខេត្តក្វាងស៊ី នាំចូលមកកម្ពុជាមាន៖ គ្រឿងបន្លាស់ម៉ាស៊ីនត្រង់ស្វូរ ម៉ាស៊ីន បិទស្រា ម៉ាស៊ីនរុំខ្សែ ជីកសិកម្ម ទុយោចរន្តអគ្គិសនី ឧបករណ៍បញ្ជូនអុបទិកជាដើម ហើយកម្ពុជានាំចេញទៅខេត្តក្វាងស៊ីវិញរួមមាន៖ អង្ករ ដំឡូងមីស្ងួត ម្សៅដំឡូងមី ផលិតផលកសិកម្ម ឧបករណ៍ទប់ចរន្តអគ្គីសនី ម៉ាស៊ីនត្រង់ស្វូរជាដើម។ល។
ទាក់ទងការរៀបចំចូលរួមពិព័រណ៍ចិន-អាស៊ាន (China-ASEAN EXPO) លោករដ្ឋមន្ត្រី ក្នុងនាមប្រធានគណៈកម្មការអន្តរក្រសួង ដើម្បីរៀបចំចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ បានជម្រាបជូនលោកអភិបាលខេត្តថា កម្ពុជាបានធ្វើជាដៃគូសហការរៀបចំចូលរួមពិព័រណ៍ចិន-អាស៊ាន នៅទីក្រុងណាននីង ជាលើកដំបូងនៅឆ្នាំ២០០៤ រហូតមកដល់ឆ្នាំ២០២៣នេះ បានចូលរួមចំនួន ២០លើករួចមកហើយ និងបានធ្វើជាប្រទេសកិត្តិយសតាមការឆ្លាស់វេនគ្នាចំនួនពីរលើក គឺនៅឆ្នាំ២០០៨ និងនៅឆ្នាំ២០១៨។
លោករដ្ឋមន្ត្រី បញ្ជាក់ទៀតថា ក្នុងនាមជាដៃគូយុទ្ធសាស្រ្តគ្រប់ជ្រុងជ្រោយ និងមិត្តភាពក្នុងក្របខ័ណ្ឌកិច្ចសហប្រតិបត្តិការត្បូងពេជ្រជាមួយប្រទេសចិន សម្តេចតេជោ ហ៊ុន សែន បានដឹកនាំគណៈប្រតិភូជាន់ខ្ពស់ ទៅចូលរួមពិធីសម្ពោធពិព័រណ៍ចិន-អាស៊ានដោយផ្ទាល់ បានចំនួន ១១លើក។ ក្នុងអំឡុងពេលកូវីដ-១៩ បានចូលរួមថ្លែងសុន្ទរកថាតាមរយៈការថតវីដេអូទុកចាក់ផ្សាយក្នុងពេលសម្ពោធ បានចំនួន ៣លើក សរុបបានចំនួន ១៩លើក។ លើសពីនេះ ក្រសួងពាណិជ្ជកម្មកម្ពុជា បានត្រៀមលក្ខណៈរួចរាល់ក្នុងការកៀរគរក្រុមហ៊ុនឯកជនឱ្យបានច្រើនទៅចូលរួមពិព័រណ៍ចិន-អាស៊ានលើកទី២០ ឆ្នាំ២០២៣ខាងមុខ នៅទីក្រុងណាននីង ហើយក្នុង អំឡុងពេលពិព័រណ៍ ក្រសួងក៏នឹងមានរៀបចំវេទិកាធុរកិច្ច វិនិយោគ និងទេសចរណ៍កម្ពុជា-ចិន ផងដែរ។
ឆ្លៀតក្នុងឱកាសនេះ លោករដ្ឋមន្ត្រី បានស្នើសុំភាគីមិត្តចិនផ្តល់ការគាំទ្រ និងជួយជំរុញឱ្យពាណិជ្ជករ សមាគមអាជីវកម្មចិន នៅខេត្តក្វាងស៊ី ចូលរួមក្នុងវេទិកាខាងលើឱ្យបានច្រើន ដើម្បីទទួលបានព័ត៌មានថ្មីៗស្តីពីកាលានុវត្តភាពនៃការធ្វើជំនួញនៅកម្ពុជា។
សូមជម្រាបជូនថា ក្នុងដំណើរទស្សនកិច្ចមកកម្ពុជានាពេលនេះ លោក ឡាន ធានលី បានដឹកនាំគណៈប្រតិភូចូលជួបសម្តែងការគួរសមជាមួយ សម្តេចតេជោនាយករដ្ឋមន្រ្តីនៃព្រះរាជាណាចក្រកម្ពុជា និងអញ្ជើញសម្តេចតេជោ ដឹកនាំគណៈប្រតិភូជាន់ខ្ពស់កម្ពុជា ទៅចូលរួមពិធីសម្ពោធពិព័រណ៍ចិន-អាស៊ានលើកទី២០ និងចូលរួមក្នុងកិច្ចប្រជុំសំខាន់ៗមួយចំនួនដែលរៀបចំក្នុងអំឡុងពេលពិព័រណ៍នោះ។
ទន្ទឹមនេះ លោកអភិបាលខេត្ត ក៏បានអញ្ជើញលោក ប៉ាន សូរស័ក្តិ ដឹកនាំគណៈប្រតិភូអន្តរក្រសួងទៅចូលរួមវេទិកាសេដ្ឋកិច្ច និងវិនិយោគចិន-អាស៊ាននាឱកាសនោះផងដែរ។ បន្ថែមលើនេះ លោកអភិបាលខេត្ត ក៏បានដឹកនាំប្រតិភូពាណិជ្ជករចិន មកចូលរួមវេទិកាធុរកិច្ច និងវិនិយោគ និងកម្មវិធីផ្គូរផ្គងពាណិជ្ជកម្ម ជាមួយពាណិជ្ជករកម្ពុជា ដែលរៀបចំនៅព្រឹកថ្ងៃទី២២ ខែមេសា ឆ្នាំ២០២៣ នាសណ្ឋាគារសូហ្វីតែលភោគីត្រារាជធានីភ្នំពេញ ដោយមានអ្នកចូលរួមចំនួន ១៦០នាក់ និងបាននាំយកអំណោយជាសម្ភារៈមួយចំនួនគិតជាទឹកប្រាក់ប្រមាណ ១.៥ លានយន់ ជូនរាជរដ្ឋាភិបាលកម្ពុជាផងដែរ៕
