(អវកាស)៖ រូបភាពដែលយាន Juno ថតបានជាលក្ខណៈពណ៌ធម្មជាតិមួយសន្លឹក ទើបត្រូវបានបញ្ជូនមកដល់ផែនដី ដែលយើងអាចមើលឃើញភពព្រហស្បតិ៍ ដូចជាចំណិតព្រះខែ និងចំណុចសៗបីទៀតនោះ គឺ ព្រះច័ន្ទធំៗរបស់វាមាន ដូចជា អាយអូ (Io), យូរ៉ូប៉ា (Europa), និង ហ្គេនីមីដ (Ganymede) ហើយរូបភាពជាប្រវត្តិសាស្ត្រនេះត្រូវបានថត ក្នុងរយៈចម្ងាយ ៤,៣លានគីឡូម៉ែត្រពីភពព្រហស្បតិ៍។ នេះបើតាមការចេញផ្សាយពីវែបសាយអវកាស នៅមុននេះបន្តិច នាព្រឹកថ្ងៃពុធ ទី១៣ ខែកក្កដា ឆ្នាំ២០១៦។

រូបភាពខាងលើនេះដែរ ត្រូវបានបញ្ជូនមកដល់ផែនដីកាលពីថ្ងៃទី១០​ ខែកក្កដា ក្រោយរយៈពេលជាងមួយសប្តាហ៍ នៃការហោះចូលក្នុង គន្លងដ៏ជោគជ័យពីលើភពព្រហស្បតិ៍។ វាបានបង្ហាញពីភាពខ្លាំងរបស់យានដែលអាចទប់ទល់ នឹងរលកវិទ្យុសកម្មដ៏ខ្លាំងក្លារបស់ភពព្រហស្បតិ៍ ហើយអាចថតបានរូបភាពរបស់វាថែមទៀត។ សម្រាប់គោលដៅ មួយនេះទៀត កាមេរ៉ានៃយាន Juno នឹងថតរូបភាពនៃតំបន់ប៉ូលរបស់ភពព្រហស្បតិ៍ជាលើកដំបូងផងដែរ ដែលនឹងធ្វើ ឲ្យគ្រប់គ្នារំភើបចំពោះរូបភាពពិតៗ និងលម្អិតជាងមុន។

បច្ចុប្បន្នយាន Juno ត្រូវបានបញ្ជាឲ្យចេញឆ្ងាយពីភពព្រហស្បតិ៍បន្តិចហើយ ដើម្បីបន្តដំណើរគោចរនៅទីនោះ រយៈពេល ៥៣ថ្ងៃរបស់ផែនដីជាបន្តទៀត។ សម្រាប់រូបភាពគុណភាពខ្ពស់ នឹងត្រូវធ្វើការថតជាផ្លូវការតែម្តងនៅថ្ងៃទី ២៧ ខែសីហា ខាងមុខនេះនៅពេល Juno ធ្វើដំណើរកៀកភពព្រហស្បតិ៍ម្តងទៀត។ ដំណើរនៅជុំវិញភពព្រហស្បតិ៍ នោះគឺមានភាពស្មុគស្មាញបន្តិច ដោយសារតែវាមានបេសកកម្មច្រើនមុខ ដែលត្រូបំពេញនៅទីនោះ ហើយសម្រាប់ការ ថតរូបក៏ជារឿងសំខាន់មួយដែរ ចំពោះអ្នកវិទ្យាសាស្ត្រធ្វើការវិភាគពីវត្ថុធាតុដែលមាននៅផ្ទៃខាងលើ នៃភពព្រហស្បតិ៍បាន៕