(ស្ទឹងត្រែង)៖ លោក ស្វាយ សំអ៊ាង អភិបាលខេត្ត និងប្រធានគណៈកម្មាធិការសាខាកាកបាទក្រហមកម្ពុជា ខេត្តស្ទឹងត្រែង នៅរសៀល ថ្ងៃទី១៨ ខែមេសា ឆ្នាំ២០២៣ បន្តនាំយកអំណោយកាកបាទក្រហមកម្ពុជាចែកជូនដល់គ្រួសាររងគ្រោះដោយខ្យល់កន្ត្រាក់ ក្នុងស្រុកបុរីអូស្វាយសែនជ័យ។
ពិធីនេះអមដំណេីរដោយលោកអភិបាលស្រុក រួមនឹងសមាជិកគណៈកម្មការសាខាកាកបាទក្រហមខេត្ត នាយកសាខា អាជ្ញាធរស្រុក ដោយបាននាំយកគ្រឿងឧបភោគបរិភោគនិងសម្ភារមួយចំនួន ផ្តល់ជូនគ្រួសាររងគ្រោះដោយខ្យល់កន្ត្រាក់ ចំនួន ៣៦គ្រួសារបន្ថែមទៀត ក្នុងឃុំចំនួន៣រួមមាន៖ ឃុំកោះស្នែង ឃុំព្រះរំកិល ឃុំអូស្វាយ ក្នុងស្រុកបុរីអូស្វាយសែនជ័យ។
កក្នុងឱកាសនោះ លោក ស្វាយ សំអ៊ាង បានផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដែលកំពុងជួបការលំបាកពិសេសជនពិការ ចាស់ជរា និងគ្រោះធម្មជាតិដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
លោកអភិបាលខេត្តក៏បានផ្តាំផ្ញើដល់បងប្អូនប្រជាពលរដ្ឋត្រូវថែទាំសុខភាព ឱ្យបានល្អ រក្សាអនាម័យក្នុងការរស់នៅ ជាពិសេសត្រូវមានស្មារតីរឹងប៉ឹង ក្នុងការប្រកបរបរចិញ្ចឹមជីវិតប្រចាំថ្ងៃអោយកាន់តែប្រសើរតទៅថ្ងៃមុខ និងបានអំពាវនាវដល់ប្រជាពលរដ្ឋទាំងអស់ ពិសេសចាស់ជរា ជនពិការ កុមារតូចៗ មានស្មារតីប្រុងប្រយ័ត្នខ្ពស់ ចំពោះខ្យល់កន្ត្រាក់ ផ្គររន្ទះ និងចូលរួមទប់ស្កាត់ជំងឺកូវីដ១៩ ត្រូវប្រុងប្រយ័ត្នចំពោះ ជំងឺឆ្លងនានា ព្រមទាំងត្រូវចូលរួមគោរពច្បាប់ចរាចរណ៍ទាំងអស់គ្នា ដើម្បីសេចក្តីសុខ និងសុភមង្គលក្នុងក្រុមគ្រួសារ។
អំណោយកាកបាទក្រហមកម្ពុជា រួមនិងថវិកាផ្ទាល់របរបសលោកអភិបាល ចែកជូនដល់ គ្រួសាររងគ្រោះដោយខ្យល់កន្ត្រាក់ ចំនួន៣៦គ្រួសារ ក្នុងមួយទទួលបានថវិកា៥០,០០០រៀល រួមនិងអង្ករ ២៥គីឡូក្រាម មី ១កេស ត្រីខ ១ឡូ ទឹកសុទ្ធ និងសម្ភារៈប្រេីប្រាស់មួយចំនួន៕
