(ភ្នំពេញ)៖ អភិបាលតំបន់ស្វយ័តក្វាងស៊ី ប្រទេសចិន លោក ឡាន ធានលី (Lan Tianli) បានបង្ហាញការកោតសរសើរចំពោះការដឹកនាំរបស់សម្តេចតេជោ ហ៊ុន សែន ធ្វើឱ្យកម្ពុជារីកចម្រើនយ៉ាងឆាប់រហ័ស។
លោក ធានលី បានលើកឡើងបែបនេះ ក្នុងឱកាសអញ្ជើញជួបសម្តែងការគួរសម និងពិភាក្សាការងារមួយចំនួនជាមួយសម្តេចតេជោនាយករដ្ឋមន្ត្រី នៅវិមានសន្តិភាព នាល្ងាចថ្ងៃទី២០ ខែមេសា ឆ្នាំ២០២២នេះ។
លោក អ៊ាង សុផល្លែត ជំនួយការផ្ទាល់របស់សម្តេចតេជោ បានប្រាប់អ្នកព័ត៌មានថា លោក ធានលី បានវាយតម្លៃខ្ពស់ ចំពោះការអភិវឌ្ឍន៍របស់កម្ពុជា។ លោក ធានលី បានបញ្ជាក់ថា លោកធ្លាប់បានមកកាន់កម្ពុជាកាលពីឆ្នាំ២០១៦ ហើយពេលនេះ កម្ពុជាកាន់តែមានការរីកចម្រើនទ្វេឡើងបន្ថែមទៀត។ ក្នុងនោះ មានអគារខ្ពស់ៗជាច្រើន និងប្រជាជនមានជីវភាពធូរធារច្រើន។
លោក ធានលី ក៏បានជម្រាបជូនសម្ដេចតេជោ អំពីគោលបំណងនៃដំណើរទស្សនកិច្ចរបស់លោកមកកាន់កម្ពុជានាពេលនេះផងដែរ។ គោលបំណងនៃដំណើរទស្សនកិច្ចរបស់លោកមានចំនួន៣ រួមមាន៖ ទី១ គោរពថ្លែងអំណរគុណសម្ដេចតេជោនាយករដ្ឋមន្ត្រី ដែលតែងតែគាំទ្រតំបន់ស្វយ័តក្វាងស៊ី ជាពិសេសគាំទ្រការរៀបចំពិព័រណ៍ ចិន-អាស៊ាន នៅទីក្រុងណាននីង, ទី២៖ ជំរុញការអនុវត្តកិច្ចព្រមព្រៀង រវាងថ្នាក់ដឹកនាំកំពូល របស់ចិន និងកម្ពុជា ជាពិសេសការកសាងសហគមន៍ជោគវាសនា រួម ចិន-កម្ពុជា, គោលបំណងទី៣៖ គោរពសុំអនុសាសន៍សម្ដេចតេជោនាយករដ្ឋមន្ត្រី ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំបន្ថែមទៀត។
សម្ដេចតេជោ ហ៊ុន សែន បានឯកភាព និងថ្លែងអំណរគុណចំពោះការវាយតម្លៃ លើទំនាក់ទំនងរវាងកម្ពុជា និងប្រទេសចិន។ សម្ដេចតេជោ បានផ្ដល់អនុសាសន៍ឱ្យលោក ធានលី បន្តកិច្ចសហប្រតិបត្តិការមានស្រាប់ ឱ្យកាន់តែស៊ីជម្រៅ និងអនុវត្តកិច្ចព្រមព្រៀង ដែលមានស្រាប់នោះ ឱ្យបានគ្រប់ជ្រុងជ្រោយ៕
