(ភ្នំពេញ)៖ ភរិយាសពលោក កែម ឡី លោកស្រី ប៊ូ រចនា បានថ្លែងប្រាប់ឲ្យដឹង នៅវេលាថ្ងៃត្រង់ទី១២ ខែកក្កដានេះថា លោកស្រីកំពុងរារែកចិត្ត ក្នុងការ សម្រេចចិត្ត នាំកូនៗទៅរស់នៅក្រៅប្រទេស ព្រោះមានស្ថានទូត ជាច្រើនបានទំនាក់ទំនង មកលោកស្រី។
លោកស្រីបានបញ្ជាក់ថា នៅពេលនេះកំពុងរៀបចំបុណ្យសព លោកស្រីមិនទាន់គិតលើកបញ្ហាហ្នឹងទេ ដោយលោកស្រីកំពុងរារែកចិត្តថា នឹងសម្រេចចិត្តទៅប្រទស ណានោះទេ។ លោកស្រីបាន និយាយទៀតថា ការសម្រេចចិត្តទៅក្រៅប្រទេសដើម្បីអនាគតកូនៗ។
លោកស្រី ប៊ូ រចនា បានប្រាប់ Fresh News យ៉ាងដូច្នេះថា «ខ្ញុំនៅមិនទាន់ច្បាស់ថា នឹងសម្រេចចិត្តទៅរស់នៅអូស្រ្តាលីនៅឡើយទេ ហើយខ្ញុំក៏មិនទាន់ដឹងថា នឹងទៅប្រទេសណាដែរ តែយ៉ាងណាខ្ញុំនឹងទៅដើម្បីសុវត្ថិភាពកូនៗ។ មិនមានប្រទេសអូស្រ្តាលីតែមួយទេ មានប្រទេសច្រើនទៀតដែលស្នើឲ្យខ្ញុំ និងកូនៗទៅនៅ»។
នៅខណៈពេលនេះ សពលោកបណ្ឌិត កែម ឡី កំពុងត្រូវបានរៀបចំ ធ្វើបុណ្យសព នៅវត្តចាស់ ហើយសពនឹងតម្កល់រហូតដល់ថ្ងៃទី១៨ ខែកក្កដា។
សូមជំរាបថា នៅក្នុងឱកាសអញ្ជើញជាអធិបតីសម្ពោធដាក់ឲ្យប្រើប្រាស់អគារ ចំនួនពីរ រួមនិងប្រព័ន្ធហេដ្ឋារចនាសម្ព័ន្ធ មួយចំនួនទៀត នៅទីបញ្ជាការដ្ឋានកងរាជអាវុធហត្ថលើផ្ទៃប្រទេស ពីម្សិលមិញ សម្តេចតេជោ ហ៊ុន សែន បានសម្តែងមរណទុក្ខក្រៀមក្រំ ជាមួយក្រុមគ្រួសារសពលោកបណ្ឌិត កែម ឡី ដែលជាអ្នកវិភាគល្បាញល្បីនៅកម្ពុជា និងថ្កោលទោសដាច់ ណាត់ចំពោះអំពើឃោរឃៅ ហើយត្រូវមានការចាត់វិធានការតឹងរឹង។
«ឃាតករដែលបាញ់សម្លាប់ លោកបណ្ឌិត កែម ឡី អ្នកវិភាគឯករាជ្យ អាចប្រឈមនឹង ការជាប់ពន្ធនាគារ អស់មួយជីវិត» នេះយោងតាមច្បាប់ព្រហ្មទណ្ឌ បើសិនណាជាតុលាការសម្រេចថា នោះជាអំពើឃាតកម្ម គិតទុកជាមុន។
ខ្មាន់កំាភ្លើងត្រូវបានសមត្ថកិច្ចដេញចាប់យ៉ាងប្រផាប់ប្រភីង ក្រោយបាញ់សម្លាប់លោកបណ្ឌិត កែម ឡី ភ្លាមៗនៅក្នុងស្តាម៉ាត (Star Mart) ស្តុបបូកគោ ខណ្ឌចំការមន រួចរត់ទៅកាន់វិថីព្រះសុធារស ក្បែរវត្តស្វាយអំពែ។ នេះបើតាមការបញ្ជាក់របស់ នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ៕
