(បាងកក)៖ សមាជិករដ្ឋសភានៃព្រះរាជាណាចក្រកម្ពុជា និងជាហិរញ្ញិកនៃ AFPPD (សមាជិកសភានៃវេទិកាអាស៊ី ស្តីពីចំនួនប្រជាជននិងការអភិវឌ្ឍ) លោកស្រី ឡោក ខេង បានបង្ហាញចំណាប់អារម្មណ៍ ផ្ទាល់ខ្លួនរបស់លោកស្រី នៅក្នុងទិវា «ចំនួនប្រជាជនពិភពលោក»។
«ខ្ញុំក៏ដូចជាស្ត្រីកម្ពុជាផ្សេងទៀតដែរ ដែលបានរួចរស់ជីវិតពីរបបកាប់សម្លាប់របស់ពួកខ្មែរក្រហម។ ខ្ញុំបានទទួលរងនូវការរំលោភបំពានដ៏អាក្រក់បំផុត។ បន្ទាប់ពីនោះមក ខ្ញុំបានបង្កើតកិច្ចខិតខំប្រឹងប្រែង យ៉ាងខ្លាំង ដើម្បីទាមទារឲ្យមាននូវសេរីភាព និងការរស់នៅក្នុងជីវិតដ៏ស្មើភាពមួយ ជាមួយនឹងសេចក្តីថ្លៃថ្នូរ។ ខ្ញុំបានសម្រេចចិត្តធ្វើជាអ្នកនយោបាយមួយរូបដើម្បីសហគមន៍របស់ខ្ញុំ ប្រជាជនរបស់ខ្ញុំ និង ជាតិរបស់ខ្ញុំ។ ចាប់តាំងពីពេលនោះមក ខ្ញុំបានធ្វើការប្រយុទ្ធតស៊ូដើម្បីសិទ្ធិស្ត្រី និងកុមារី និង បានចូលរួមនៅក្នុងកិច្ចប្រជុំសំខាន់ៗជាច្រើន នៅក្នុងបណ្តាប្រទេសនានាជុំវិញសកលលោក ដើម្បី សិក្សាពីបទពិសោធន៍ និង ការអនុវត្តល្អៗរបស់ពួកគេ»។ នេះជាសំដីរបស់លោកស្រី ឡោក ខេង ដែលបានលើកឡើង។
លោកស្រីបានបន្តទៀតថា «នៅឆ្នាំនេះ យើងធ្វើការប្រារព្ធទិវានៃ ចំនួនប្រជាជនពិភពលោក (World Population Day) ដូច្នេះយើងបានធ្វើការផ្តល់ជូនជាមួយនឹងគំនិតបំផុសមួយចំនួន ដើម្បីជាការជំរុញនិងលើកទឹកចិត្តស្ត្រី។ យើងត្រូវការផ្តល់ក្តីសង្ឃឹមនិងឱកាស សម្រាប់ស្ត្រីនិងកុមារី ដែលបម្រើការងារជាស្ត្រីមេផ្ទះ, អ្នកទាំងអស់គ្នាដែលបម្រើការងារក្នុងសហគមន៍, និង អ្នកទាំងអស់គ្នាដែលបម្រើការងារក្នុងអាជ្ញាធរ ថ្នាក់ខ្ពស់នានា»។
ក្នុងនោះលោកស្រី ក៏បានរំលេចចេញនូវឃ្លាមួយ ដែលមានអត្ថន័យថា «ទីណាដែលមានស្ត្រី ទីនោះគឺមាន ការរួមចំណែក និង តម្លាភាព ពីព្រោះស្ត្រីជាអ្នកបង្កើតឲ្យមានមេត្តាធម៌»។
គួរបញ្ជាក់ផងដែរថា លោកស្រី ឡោក ខេង បានអំពាវនាវឲ្យអាជ្ញាធររដ្ឋគ្រប់កម្រិត ដើរតួយ៉ាងសំខាន់ និងជួយការពារឲ្យបានហ្មត់ចត់ ដើម្បីលើកតម្កើងតម្លៃ និង សិទ្ធិនៃស្ត្រី និងកុមារី៕
