(ភ្នំពេញ)៖ នៅក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវអគារសម្ភព ក្នុងបរិវេណមន្ទីរពេទ្យកុមារជាតិ នាព្រឹកថ្ងៃទី២០ ខែមេសា ឆ្នាំ២០២៣នេះ សម្តេចតេជោ ហ៊ុន សែន បានប្រកាសថា ប្រសិនបើមានកម្លោះក្រមុំទាំងឡាយណា រៀបការនឹងគ្នា បន្ទាប់ពីបានស្គាល់គ្នាតាមឡានក្រុង ដែលរៀបចំដោយរដ្ឋបាលរាជធានីភ្នំពេញ ដើម្បីដឹកពលរដ្ឋទៅមកស្រុកកំណើត ឱកាសបុណ្យចូលឆ្នាំថ្មីនោះ សូមអញ្ជើញហៅសម្តេចផង។

បន្ទាប់ពីបញ្ចប់ពិធីនេះ សម្តេតេជោ ហ៊ុន សែន តាមរយៈបណ្តាញសង្គម ក៏ផ្ញើចម្រៀងមួយបទក្រោមចំណងជើងថា «ចន្ទរះលើរថយន្តក្រុង» ដើម្បីជាចំណងដៃសម្រាប់ក្រមុំកម្លោះទាំងឡាយ ដែលស្គាល់គ្នាលើឡានក្រុង អំឡុងចូលឆ្នាំកន្លងទៅផងដែរ។

សម្តេចបានបញ្ជាក់ដូច្នេះថា៖ «ខ្ញុំនិយាយថា ប្រជាជនប្រមាណ៥មុឺននាក់ បានជិះរថយន្តក្រុងដែលរៀបចំដោយសាលារាជធានីភ្នំពេញ ក្នុងពេលចូលឆ្នាំកន្លងមក។ (និយាយព្រឹកមិញក្នុងពិធីសម្ពោធអគារសម្ភពនៃមន្ទីរពេទ្យកុមារជាតិ 20/4/2023)។ ពេលនោះខ្ញុំបានលើកឡើងថា ប្រជាជនបានស្គាល់គ្នាលើឡានក្រុង និងដែលអាចមានកម្លោះក្រមុំស្គាល់គ្នាផងដែរ និងប្រសិនបើរៀបការសូមប្រាប់ខ្ញុំផង។ ដើម្បីជាចំណងដៃសម្រាប់ក្រមុំកម្លោះទាំងឡាយ ដែលស្គាល់គ្នាលើឡានក្រុង សូមស្តាប់បទ (ចន្ទរះលើរថយន្តក្រុង)។ ចំហាយសប្បាយនៅសល់ពីចូលឆ្នាំជាមួយសមិទ្ធផលថ្មីក្នុងឆ្នាំថ្មី»៕

ខាងក្រោមនេះជាចម្រៀងបទ «ចន្ទរះលើរថយន្តក្រុង», សូមទស្សនាដូចតទៅ៖